كوكشەتاۋدا جانارماي قۇيۋ بەكەتىنە قاراشىلىق شابۋىل جاسالدى

استانا. 4 مامىر. كوكشەتاۋ قالاسىنداعى جانارماي قۇيۋ بەكەتتەرىنىڭ بىرىنە قاراقشىلار شابۋىل جاسادى. بەتپەردە كيگەن بەلگىسىز ەكەۋ بەكەتكە باسىپ كىرىپ, كاسساداعى اقشانى الىپ كەتكەن. الايدا, كوپ كەشىكپەي كۇدىكتىلەر قولعا ءتۇستى. بۇل تۋرالى newskaz.ru حابارلادى. قۇقىق قورعاۋ ورگاندارىنىڭ حابارلاۋىنشا, وقيعا 2 مامىردا بولعان. تۇندە قالاداعى «ەسىل» جانارماي قۇيۋ بەكەتىنە ەكى ەر ادام باسا-كوكتەپ كىرىپ, وپەراتوردى ۇرىپ-سوققان. سوڭىندا كاسسادان اقشا الىپ, كەتىپ قالعان. قىلمىس بولعان جەرگە ىشكى ىستەر دەپارتامەنتىنىڭ جەتەكشىلەرى مەن ۇيىمداسقان قىلمىسقا قارسى كۇرەس باسقارماسى, پروكۋراتۋرا جانە كريمينالدىق پوليتسيا قىزمەتكەرلەرى ارنايى باردى. ءتارتىپ ساقشىلارىنىڭ جەدەل ءىس-ارەكەتى ناتيجەسىندە ەكى كۇدىكتى قولعا ءتۇستى. قازىرگى تاڭدا «توناۋ» بابى بويىنشا قىلمىستىق ءىس قوزعالىپ, سوتقا دەيىنگى تەرگەۋ امالدارى جۇرگىزىلۋدە. ەلامان قوڭىر. دەرەك: newskaz.ru. سۋرەت: gazeta.a42.ru.