ماقسات – حالىققا ءمىنسىز قىزمەت كورسەتۋ

حالىقتىڭ تۇرمىسىن جاقسارتۋعا دەگەن ۇمتىلىستان 1998 جىلعى قاڭتاردا ەلىمىزدەگى زەينەتاقى جۇيەسىنە وزگەرىس ەنگىزىلىپ, بۇرىنعى ىنتىماقتى زەينەتاقى جۇيەسىنەن جيناقتاۋشى زەينەتاقى جۇيەسىنە كوشۋ جۇزەگە اسىرىلدى. ۇكىمەتتىڭ قاۋلىسىمەن قۇرىلعان زەينەتاقى تولەۋ جونىندەگى مەملەكەتتىك ورتالىق (زتمو) قازىرگى تاڭدا ىنتىماقتى, جيناقتاۋشى زەينەتاقى جۇيەلەرى مەن مىندەتتى الەۋمەتتىك ساقتاندىرۋ جۇيەسىندە حالىقتى الەۋمەتتىك قورعاۋدى جۇزەگە اسىراتىن ماڭىزدى قۇرىلىمداردىڭ ءبىرى بولىپ تابىلادى. 14 وبلىستا جانە الماتى مەن استانا قالالىق فيليالدارىنان, اۋداندىق جانە قالا­لىق بولىمشەلەردەن تۇراتىن جەرگىلىكتى جەلىسى بار كاسىپورىن جۇيەسىندە بۇگىنگى تاڭدا 3,5 مىڭ بىلىكتى مامان ەڭبەك ەتىپ, كۇن سايىن 15 مىڭعا جۋىق الەۋمەتتىك سالا اياسىنداعى ءارتۇرلى ماسە­لەلەر بويىن­شا ازاماتتاردى قا­بىلدايدى. ءبىزدىڭ كاسىپورىننىڭ قىزمەتىن سيپاتتايتىن جالپى ۇردىستەرى جۇمىس كولەمىنىڭ, الەۋ­مەتتىك تولەمدەردىڭ, قارجى اعىن­دارى مەن حالىققا كورسەتەتىن قىز­مەت تۇرلەرىنىڭ تۇراقتى ءوسۋىن جاتقىزۋعا بولادى. زتمو ارقىلى وتكىزىلەتىن تولەمدەردىڭ نەگىزگى ساناتتارى بويىنشا قارجى اعىن­دارىنىڭ ديناميكاسى 1998 جىلمەن سالىستىرعاندا 32,4 ەسەگە ءوستى جانە 2014 جىلى 2,4 ترلن. تەڭگەدەن استام سومانى قۇرادى. باستاپقى كەزەڭدە مىندەتتى زەينەتاقى جارنالارى بويىنشا كەلىپ تۇسەتىن اقشا قاراجاتتارىن دەربەستەندىرىلگەن ەسەپكە الۋ جانە ولاردىڭ تولەمىن جۇزەگە اسىرۋ ءۇشىن الەۋمەتتىك جەكە كود (اجك) قولدانىلدى, سالىمشىعا اجك بەرۋ ءۇشىن ونىڭ زتمو بولىمشەسىنە جۇگىنۋى قاجەت بولاتىن. ال 2013 جىلدىڭ قاڭتارىنان باستاپ جەكە سايكەستەندىرۋ نومىرلەرى (جسن) نەگىزىندە جەكە تۇلعالاردى بىرىڭعاي ەسەپكە الۋ جۇيەسى ەنگىزىلدى. وتكەن جىلدارداعى كاسىپ­ورىننىڭ باستى جەتىستىكتەرىنىڭ ءبىرى زەينەتاقى مەن جاردەم­اقى الۋشىلاردىڭ ورتالىق­تاندىرىلعان دەرەكقورىن جاساۋ بولىپ تابىلادى, دەرەكقوردى پايدالانۋ رەسپۋبليكامىزداعى بىرەگەي جۇيەنى قۇرۋعا جانە جۇمىستى جاڭا ساپالى دەڭگەيگە كوتەرۋگە مۇمكىندىك بەرەدى. ورتالىقتاندىرىلعان دە­رەك­قور بيۋدجەتتەن قاراجات تۇسكەن كۇنى