سۋرەتتەردى تۇسىرگەن – ميرات قورجىنباەۆ
ەلىمىزدەگى ەڭ ۇزدىك تۋريستىك 5 اۋىلدىڭ ءبىرى – باتىس قازاقستان وبلىسى بوكەي ورداسى اۋدانىنداعى حان ورداسى اۋىلى تانىلدى.
ىرگەسى 1826 جىلى ىشكى قازاق ورداسىنىڭ بيلەۋشىسى جاڭگىر حاننىڭ ۇيعارىمىمەن جانە تىكەلەي باسشىلىعىمەن قالانعان ەلدى مەكەن باستاپقى كەزدە «حان ورداسى» اتالعان. 1918 جىلى كەڭەس بيلىگى ورناعان كەزدە «وردا قالاسى» دەپ اتالدى. 1917–1920 جىلدارى اۋىل بوكەي وبلىسىنىڭ, 1920–1925 جىلدارى بوكەي گۋبەرنياسىنىڭ, 1925–1928 جىلدارى بوكەي ۋەزىنىڭ, 1928–1952 جىلدارى وردا اۋدانىنىڭ ورتالىعى بولدى. 1964–1997 جىلدار ارالىعىندا وكرۋگ دارەجەسىنە ءتۇسىپ, «وردا» كەڭشارىنىڭ ورتالىق ۋسادباسى اتاندى.
دەگەنمەن بۇل اۋىلدىڭ دارەجەسىن ارتتىرىپ, داڭقىن اسقاقتاتىپ تۇرعان – اقىندار «اينالاسى ايشىلىق, كولدەنەڭى كۇنشىلىك» دەپ جىرلاعان حان ورداسىنىڭ ساقتالۋى دەر ەدىك. بۇل – كۇللى ەل اۋماعىندا كۇنى بۇگىنگە دەيىن ساقتالىپ تۇرعان جالعىز حان ورداسى!
بۇگىندە وسى جەردە حان ورداسى تاريحي-مادەني, ارحيتەكتۋرالىق-ەتنوگرافيالىق مۇراجاي-قورىعى اتالعان ۇلكەن كەشەن بۇكىل ءبىر ولكەنىڭ جىلناماسىن جيىپ, حالىققا ۇسىنىپ وتىر.
مۇراجاي-قورىق قۇرامىندا 1828 جىلى سالىنعان حان سارايى عيماراتىنان بولەك, حان مەشىتى, ەلىمىزدەگى العاشقى بانك – قازىناشىلىق ءۇيى (1867), ايەلدەر گيمنازياسى (1883), اۋرۋحانا عيماراتى (1872), تۇڭعىش قازاق باسپاحاناسى (1841), سەيىتقالي مەڭدەشەۆتىڭ مەموريالدىق مۋزەيى (1842), الما ورازباەۆا تۇرعان ءۇي (1842), تارعىن مەكتەبى عيماراتى (1868), شاڭگەرەي بوكەەۆتىڭ فوتو مۋزەيى, جاڭگىر حان, داۋلەتكەرەي شىعاي ۇلى جانە مۇحامەد-سالىق باباجانوۆتىڭ كەسەنەلەرى سىندى ونداعان عيمارات, مىڭداعان جادىگەر بار.
قىسقاشا ايتقاندا, حان ورداسى اشىق اسپان استىنداعى مۇراجاي دەسە بولادى. حان ورداسى اۋىلى – شىنىمەن دە ۇزدىك تۋريستىك اۋىل.
ءبىز بۇگىن حان ورداسى تاريحي-مادەني, ارحيتەكتۋرالىق-ەتنوگرافيالىق مۇراجاي-قورىعىنىڭ قىزمەتكەرى, اۋەسقوي فوتوگراف ميرات قورجىنباەۆتىڭ نىساناسىنا ىلىككەن سۋرەتتەر توپتاماسىن – حان ورداسى اۋىلىنىڭ كورىنىستەرىن ۇسىنامىز.
اۆتور تۋرالى اقپارات: قورجىنباەۆ ميرات بيسەنعالي ۇلى وردا اۋىلىندا دۇنيەگە كەلگەن. 2007 جىلدان بەرى بوكەي ورداسى تاريحي-مۋزەي كەشەنىندە قىزمەت اتقارادى. تۋعان اۋىلىنىڭ تاريحى مەن بۇگىنى تۋرالى دەرەكتى فيلمدەردىڭ, فوتوتوپتاما, باننەر, بۋكلەتتەردىڭ اۆتورى. حان ورداسى تاريحىن ناسيحاتتاپ, مۋزەي قورىن تولىقتىرۋ ماقساتىندا رەسەيدىڭ موسكۆا, سانكت-پەتەربۋرگ قالالارىنا, تاريحي ورىندارعا ىسساپارعا شىققان.
باتىس قازاقستان وبلىسى
