قازاقتان شىققان تۇڭعىش كاسىبي ديريجەر شامعون قاجىعاليەۆ قايتىس بولدى

استانا. 3 مامىر. بۇگىن قازاقتان شىققان تۇڭعىش كاسىبي ديريجەر, پەداگوگ, دومبىراشى, كسرو حالىق ءارتىسى شامعون قاجىعاليەۆ قايتىس بولدى. بۇل تۋرالى zakon.kz حابارلادى. داڭقتى ديريجەردىڭ قازاسى تۋرالى تاتتىمبەت اتىنداعى ونەر كوللەدجىنىڭ ءبولىم مەڭگەرۋشىسى سەرجان مۇسايىن facebook-تەگى پاراقشاسىنا: «وتە تالانتتى ادام, كسرو حالىق ءارتىسى, پروفەسسور, قازاقستان رەسپۋبليكاسى مەملەكەتتىك سىيلىعىنىڭ يەگەرى, «پاراسات» وردەنىنىڭ كاۆالەرى شامعون قاجىعاليەۆ دۇنيەدەن ءوتتى», – دەپ جازعان. شامعون ساعاددين ۇلى قاجىعاليەۆ 1927 جىلدىڭ 15 ماۋسىمىندا باتىس قازاقستان وبلىسىنىڭ ۇيالىقۇم (قازىرگى جاڭعالا اۋدانى) اۋىلىندا دۇنيەگە كەلدى. اتا-اناسىنان ەرتە ايىرىلعان ول بالالار ۇيىندە تاربيەلەنگەن. جاڭاقازان اۋىلىنداعى كيروۆ اتىنداعى قامىش-سامار مەكتەبىندە ءبىلىم الدى. 10 جاسىندا دومبىرادان وبلىستىق وليمپيادادا, ال 20 جاسىندا دومبىراشىلاردىڭ رەسپۋبليكالىق بايقاۋىندا لاۋرەات اتاندى. 1950 جىلى الماتىداعى قۇرمانعازى اتىنداعى قازاق كونسەرۆاتورياسىنىڭ حالىق اسپاپتارى فاكۋلتەتىن ءتامامدادى. شامعون ساعاددين ۇلىنىڭ جەتەكشىلىگىمەن وركەستر م.گلينكي, ل.بەتحوۆەن, ۆ.موتسارت, گ.بەرليوز, پ.چايكوۆسكي, س.راحمانينوۆ, س.پروكوفەۆ, ا.حاچاتۋريان, د.شوستاكوۆيچ, ا.جۇبانوۆ, م.تولەباەۆ, گ.جۇبانوۆا, س.مۇحامەدجانوۆ سىندى اتاقتى كومپوزيتورلاردىڭ شىعارمالارىن ورىندادى. ەلامان قوڭىر. دەرەك, سۋرەت: zakon.kz.