الەۋمەتتىك تولەمدى قامتاماسىز ەتۋگە, الۋشىنىڭ قالاۋى بويىنشا ەلىمىزدىڭ كەز كەلگەن بانك مەكەمەلەرى ارقىلى زەينەتاقى مەن جاردەماقىنىڭ 41 ءتۇرىن تولەۋدى جۇزەگە اسىرۋعا مۇمكىندىك بەرەدى. قازىرگى تاڭدا, وسىنداي ەكىنشى دەڭگەيدەگى بانكتەردىڭ قاتارىندا 20 بانك بار. كاسىپورىندا الەۋمەتتىك تولەم الۋشىلاردىڭ ەلەكتروندى مۇراعاتى قالىپتاستىرىلىپ, ەلەكتروندى تاعايىنداۋ جۇيەسى ەنگىزىلگەن. اعىمداعى جىلى الەۋمەتتىك تولەم الۋشىلاردىڭ شامامەن 97 پايىزى (بۇل 5,8 ملن. ءىس-قاعازىنا جۋىق) تولەم مولشەرىن قايتا ەسەپتەۋ جانە يندەكستەۋ ەلەكتروندى-تسيفرلى قول قويۋدى پايدالانۋ ارقىلى ەلەكتروندى تۇردە جۇرگىزىلدى. اۆتوماتتاندىرۋدىڭ مۇنداي دەڭگەيىنە قول جەتكىزۋ «ە-ماكەت» ەلەكتروندى تاعايىنداۋ جۇيەسىن ەنگىزۋدىڭ ناتيجەسىندە مۇمكىن بولىپ وتىر. تولەمدەردى ەلەكتروندى تاعايىنداۋ قاعاز قۇجات اينالىمىن ازايتۋدى, تاعايىنداۋ ۇدەرىسىن تەزدەتۋدى, زەينەتاقى مەن جاردەماقى تاعايىنداۋ جانە تولەۋ كەزىندە مەملەكەتتىك قىزمەت كورسەتۋ ساپاسىن ارتتىرۋدى قامتاماسىز ەتەتىن قولدانىستاعى ءتيىمدى تەحنولوگيا. 2007 جىلدان باستاپ ۇكىمەت­پەن مەملەكەتتىك قىزمەت ءتىزىلى­مىن قالىپتاستىرۋ, ولاردى ۇسىنۋ ءراسىمىن وڭتايلاندىرۋ, «ەلەكتروندى ۇكىمەتتى» ەنگىزۋ, مەملەكەتتىك قىزمەتتەردى ەلەكتروندى فورماتقا كوشىرۋ, مەم­لەكەتتىك ورگانداردىڭ اقپا­راتتىق جۇيەلەرىن بىرىكتىرۋدەن تۇراتىن شارالار كەشەنى ىسكە اسىرىلدى. بۇگىنگى كۇنى «ەلەكتروندى ۇكىمەت» پورتالى ارقىلى ەلەكتروندى مەملەكەتتىك قىزمەتتىڭ 12 ءتۇرى كورسەتىلەدى. حالىقتى الەۋمەتتىك قورعاۋ سالاسىنداعى ەلەكتروندى قىزمەت كورسەتۋ جۇيەسىن ودان ءارى دامىتۋ بارىسىندا 2012 جىلدان باستاپ الەۋمەتتىك تولەمدەردى قاشىقتىقتان ەلەكتروندى تاعاي­ىنداۋ جۇيەسىن ەنگىزۋگە ىق­پالىن تيگىزدى. 2006 جىلدىڭ شىلدەسىنەن باس­تاپ زتمو بازاسىندا بىرىڭعاي ەسەپ ورتالىعى قۇرىلدى, بۇل قادامنىڭ يگىلىكتى اسەرى كوپ بولعانىن ايتا كەتكەن ءجون. اتاپ ايتقاندا, ءمىن­دەتتى زەينەتاقى جارنالارىن اۋدارۋ پروتسەدۋراسى جەڭىلدەتىلدى ءارى وڭتايلاندىرىلدى, سالىم­شىلاردىڭ تولەمدەر قوزعالىسىن رەتكە كەلتىرىپ, قۇ­پياسىن قام­تاماسىز ەتتى, جۇمىس بەرۋشىلەردىڭ مىندەتتى زەينەتاقى