جاۋاپتى قۇرىلىم وكىلدەرى داريا بويىن ۇدايى باقىلاۋدا ۇستاپ وتىر. «2024–2025 جىلدارداعى قىسقى-كوكتەمگى كەزەڭدە سىرداريا وزەنىندەگى سۋدى قاۋىپسىز وتكىزۋ» جوسپارىنا ساي ارنا دەڭگەيىن تومەندەتۋ ماقساتىندا ماگيسترالدى كانالدار مەن كولدەر جۇيەسىنەن سۋ الۋ كەستەلەرى ازىرلەندى. وبلىس اۋماعىنداعى سۋ باسۋ قاۋپى بار 29 ايماقتا 167,3 مىڭعا جاقىن تۇرعىنى بار 36 ەلدى مەكەن ورىن تەپكەن. ولاردىڭ قاۋىپسىزدىگىن قورعاۋعا 135 مەكەمە بەكىتىلگەن. 410 ارنايى تەحنيكا, 1 234 ادام ساقاداي ساي تۇر.
سۋ تاسقىنىنا قارسى ماتەريالدىق-تەحنيكالىق قور رەتىندە 129,7 توننا جانارماي, 95 110 دانا قاپ پەن باسقا دا ماتەريالدار ازىرلەندى. ايتقان جەردەن اۋلاق, اياقاستى سۋ باسا قالعان جاعدايدا 61 ەۆاكۋاتسيالىق جيناقتاۋ, 71 قابىلداۋ بەكەتى دايىن.
«قازگيدرومەت», «قازسۋشار» رمك قىزىلوردا فيليالدارى سىرداريا وزەنى ارناسىنداعى 10 سۋ بەكەتى مەن 4 سۋ تورابىنداعى سۋ دەڭگەيىنە كۇندەلىكتى مونيتورينگ جۇرگىزىپ, جەرگىلىكتى اتقارۋشى ورگاندار, سۋ شارۋاشىلىعى ماماندارى تاۋلىك بويى كەزەكشىلىك ەتەدى.
وبلىستىق جۇمىلدىرۋ دايىندىعى, اۋماقتىق جانە ازاماتتىق قورعانىس باسقارماسىنىڭ باسشىسى مارات قۇرمانباەۆتىڭ ايتۋىنشا, «قازاۆياقۇتقارۋ» اكتسيونەرلىك قوعامىمەن جاسالعان كەلىسىمشارتقا سايكەس, 2 تىكۇشاق دايىندىققا كەلتىرىلىپ, مۇز جاراتىن ارنايى مامانداندىرىلعان مەكەمەمەن كەلىسىمشارت جاسالعان.
بيىلعى قىس جىلى بولىپ تۇر. داريا ارناسىنداعى مۇز دا جىلداعىدان الدەقايدا جۇقا. ناۋرىز ايىندا مۇز كوبەسى سوگىلە باستايدى. سۋ شارۋاشىلىعى نىساندارىنىڭ تەحنيكالىق جاعدايىنا جاسالعان زەرتتەۋ ناتيجەسىندە وبلىس بيۋدجەتىنەن قارجى ءبولىنىپ, ارال اۋدانى اۋماعىندا 2, جالاعاش اۋدانىندا 1 ۋچاسكە جوندەلدى. قىزىلوردا قالاسى مەن اۋدانداردا كاسىپكەرلەر دەمەۋىمەن 20 نىسانعا قالپىنا كەلتىرۋ جۇمىستارى جۇرگىزىلدى.
ماماندار جازدا ءار تامشىسى التىنعا اينالاتىن داريا سۋىن ءتيىمدى پايدالانۋ باعىتىندا جۇمىستار قولعا الىنعانىن ايتادى. ارناعا سىيماعان ارتىق سۋ كولدەرگە جىبەرىلىپ, كوپ جىلدان بەرى ورتايىپ تۇرعان ايدىندار الابى ءبىرشاما ۇلعايدى. قازىر شاردارا سۋقويماسىنا ءتۇسىپ جاتقان سۋ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ وسى ۋاقىتقا بولجاعان كولەمىنەن 130%-عا ارتقان. وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى سەرىك سەرماعانبەتوۆتىڭ ايتۋىنشا, وبلىس شەكاراسىنا سەكۋندىنا تۇسكەن 500 تەكشە مەتر سۋدىڭ 365 تەكشە مەترى قىزىلوردا سۋ تورابىنان ءوتىپ جاتىر. وسى سۋدىڭ 140 تەكشە مەترى كىشى ارال تەڭىزىنە قۇيادى.
«وسىنىڭ وزىنەن وڭىردەگى كولدەرگە بيىل سۋ جاقسى جەتىپ جاتقانىن اڭعارۋعا بولادى. مىسالى, قامىستىباس, اقشاتاۋ كولدەر جۇيەسىنە 1 ملرد تەكشە مەترگە جۋىق سۋ باردى», دەيدى باسقارما باسشىسى.
مەملەكەت باسشىسىنىڭ سۋ شارۋاشىلىعى ماسەلەسىمەن مۇقيات اينالىسۋ, كوكتەمگى قارعىن سۋدى جيناپ, ونى ديقانداردىڭ قاجەتىنە جاراتۋ ءۇشىن گيدرولوگيا بەكەتتەرىن جوندەپ, جاڭعىرتۋ باعىتىنداعى تاپسىرماسىنا وراي وبلىستا بىرقاتار جۇمىس اتقارىلدى. «سۋ سالاسىن دامىتۋدىڭ 2024–2028 جىلدارعا ارنالعان كەشەندى جوسپارىنا» ايماقتى سۋمەن قامتاماسىز ەتۋگە باعىتتالعان 112 جوبا ەنگىزىلىپ وتىر.
ايماقتاعى ستراتەگيالىق ماڭىزى بار «قىزىلوردا», «ايتەك» سۋ توراپتارى كۇردەلى جوندەۋدەن ءوتىپ, «كوكارال» بوگەتى نازارعا الىندى. رەسپۋبليكالىق بيۋدجەتتەن بولىنگەن قارجىعا جاڭاقورعان اۋدانىنىڭ كەلىنتوبە ماگيسترالدى كانالىنا سۋ جەتكىزەتىن 6,1 شاقىرىم اينالما ارنا قازىلدى.
ءار كوكتەم, جازدا تامشى سۋعا زار بولىپ قالاتىن داريا ەتەگىندەگى ايماقتا 31 مىڭ گەكتار سۋارمالى, 120 مىڭ گەكتار شابىندىق پەن جايىلىمدىق جەردى سۋلاندىرۋعا مۇمكىندىك بەرەتىن «قاراوزەك» سۋ قويماسى جوباسى وبلىس ءۇشىن اسا ماڭىزدى بولىپ وتىر. ايدىنىنا 775 ملن تەكشە مەتر سۋ سىيعىزاتىن قويما قۇرىلىسىن يسلام دامۋ بانكى ەسەبىنەن قارجىلاندىرۋعا قاتىستى سۋ رەسۋرستارى جانە يرريگاتسيا مينيسترلىگىمەن بىرلەسكەن جۇمىس جۇرگىزىلۋ ۇستىندە. ماماندار بۇل باستاما ارقىلى ارال تەڭىزىنە تۇراقتى سۋ جەتكىزۋگە جول اشىلاتىنىن ايتادى.
قىزىلوردا
