نەپالدا 8 كۇن بويى ءۇيىندى استىندا جاتقان 105-تەگى قاريا ءتىرى تابىلدى

استانا. 4 مامىر. نەپالدا 25 ساۋىردە بولعان جويقىن جەر سىلكىنىسىنىڭ سالدارىن جويۋ جۇمىستارى مەن قۇتقارۋ شارالارى ءالى جالعاسۋدا. اپاتتان كەيىن 8 كۇن ۋاقىت وتكەندە ءوز ءۇيىنىڭ استىندا قالعان 105 جاستاعى قاريا ءتىرى تابىلدى. بۇل تۋرالى NDTV تەلەارناسىنا سىلتەمە جاساپ, lenta.ru حابارلادى. وقيعا كيمتانگ اۋىلىندا بولعان. فانچۋ گەيل (Fanchu Ghale) ەسىمدى ەر ادامنىڭ ءزىلزالا سالدارىنان اياق-قولى عانا جەڭىل جاراقاتتانعان. قازىر ول اسكەري تىكۇشاقپەن اۋرۋحاناعا جەتكىزىلدى. بۇدان بولەك, تاعى ءبىر ۇزاق جاساعان ەر ادامنىڭ ءۇيىندى استىنان امان تابىلعانى انىقتالدى. ريا «نوۆوستي» اقپاراتتىق اگەنتتىگى تاراتقان مالىمەتكە سۇيەنسەك, ونىڭ جاسى 101-دە. سەنبى كۇنى ءوز ءۇيىنىڭ استىنان تابىلعان ول قاريا دا قازىرگى تاڭدا اۋرۋحانادا ەم-دوم قابىلداۋدا. سونداي-اق, كەشە قۇتقارۋشىلار ەلدىڭ سولتۇستىك-شىعىسىنداعى اۋدانداردىڭ بىرىنەن ءبىر ەر جانە ەكى ايەل ادامنىڭ ءتىرى تابىلعانىن حابارلادى. وسىعان دەيىن نەپال بيلىگى ۇيىندىلەر استىنان ءتىرى قالعانداردىڭ تابىلۋى ەكىتالاي دەپ, ۇمىتتەرىن ۇزگەن ەدى. ءتىپتى قۇتقارۋشىلار شالعايداعى ەلدى مەكەندەرگە جەتكەن كەزدە قۇربان بولعانداردىڭ سانى كۇرت ارتۋى مۇمكىن ەكەنىن دە جوققا شىعارمادى. ايتا كەتەيىك, نەپالداعى ماگنيتۋداسى 7,9 باللدى قۇراعان جويقىن ءزىلزالا 25 ساۋىردە بولدى. جەراستى ءدۇمپۋىنىڭ وشاعى ەل استاناسى – كاتماندۋدان سولتۇستىك-باتىسقا قاراي 82 كم. جەردە تىركەلدى. ءدۇمپۋدىڭ تەرەڭدىگى 15 كم.-گە دەيىن جەتكەن. سوڭعى دەرەكتەر بويىنشا, قازا تاپقانداردىڭ سانى 7 200-دەن اسقان. 14 مىڭنان استام ادام ءارتۇرلى دەڭگەيدەگى جاراقات العان. بۇگىندە ءزىلزالا ءالى تىڭشىعان جوق. وتكەن اپتانىڭ سوڭىندا بىرنەشە جەر سىلكىنىسى تىركەلدى. ولاردىڭ ىشىندە ماگنيتۋداسى 6,7 باللدى قۇراعان دۇمپۋلەر دە بولدى. ەلامان قوڭىر. دەرەك: lenta.ru. سۋرەت: AFP.