ء«بىز كەلگەن شيكىزاتتى, شىقققان ءونىمدى تەكسەرىپ وتىرامىز. ول ءۇشىن كەرەكتى قۇرىلعىلارمەن جابدىقتالعان لابوراتوريامىز بار. ءونىمنىڭ جارامدىلىق مەرزىمى 50 جىلعا جەتەدى. قازىر تەمىرگە قاراعاندا كورروزياعا الدەقايدا ءتوزىمدى پلاستيكالىق قۇبىرلارعا سۇرانىس كوپ. اسىرەسە جەراستى سىلتىلەۋ ارقىلى الىناتىن ۋرانعا قاجەتتى پوليۆينيلحلوريد قۇبىرلارىنا تاپسىرىس كوپ تۇسەدى. تەمىرمەن سالىستىرعاندا مۇنداي قۇبىرلاردىڭ توزىمدىلىگى ءتورت ەسە جوعارى. بۇرىنعىعا قاراعاندا باعاسى دا ارزان, تاسىمالداۋ دا وڭاي», دەيدى كاسىپورىننىڭ ينجەنەر-تەحنولوگى مەيىربەك كەمالوۆ.
ءوندىرىس ورنى شيكىزات ۇنتاعىن قىتايدان الدىرادى. وعان كەرەكتى ءتۇرلى قوسپا تۇركيا, رەسەي مەن ءوز ەلىمىزدەن تابىلىپ وتىر. ال پوليەتيلەننەن جاسالاتىن ماتەريالدى رەسەيدەن يمپورتتايدى. بۇل تاراپتا سول مەملەكەتتەگى «سيبۋر» كومپانياسىمەن بايلانىس جولعا قويىلعان. فيليال ديرەكتورىنىڭ ورىنباسارى ارمان ابدىقادىروۆتىڭ ايتۋىنشا, كاسىپورىن زاۋىتتارى الماتى وبلىسى مەن وڭتۇستىكتەگى سارىاعاش وڭىرىندە دە جۇمىس ىستەپ تۇر. جەتىسۋداعى ءوندىرىس تسەللوفان مەن پاكەت شىعارسا, وڭتۇستىكتەگى زاۋىت جىلىجايعا كەرەكتى ماتەريالدار وندىرەدى. ال شيەلىدەگى ءوندىرىس وسى اۋدان مەن كورشىلەس تۇركىستان وبلىسىنداعى سوزاق اۋدانىنداعى ۋران ءوندىرىسىن قۇبىرمەن قامتاماسىز ەتىپ وتىر.
زاۋىتتا جەلىنىڭ ەكەۋى پوليەتيلەن, تاعى ەكەۋى پوليۆينيلحلوريد قۇبىرلارىن شىعارادى. ءوندىرىس 100-دەن اسا ادامدى جۇمىسپەن قامتىپ وتىر. ءبارى دە جەرگىلىكتى تۇرعىندار. ءبىز بارعاندا سولاردىڭ ءبىرى ەرمەك وتەتىلەۋوۆ قوندىرعىنى كەزەكتى تاپسىرىس بويىنشا ءونىم شىعارۋعا دايىنداپ جاتىر ەكەن. قۇبىردىڭ ۇزىندىعى, ديامەترى وسى ارادان بەلگىلەنەدى. قوندىرعىدا بەلگىلەنگەن ولشەمدەرگە ساي ونىڭ قالىڭدىعى قالىپتاسادى. پوليۆينيلحلوريد قۇبىرلارىن ءبىر-بىرىنە جالعاۋ ءۇشىن ويما جاسايتىن توكار قۋاندىق ءاشىم – كاسىپورىنداعى جاس ماماننىڭ ءبىرى. وسىعان دەيىن استانا قالاسىندا 2 جىل جۇمىس ىستەگەن قۋاندىق جاستار جولاي بەرمەيتىن ماماندىقتى يگەرىپ, زاۋىتقا ءبىراز تاجىريبە جيناقتاپ كەلىپتى.
