الاشتىڭ ايماڭداي اقىنى قايىربەك اسانوۆ پەن مەملەكەتتىك سىيلىقتىڭ لاۋرەاتى كۇلاش احمەتوۆا تارازعا قونىس اۋدارعاندا, جاستارمەن بىرگە ءبىز دە سالەم بەرۋگە, ۇلكەندەردىڭ باتاسىن الۋعا شاڭىراعىنا باس سۇعىپ جۇردىك. وتاسقاندارىنا جارتى عاسىر بولعان جۇپتىڭ ءبىر-بىرىنە دەگەن قۇرمەتى, ىزەتى, مەيىرىمى بىزگە دە كوكتەگى كۇندەي شۋاعىن شاشاتىنىن سەزىنەتىنبىز. سوندا عوي, ەسكىرمەيتىن ماحاببات دەگەنىمىز وسى-اۋ ءسىرا, دەپ تارقاسۋشى ەدىك.
سەكسەننىڭ سەڭگىرىنە شىققان قايىربەك اسانوۆ ءالى كۇنگە دەيىن قولىنان قالامىن تاستاعان جوق. قاسيەتتى پوەزياعا بەرگەن سەرتىنەن تايماعان ايتۋلى اقىننىڭ 2023 جىلى «اباي» باسپاسىنان جارىق كورگەن «اي مەن كۇننىڭ ساۋلەسى» اتتى جىر جيناعىن وقىپ وتىرىپ, سۇيەگىنە ءسوز قونعان قالامگەردىڭ جازارى تاۋسىلماعانىنا تاعى دا كوز جەتكىزگەندەي بولدىق.
بىرنەشە تاراۋدان تۇراتىن جاڭا جيناقتىڭ العاشقى ءبولىمى «ساعان عاشىق جۇرەكپەن» دەپ اتالادى. جۇرەگى عازال جىر ءۇشىن جارالعان اقىن ءبىرىنشى بولىمىندە جان-جارىنا دەگەن سارقىلماس ماحابباتتى قارا ولەڭمەن ادىپتەگەن. سەزىم پەرنەلەرىن ءدوپ باسقان اقىن جىرلارى ادام جانىن جىلىتا تۇسەدى. ءتورت اياعىن تەڭ باسقان تارماقتار جاعالاۋدا تۇرعان كىسى جۇرەگىن بىردە ماحاببات ارالىنا, بىردە ماحاببات ايدىنىنا تارتاتىن ماگنيتتىك كۇشكە يە مە دەرسىڭ.
«سەن جايلى ءان, جانىم-اۋ, سالاتىنىم,
سەن جۇرگەن جەر جايقالىپ باراتىنىم.
سەن بولماساڭ ومىردە
بىلەسىڭ بە؟
جان-جارىڭنىڭ قايعىرىپ قالاتىنىن.
جۇرگەنىڭ دە ادەمى ءشاي قايناتىپ,
جىر وقيسىڭ, ءومىردى, ەلدى ويلانتىپ.
بارلىق بايلىق, مانساپتىڭ كەرەگى جوق,
مەنىڭ سەنى تاپقانىم قانداي باقىت!», دەيدى اقىن «سەن ەكەۋمىز» دەپ اتالاتىن ولەڭىندە اعىنان اقتارىلىپ.
وسى ولەڭدەگى تارماقتارعا قاراپ وتىرىپ-اق, اقىننىڭ اياۋلى جارىنا دەگەن سەزىمىنىڭ سارقىلمايتىنىن, ماحابباتىنىڭ ماڭگىلىك ەكەنىن باعامداۋ قيىن ەمەس. سىردىڭ سۋىن كەشىپ ءجۇرىپ ەرجەتكەن اقىننىڭ تالاس جاعالاۋىندا وسكەن جان-جارىنا دەگەن قۇرمەتى قاشان دا بولەك ەكەنىنە يلاناسىڭ. جارتى عاسىردان بەرى جۇرەك وتىنىڭ سونبەگەنىنە, ماڭگىلىك مۋزاسىنا دەگەن ادالدىعىنا ءتانتى بولاسىڭ.
«سەن قۋانساڭ,
مەن دە قاتتى قۋاندىم,
سەن ۇيالساڭ,
مەن دە قاتتى ۇيالدىم.
ەكەۋمىزگە كۇن دە, ءتۇن دە ورتاق قوي,
سوڭىندامىز ەكەۋمىز ءبىر قيالدىڭ.
بىرەۋلەر ءجۇر سىرتىمىزدان ءسوز ەتىپ,
قاتە باسقان كەزىمىزدى كۇزەتىپ.
بارىنە دە شىدايمىز-اۋ,
تەك قانا
كەتپەسە ەكەن ابايسىزدا كوز ءوتىپ», دەيدى اقىن تاعى ءبىر ولەڭىندە جارىنا دەگەن جان جىلۋىن ولەڭىمەن سەزدىرىپ.
جانارىنان مەيىرىم نۇرى سەبەزگىلەگەن اقىن ەشكىمگە كىنا ارتقىسى كەلمەيدى. جۇرەگىنە اۋىر جۇك ارقالاۋعا دا زاۋقى جوق. ويتكەنى ول ءۇشىن ەڭ اۋىر جۇك – قاسيەتتى قارا ولەڭگە دەگەن ادالدىق. پوەزياعا دەگەن تازالىق ونى الدەكىمدەردىڭ قيسىنسىز اڭگىمەسىنە باس اۋىرتۋىنا مۇمكىندىك بەرمەيتىنىن اڭعارۋ قيىن ەمەس. ايتسە دە, سىرت كوزدىڭ سىپسىڭ اڭگىمەسى كەۋدەدە دامىلسىز سوققان جۇرەگىن ارەدىك بولسا دا سىزداتاتىنى اقيقات. ويتكەنى اقىن جۇرەگى قىلدان دا نازىك ەمەس پە؟
ء«بىر بيىكتەن ءبىر بيىك القىندىرىپ,
ءومىر سۇرگىڭ كەلەدى حالقىڭدى ۇعىپ.
اۋىرتپالىق باسسا دا بار ەڭسەنى,
جايدارى بوپ جۇرەسىڭ, جارقىن ك ۇلىپ.
اينالدىرىپ كەيبىرەۋ مازاعىنا,
داق سالادى كىرشىكسىز تازا ارىڭا.
قۇربانى بوپ كەتەيىن ءوزىم عانا,
اۋىرتپالىق تۇسپەسىن قازاعىما», دەپ جىرلاعان اقىننىڭ ۇلتىن, قازاعىن شەكسىز سۇيەتىنىنە ەشكىمنىڭ تالاسى جوق.
قايىربەك اسانوۆتىڭ قارا ولەڭگە, قازاعىنا دەگەن ادالدىعى قاي كەزدە دە مەنمۇندالاپ تۇرادى. توڭىرەگىن تۇگەندەپ جۇرەتىن اقىننىڭ جانارىنان توگىلىپ تۇراتىن شىنايى مەيىرىم كەيىنگى بۋىننىڭ جانىن جىلىتا تۇسەدى. ولەڭىن ءومىرىم دەپ تۇسىنگەن قالامگەردىڭ جازباعان جىرى ءالى كوپ. ويتكەنى ونىڭ جۇرەگىندە ماحاببات, مەيىرىم, قۇرمەت دەگەن ۇعىمدار قاتار ءومىر ءسۇرىپ جاتىر. عۇمىرىن پوەزيا بايتەرەگىنە بايلاعان اقىننىڭ ولەڭسىز ءومىر ءسۇرۋى مۇمكىن ەمەس.
