پرەزيدەنت ق.توقاەۆتىڭ ىشكى ءتۋريزمدى, جولاۋشىلار اۋە تاسىمالىن دامىتۋ, اۋە كولىگى ينفراقۇرىلىمىن جاڭعىرتۋ جونىندەگى تاپسىرمالارى اياسىندا بىرقاتار ماڭىزدى جاڭعىرۋ ءجۇردى. 2024 جىلى ءىرى حابتاردى دامىتۋ ماقساتىندا الماتى, شىمكەنت, قىزىلوردا قالالارىندا جولاۋشىلار تەرمينالىنىڭ وتكىزۋ قابىلەتى ۇلعايدى. سونداي-اق 2025 جىلى زايسان, كاتونقاراعاي كۋرورتتىق ايماقتارىمەن بىرگە كەندىرلىدە جاڭا اۋەجاي سالۋ تۋرالى تاپسىرما بەرۋى دە ايماقتىڭ اسا ماڭىزدىلىعىن بىلدىرەدى. ءسويتىپ, مەملەكەت باسشىسىنىڭ تاپسىرماسىنا وراي, كەندىرلى كۋرورتتىق ايماعىنان 13 شاقىرىم جەردەن جاڭا اۋەجايدىڭ قۇرىلىسى باستالدى. كولىك مينيسترلىگىنىڭ ايتۋىنشا, جوبانىڭ ىسكە اسىرىلۋى وڭىرلەردەگى ەكونوميكانىڭ دامۋىنا تىڭ سەرپىن بەرىپ, وتاندىق, شەتەلدىك تۋريستەر اعىنىن ارتتىرۋعا, جەرگىلىكتى تۇرعىنداردى قوسىمشا جۇمىس ورىندارىمەن قامتاماسىز ەتۋگە سەپتىگىن تيگىزەتىن بولادى.
جاڭاوزەن قالاسىنان 70 شاقىرىم قاشىقتىقتاعى كەندىرلى جەرى – كاسپي تەڭىزىنىڭ جايداق جاعالاۋى. ءتۋريزمدى دامىتۋدى باستى باعدار ەتكەن وڭىردە كەندىرلىنىڭ گەوگرافيالىق ورنالاسۋى مەن اق قۇم, التىن جاعالاۋلى تابيعاتى كۋرورتتىق, تۋريستىك قىزىعۋشىلىققا يە بولاتىنى انىق. كەندىرلىدە حالىقارالىق كۋرورت اشۋ ماقساتىندا ارنايى باعدارلاما جاساقتالىپ, 40 مىڭ تۇرعىنعا مەكەن بولاتىن جاڭا قالانىڭ باس جوسپارى جاسالدى. جوبا بويىنشا قونۋ جولاعى بار اۋەجاي, سۋ تۇشىتاتىن زاۋىت, ەلەكتر ستانساسى, تازالاۋ قوندىرعىلارى, جىلىجايلار, اكىمشىلىك, ساۋدا-ساتتىق عيماراتتارى, سونداي-اق جول, گاز قۇبىرى, ەلەكتر جەلىسى سىندى ينفراقۇرىلىمدىق قاجەتتىلىكتەردى تولىققاندى تارتىپ, جاڭاوزەن – كەندىرلى – تۇرىكمەنستان تاس جولىن قايتا قۇرىلىمداۋ, جول بويى سەرۆيستىك قىزمەتتەر كورسەتۋدى ۇيىمداستىرۋ, تۇرعىندارعا قاجەتتى الەۋمەتتىك نىساندار ورناتۋ جوسپارلانعان. ايماقتا بالىق شارۋاشىلىعى جولعا قويىلادى. 4, 5 جۇلدىزدى قوناقۇيلەر, شيپاجايلار مەن ساۋىقتىرۋ لاگەرلەرى, اكۆاپاركتەر, ايلاقتار, حالىقارالىق دەڭگەيدە سپورتتىق ءىس-شارالار وتكىزۋگە ىڭعايلى ستاديون, مادەني كەشەندەر مەن تۇرعىن ۇيلەر سالىناتىن بولادى.
جاڭاوزەن قالاسىمەن بىرگە كەندىرلى تۋريستىك ايماعىن اۋىزسۋمەن قامتاماسىز ەتۋ ماقساتىندا توقماق مۇيىسىندە تاۋلىگىنە 50 مىڭ تەكشە مەتر سۋ تۇشىتاتىن زاۋىت قۇرىلىسى مەن 14 قوسالقى عيمارات قۇرىلىسى ءجۇرىپ جاتىر. جوسپارلانعان بارلىق جوبالار جۇزەگە اسقان كەزدە كەندىرلى كەلەشەگى كەلىستى شاھارعا اينالماق.
ماڭعىستاۋ وبلىسى