«قاتارلاستارىمنىڭ كوبى جۇمىس جوقتىعىن سىلتاۋ قىلىپ, بوس ءجۇر. ىزدەنسەڭ, تالاپتانساڭ قاي كاسىپتى دە مەڭگەرۋگە بولادى. مىسالى, قازىر مەنىڭ جانىما تاعى ءبىر توكار كەرەك. بۇگىندە جاستاردىڭ وندىرىسكە قاجەتتى ماماندىقتاردى يگەرۋىنە بار جاعداي جاسالىپ جاتىر. زاۋىتتا جۇمىسقا كەلگەن ادامدى قايتا مامانداندىرۋعا دا باسا كوڭىل بولىنگەن. قاتارلاستارىم وسى مۇمكىندىكتى پايدالانسا ەكەن», دەيدى جاس مامان.
جەلىدەن جاڭا شىققان ءونىمدى مۇزداتۋدىڭ دا ءوز قىر-سىرى بار. بۇل كاسىپپەن وندىرىستەگى جالعىز مامان سەرگەي گوفمان اينالىسادى.
كاسىپورىندا وندىرىلەتىن پوليەتيلەن قۇبىرلارىنىڭ ديامەترى ءارتۇرلى. سۋ مەن گاز تارتۋعا 50-630 مم-گە دەيىنگى قۇبىرلار پايدالانىلادى. وندىرىستىك ماقساتتاعى قۇبىردىڭ ديامەترى 63-225 مم ارالىعىندا.
زاۋىت قازىر «قازاتومونەركاسىپ» كومپانياسىنان بولەك «بايكەن U», «سەمىزباي U», «كاتكو» بك», «رۋ-6», «قوراسان U», «ينكاي» بك», «زارەچنوە» بك», «ۆولكوۆگەولوگيا», «اقمەشىت-مەليوراتور», ء«سات سەرۆيس», «التىن ايدارلى» جانە «باق-بەرەكە» كاسىپورىندارىمەن تىعىز جۇمىس ىستەيدى.
«جىلىنا 8 مىڭ توننا پوليۆينيلحلوريد, 4 مىڭ توننا پوليەتيلەن قۇبىرى شىعارىلادى. قازىر وسى قۋاتىن تولىق پايدالانىپ وتىرمىز. ودان بولەك, جەلىلەردى جاڭعىرتۋعا دا باسا ءمان بەرىلەدى. ويتكەنى بۇرىنعى كورسەتكىشتى مالدانىپ, ءسال تۇرىپ قالساڭ باسەكە تالابىنا شىداس بەرە المايسىڭ. سوندىقتان قوندىرعى جاڭارتىپ, مامانداردى ازىرلەۋ ءىسى ۇزدىكسىز جۇرگىزىلەدى. وندىرىستە سەس تالاپتارى قاتاڭ ساقتالىپ, جۇمىسشىلارعا قاجەتتى ءسۇت ونىمدەرى ۇزبەي بەرىلىپ كەلەدى», دەيدى فيليال ديرەكتورىنىڭ ورىنباسارى ارمان ابدىقادىروۆ.
ەسكە سالا كەتەيىك, بىلتىر جەتىسۋ وبلىسىنا سۋ, اقتوبەگە گاز قۇبىرلارىن جەتكىزگەن. «كەلىسىم بويىنشا ءونىمدى ءوزىمىز جەتكىزەتىندىكتەن ارنايى اۆتوپاركىمىز بار. قازىر ونداعى تەحنيكالاردى جاڭارتۋ قولعا الىنىپ جاتىر. حالىقارالىق تالاپتارعا ساي ءونىم ءوندىرىپ كەلە جاتقان كاسىپورىن ءتۇرلى بايقاۋلاردان دا لايىقتى جۇلدە ەنشىلەپ ءجۇر», دەيدى كومپانيا وكىلى.
قىزىلوردا وبلىسى,
شيەلى اۋدانى
