قازىرگى تاڭدا وڭىردەگى 26 كوللەدجدە 22012 ستۋدەنت ءبىلىم الادى. سونىڭ ىشىندە 89 ماماندىق, 129 بىلىكتىلىك بويىنشا ەڭبەك نارىعىنا قاجەتتى ماماندار ءبىلىم السا, 15 كوللەدجدە 3 955 ستۋدەنتتەن 24 ماماندىق, 29 بىلىكتىلىك بويىنشا جۇمىسشى كادرلارى دايارلانىپ جاتىر.
ماڭعىستاۋ وبلىستىق ءبىلىم باسقارماسى تەحنيكالىق جانە كاسىپتىك ءبىلىم ءبولىمىنىڭ باسشىسى جانيا وڭالباەۆانىڭ ايتۋىنشا, جۇمىسشى, ەڭبەك ادامىن دارىپتەۋ ماقساتىندا وڭىرلىك ءىس-شارالار جوسپارى وبلىس اكىمىنىڭ وكىمىمەن بەكىتىلدى. سونداي-اق جوسپارعا مەملەكەتتىك ورگاندار, جۇمىس بەرۋشىلەر مەن ءبىلىم بەرۋ مەكەمەلەرى اراسىندا وتكىزىلەتىن 112 ءىس-شارا ەنگىزىلدى.
ءىس-شارالار جوسپارىن جۇزەگە اسىرۋ ءۇشىن جۇمىسشى توبى قۇرىلىپ, مەديا-جوسپار جاسالدى.
– وسى باعىتتا كەڭ كولەمدە اقپاراتتىق-ءتۇسىندىرۋ جۇمىستارى باستالدى. جوسپاردا 2025–2026 جىلدارى وقۋ-زەرتحانالىق عيمارات, ءىت hub اشۋ, حالىقارالىق سالالىق اككرەديتتەۋدەن ءوتۋ, جۇمىس بەرۋشى قاراجاتى ەسەبىنەن قۇزىرەتتىك ورتالىقتارىن اشۋ, جۇمىس بەرۋشىلەردىڭ ناقتى تاپسىرىسى بويىنشا ماقساتتى ءبىلىم بەرۋ تاپسىرىسىن ۇلعايتۋ, «سۋ مەن جابدىقتاۋ جانە سۋ بۇرۋ جۇيەلەرىنىڭ تازارتۋ قۇرىلىستارىن پايدالانۋ», «گيدروگەولوگيا جانە ينجەنەرلىك گەولوگيا» سىندى ەكى جاڭا ماماندىق اشۋ, كولىك, قىزمەت كورسەتۋ, قۇرىلىس سالالارى بويىنشا ستۋدەنتتىك جاساق قۇرۋ ءىس-شارالارى جوسپارلاندى, – دەدى ج.وڭالباەۆا.
جاقىندا وڭىردە «ادال ەڭبەك – ادال تابىس» تاقىرىبىندا «جۇمىسشى ماماندىقتارى جىلى» سالتاناتتى تۇردە اشىلدى. ەندى جۇمىسشى ماماندىعىن قولداۋعا قاتىستى ءىس-شارالار ءتۇرلى دەڭگەيدەگى اقپارات قۇرالدارى ارقىلى جاريالانىپ وتىرادى. بۇل – جاستاردىڭ جانە ازاماتتاردىڭ بارلىق مۇددەلى ساناتتارىنىڭ جۇمىسقا ورنالاسۋ, بىلىكتىلىگىن ارتتىرۋ جانە كاسىبي ءوسۋ ءۇشىن قولجەتىمدى مۇمكىندىكتەر تۋرالى كەڭىنەن حاباردار بولۋىن قامتاماسىز ەتەدى.
– ورتا مەكتەپتەردە كاسىبي باعدار بەرۋ كابينەتتەرى جاساقتالادى. سونىڭ اياسىندا كوللەدجدەر تاراپىنان جاڭا جوبالار ىسكە اسادى. وسى ءىس-شارالاردىڭ بارلىعى جۇمىس بەرۋشىلەر, ءبىلىم بەرۋ مەكەمەلەرى مەن جاستار اراسىندا بەرىك بايلانىس ورناتۋعا, جۇمىسشى كاسىپتەرىنىڭ بەدەلىن ارتتىرۋعا, سونداي-اق ماڭعىستاۋ وبلىسىندا جاستاردىڭ جۇمىسقا ورنالاسۋى مەن مانساپتىق ءوسۋى ءۇشىن مۇمكىندىكتەردى جاقسارتۋعا كومەكتەسەدى, – دەدى ج.وڭالباەۆا.
«جۇمىسشى ماماندىقتارى جىلى» تەك ادەمى ءىس-شارالاردىڭ ەمەس, جۇمىسشىلار مەن ستۋدەنتتەر ءۇشىن, سونداي-اق جۇمىسقا ورنالاسامىن, بىلىكتىلىگىمدى ارتتىرامىن دەگەندەر ءۇشىن شىن مانىندە تابىستى بولادى دەپ سەنەمىز.
ماڭعىستاۋ وبلىسى