جارنالارى بويىنشا بەرەشەگىن ازايتتى, جيناقتاۋشى زەينەتاقى ءجۇ­يەسىنىڭ سۋبەكتىلەرىن قادا­عالاۋدىڭ تيىمدىلىگىن ارتتىردى, قىزمەتكەرلەرگە جيناقتاۋشى زەينەتاقى قورىن ەرىكتى تۇردە تاڭداۋىنا جۇمىس بەرۋشىلەردىڭ اكىمشىلىك ىقپال ەتۋ مۇمكىندىگىن ازايتتى. ناتيجەسىندە, مىندەتتى زەينەتاقى جارنالارىن ەسەپكە الۋ, سونداي-اق, جۇمىس بەرۋشىدەن كەلىپ تۇسكەن قاراجاتتى جيناقتاۋشى زەينەتاقى قورلارىنا ماقساتتى تۇردە ەسەپكە قوسۋ تارتىپكە كەلتىرىلدى. 2013 جىلعى شىلدە ايىندا «مجزق» اق بازاسىندا ءبىرىڭ­عاي جيناقتاۋشى زەينەتاقى قورىنىڭ قۇرىلۋىنا بايلانىس­تى 9 جيناقتاۋشى زەينەتاقى قورىنىڭ زەينەتاقى اكتيۆتەرى مەن مىندەتتەمەلەرىن زتمو ارقىلى بىرىڭعاي جيناقتاۋشى زەينەتاقى قورىنا بەرۋ جۇزەگە اسىرىلدى. ال كاسىپورىن 2014 جىلدىڭ قاڭتارىنان باستاپ, «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭعا سايكەس ەنگىزىلگەن مىندەتتى كاسىپتىك زەينەتاقى جارنالارىن (مكزج) ەسەپكە الۋدى جۇرگىزۋدە. سونىمەن قاتار, زتمو قونىس اۋدارعان نەمەسە قايتىس بولعان سالىمشىلار تۋرالى اقپاراتتى, سونداي-اق, بىرىڭعاي جيناقتاۋشى زەينەتاقى قورىنان زەينەتاقى جيناقتارىنىڭ زاڭدى تۇردە تولەنۋىن قامتاماسىز ەتۋ جانە الاياقتىق ارەكەتتەرگە جول بەرمەۋ ماقساتىندا زەينەتاقى جيناقتارىنىڭ تولەمىنە قۇقىعى بار سالىمشىلار بويىنشا مالىمەتتەردى كۇن سايىن بجزق-عا جولدايدى. زتمو باعدارلامالىق-اقپا­راتتىق پلاتفورماسى ەلىمىزدىڭ الەۋمەتتىك قامسىزداندىرۋ جۇيەسى قىزمەتىنىڭ اتقارۋشىسى, ءبىرتۇتاس قارجىلىق-ەسەپ ءجا­نە تەحنولوگيالىق بولىگىنە اقپا­راتتىق قولداۋ جاساۋدى قام­تاماسىز ەتەتىن دەنساۋلىق ساق­­تاۋ جانە الەۋمەتتىك دامۋ مينيس­ترلىگىنىڭ ەڭ باستى ينستيتۋتى بولىپ تابىلادى. ءبىزدىڭ اۆتوماتتاندىرىلعان اقپاراتتىق جۇيەمىز 2002 جىلدان باستاپ زەينەتاقى جارنالارىنىڭ, الەۋمەتتىك اۋدارىمداردىڭ ورتا­لىقتاندىرىلعان جانە دەربەس­تەندىرىلگەن ەسەبىن, رەسپۋبليكالىق بيۋدجەت, مەملەكەتتىك الەۋمەتتىك ساقتاندىرۋ قورى قاراجاتى ەسەبىنەن الەۋمەتتىك تولەم تۇرلەرىن جۇزەگە اسىرۋدى, بارلىق جيناقتالعان دەرەكتەردى تالداپ قورىتۋدى, ءوز قۇزىرەتى شەگىندە تولىق جانە دايەكتى اقپارات الۋدى جانە بەرۋدى ناقتى ۋاقىت رەجى­مىندە