تيمۋر بەكمامبەتوۆ: «تۋعان جەردەن تامىرىمدى ۇزبەيمىن»

اتىراۋدا كىندىك قانى تامعان, جايىق جاعاسىندا بالالىق بالداۋرەنى وتكەن, بۇگىندە رەسەيدە تۇراتىن اتاقتى رەجيسسەر, سونىمەن بىرگە, پروديۋسەر تيمۋر بەكمامبەتوۆ تۋعان جەرىنە كەلىپ, اكەسى نۇرۋاحيتكە ورناتىلعان مەموريالدىق تاقتانىڭ اشىلۋ سالتاناتىنا قاتىستى. ونىڭ ەسىمى تەك ءبىر ەلگە عانا ەمەس, الەمگە كەڭىنەن جايىلعان. اسىرەسە, «تۇنگى شولعىنشى» فيلمىمەن تانىمال بولعان تيمۋر بەكمامبەتوۆ تۋعان جەرىنە بۇدان ون جىل بۇرىن كەلگەن ەكەن. سودان كەيىنگى اتىراۋعا كەلۋ ساپارى, وتكەن اپتادا اكەسى نۇرۋاحيتكە ورناتىلعان مەموريالدىق تاقتانىڭ اشىلۋ سالتاناتىمەن تۇسپا-تۇس كەلدى. ونىڭ اكەسى ەنەرگەتيكا سالاسىندا ابىرويلى ەڭبەك ەتكەن. الىستا جۇرسە دە تۋعان جەرىن ساعىنا ەسكە الاتىن تيمۋر بەكمامبەتوۆتىڭ ايتۋىنشا, ول قازىر شەتەلدىك MGM كينوستۋدياسىنىڭ «بەن-گۋر» اتالاتىن ءىرى جوباسىنداعى جۇمىسىن جالعاستىرۋدا. – بۇل – 2000 جىلدىق تاريحى بار وتە كونە حيكايا. ونىڭ ستسە­­­نا­ريى ليۋ ۋوللەستىڭ كەڭى­نەن تانى­مال بولعان «بەن-گۋر» كلاس­سيكا­­لىق رومانىنىڭ جەلىسىمەن جا­زىلعان. حيكايا سيۋجەتىندە اعايىندى ءجى­گىتتەر تۋرالى باياندالادى. نەگىزگى ءتۇيىن – كەك پەن كەشىرىم جايلى. حيكايا­دا مورگان فريمەن, دجەك حيۋستون سەكىلدى اكتەرلەر وينايدى, – دەدى اتاقتى رەجيسسەر جۋرناليس­تەرگە بەرگەن سۇحباتىندا. سونىمەن بىرگە, بۇعان دەيىن تيمۋر بەكمامبەتوۆ نەگى­زىن قالا­عان حالىقارالىق «Astana» ەكشن-فيلمدەر كينوفەس­تيۆا­لىندە قازاق­ستان تاريحىنا نەگىزدەلگەن بىرلەس­كەن جوبالار جونىندە دە اڭگىمەلەپ بەردى. ونىڭ ايتۋىنشا, ستسەنا­ريلەر فەستيۆالى وتكەن. بىراق, وندا قازاقستان تاريحىنا قاتىستى ەمەس, عارىش تۋرالى ۇزدىك ستسەنا­ريى تاڭدالىپتى. ءسويتىپ, امەري­كالىق برايان ميللەردىڭ ستسەنا­ريى نەگىزىندە «Apollo 18» فيل­مىن تۇسىرۋگە 5 ملن. دوللار جۇمسال­عان. كەيىن فيلمنەن 25,2 ملن. اقش دوللارى كولەمىندە تابىس تۇسكەن. تيمۋر بەكمامبەتوۆ بۇدان بىلاي تۋعان جەرىنە ءجيى كەلۋگە بەكىنىپ وتىر. «جاس ۇلعايدى. بوس ۋاقىت تابىلىپ تۇرادى. سوڭعى كەزدەرى تۋعان جەرىم تارتىپ تۇراتىن بولدى. ساعىنىش تا بار. ەلدەن تامىرىمدى ۇزگىم كەلمەيدى», دەدى ول. جولداسبەك شوپەعۇل, «ەگەمەن قازاقستان». اتىراۋ. سۋرەتتە: اتاقتى رەجيسسەر تيمۋر بەكمامبەتوۆ تۋىس­تارىنىڭ ورتاسىندا.