وڭتۇستىك قازاقستاندا جاس كەلىنشەك ەكى قىزىن بۋىندىرىپ ءولتىردى

استانا. 3 مامىر. وڭتۇستىك قازاقستان وبلىسىنىڭ سارىاعاش اۋدانىندا جاس كەلىنشەك كىشكەنتاي ەكى قىزىن بۋىندىرىپ ولتىرگەن. بۇل تۋرالى كتك تەلەارناسى حابارلادى. «وڭتۇستىك قازاقستاننىڭ سارىاعاشىندا جاس كەلىنشەك ەكى كىشكەنتاي قىزىمەن ەسەپ ايىرىستى. ولاردىڭ ءبىرى – توعىزدا, ەكىنشىسى – ون بىردە. بالالارىن ءولتىرۋشى ايەل قاماۋعا الىندى. ونىڭ بۇلاردان باسقا تاعى ءبىر ۇلى بار», - دەلىنگەن حابارلامادا. سارىاعاشتا بولعان قاندى وقيعا جۇرتتى قاتتى تەڭسەلتتى. اسىرەسە, ەكى قىز بالا وقيتىن مەكتەپتەگىلەر مۇنى قالاي باعالاۋدى بىلمەي, دال بولۋدا. ەڭ سۇمدىعى سول, ەكىنشى سىنىپتا وقيتىن بالىم مەن بەسىنشىدە وقيتىن امانكۇلدى تۋعان انالارى تۇنشىقتىرىپ ولتىرگەن. مۇنى ەستىگەن بالالار دا, وقۋشىلار دا قاتتى قاپا بولىپ وتىر. «مەن بۇعان بايلانىستى ەشتەڭە ايتا المايمىن, بارىنەن بۇرىن قىزدارعا وبال بولدى. ايەلدى بۇعان نە ءماجبۇر ەتۋى مۇمكىن؟ مەن ءتىپتى دە ءبىلميمىن, ايتارعا ءسوزىم جوق, ونىڭ مۇنى قالاي جاساعانىن دا تۇسىنبەيمىن», - دەدى مەكتەپ ديرەكتورى لازاكات تاعاەۆا. قىزدارىن ولتىرگەن فەرۋزا ءۇش بالاسىمەن سول بولمەدە تۇرىپتى. ونىڭ تاعى ءبىر قىزىن اجەسى مەن اتاسى باعىپ وتىرعان كورىنەدى. ال بالالاردىڭ اكەلەرى بۇدان 7 جىل بۇرىن قايتىس بولىپتى. سودان بەرى جەسىرلىكتىڭ كەبىن كيىپ كەلە جاتقان ايەل كونديتەر تسەحىندا جۇمىس جاساپ, كۇنىن ازەر كورىپ كەلەدى ەكەن. كورشىلەرى فەرۋزانىڭ قارىزعا باتىپ قالعانىن ايتادى. ال پوليتسەيلەرگە قىزدارىن قايتىپ ولتىرگەنىن ايتىپ جۇرگەنىندە ايەل مۇنداي ومىردەن شارشاعانىن دا جەتكىزىپتى. قىلمىستى وقيعا ورىن العان بولمە ايراپ-جايراپ جاتىر ەكەن. 33 جاستاعى فەرۋزا تۋرالى كورشىلرى كوپ نارسە ايتا المادى. ولار تەك ونىڭ ەشكىممەن جاقىن دوستاسىپ كەتپەنىن كەلتىرگەن. سونداي-اق ەشكىممەن ۇرىسپاعان دا كورىنەدى. انا رەتىندە قاتال بولعان. قۇقىق قورعاۋ ورگاندارىنىڭ قىزمەتكەرلەرى ايەلدىڭ قىزدارىن ەرلەر گالستۋگىمەن بۋىندىرعانىن بولجاپ وتىر. پوليتسيا بۇدان ارتىق ەشتەڭە ايتىپ وتىرعان جوق. قازىر تەك ونىڭ تۇتقىنعا الىنعانى عانا بەلگىلى. اتاسى مەن اجەسىنىڭ قولىنداعى ۇلكەن قىزىنان بولەك, توعىزىنشى سىنىپتا وقيتىن ۇلى دا بار. سول بالا ۇيدە نە بولعانىن ءبىرىنشى بولىپ كورىپتى. قازىر بالا تۋىستارىنىڭ قولىندا تۇرىپ جاتىر. ونىمەن پسيحولوگتار جۇمىس جاساۋدا. قۇرىش نۇرىمبەت. دەرەك, سۋرەت: كتك