قامتاماسىز ەتەتىن رەس­پۋب­ليكامىزداعى العاشقى مەملەكەتتىك اقپاراتتىق جۇيە بولىپ وتىر. جانە زتمو اۆتو­ماتتاندىرىلعان اقپاراتتىق جۇيەسى جاقىن شەتەلدەردىڭ ىشىندە تۇڭعىش رەت ءبىزدىڭ ەلىمىزدە قولعا الىنىپ, ەندى-ەندى عانا قازاق­ستاندىق تاجىريبەنى تمد ەلدەرى ءوز كادەلەرىنە جاراتۋعا كىرىستى. ەلىمىزدە الەۋمەتتىك-ەڭ­بەك سالاسىنىڭ بىرىڭعاي اقپا­راتتىق جۇيەسىنىڭ قۇرىلۋى الداعى ۋاقىتتا مەملەكەتتىك رەتتەۋدىڭ تيىمدىلىگىن ارتتىرۋعا, ۇسىنىلاتىن الەۋمەتتىك قىزمەت ساپاسىنىڭ دەڭگەيىن جاقسارتۋعا, تالدامالى دەرەكتەردى پايدالانۋدى وڭتايلاندىرۋعا, «ە-ۇكىمەت» جۇيەسى شەڭبەرىندە ءتيىمدى ىقپالداسۋدى جانە جۇمىس ىستەۋدى قامتاماسىز ەتۋگە مۇمكىندىك بەرەدى. وسىلايشا, 2011 جىلدان باستاپ حالىققا اقپاراتتىق قىزمەت كورسەتۋدى جاقسارتۋدا زتمو بازاسىندا ازاماتتارعا تەلەفون, سمس-حابارلاما, ەلەكتروندى پوشتا جانە WEB پورتال ارقىلى قىزمەت كورسەتەتىن اقپاراتتىق-انىقتامالىق بايلانىس ورتالىعى جۇمىس ىستەي باس­تادى. كورسەتىلەتىن مەملەكەتتىك قىز­مەتتەردى جاڭعىرتۋ ماقساتىندا 2015 جىلعى 12 ناۋرىزدا حقو, زتمو جانە «قازپوشتا» اق اراسىندا ءۇش جاقتى مەموراندۋمعا قول قويىلدى, وعان سايكەس شالعاي ەلدى مەكەندەردىڭ تۇر­عىندارىنا مەملەكەتتىك قىزمەت­تىڭ قولجەتىمدىلىگىن ارتتىرۋ ماقساتىندا زەينەتاقى تولەۋ جونىندەگى مەملەكەتتىك ورتالىق قىزمەتكەرلەرى مەن «قازپوشتا» اق ماماندارىنان موبيلدىك توپتار قۇرىلدى. موبيلدىك توپتار 16 ناۋرىزدان باستاپ شالعاي ەلدى مەكەندەرگە بارۋدى باستادى. ەسەپتى كەزەڭدە موبيلدىك توپتاردىڭ قابىلداۋىنا زەينەتاقى مەن جاردەماقى تاعايىنداۋ جانە كونسۋلتاتسيا الۋ ماسەلەلەرى بويىن­شا شالعاي ەلدى مەكەندەردىڭ 6 160 ازاماتى جۇگىندى. سونى­مەن قاتار, ءبىز مۇگەدەكتەر ءۇشىن ورتالىقتاندىرىلعان ونەر­كا­سىپتىك بانكتى پايدالانۋعا ەنگىزدىك, بۇل حالىقتىڭ وسى ساناتىن ەسەپكە الۋدى جۇيەلەندىرۋ, مۇمكىندىگى شەكتەۋلى ءار ادامنىڭ مۇقتاجدىعى تۋرالى تولىق اقپارات الۋ, مۇگەدەكتەردى وڭالتۋ باعدارلامالارىن ىسكە اسىرۋعا قا­جەتتى بيۋدجەتتىك قاراجاتتى دۇرىس جوسپارلاۋعا مۇمكىندىك بەردى. ءبىرجان ءجۇنىسوۆ, زەينەتاقى تولەۋ جونىندەگى مەملەكەتتىك ورتالىقتىڭ باس ديرەكتورى.