استانا. 3 مامىر. تۇرىكمەنستان پرەزيدەنتى گۋربانگۋلى بەردىمۋحامەدوۆتىڭ نەمەرەسى كەريمكۋلي سوڭعى كۇندەرى تۇرىكمەن تەلەۆيدەنيەسىنىڭ ناعىز قاھارمانىنا اينالىپ تۇر. بۇعان بالا بەردىمۋحامەدوۆتىڭ ات بايگەسىنە قاتىسقانى سەبەپ بولعان. بۇل تۋرالى «ازاتلىك» راديوسى حابارلادى.
وقيعا 26 ساۋىردە اشحابادتىڭ حالىقارالىق ات سپورتى يپپودرومىندا تۇرىكمەن سايگ ۇلىگى كۇنى قۇرمەتىنە ارنالعان ات بايگەسىنەن كەيىن وربىگەن. وسى كۇنگى تۇرىكمەن تەلەۆيدەنيەسى حابارلارىنىڭ ناعىز مىق شەگەسى پرەزيدەنت گۋربانگۋلي بەردىمۋحامەدوۆتىڭ 12 جاستاعى نەمەرەسى كەريمكۋلي بەردىمۋحامەدوۆتىڭ سول جارىسقا قاتىسقانى بولعان. جاس شاباندوز وسى بايگەدە دوۆامات (قازاقشا – جالعاس) دەگەن ايعىرمەن جارىس جولىنا شىعادى. ال ونىڭ اتبەگى رەتىندە پرەزيدەنتتىڭ ءوزى قىزمەت ەتەدى.
ايتا كەتەتىن جايت, 2014 جىلى گۋربانگۋلى بەردىمۋحامەدوۆ «تۇرىكمەنستاننىڭ شەبەر اتبەگى» دەگەن اتاق العان ەدى. وعان بۇل شەن «تۇرىكمەن اتتارىنىڭ داڭقىن قايتا جاڭعىرتۋدا, حالقىمىزدىڭ اتبەگىلىك ونەرى بەدەلىن كوتەرۋ مەن ونى بۇكىل الەمگە تانىتۋدا, ات سپورتى مەن جىلقى شارۋاشىلىعى سالاسىن, بۇل سالاداعى كەڭ اۋقىمدى حالىقارالىق ىنتىماقتاستىقتى دامىتۋدا سىڭىرگەن اسا كورنەكتى ەڭبەگى, سونداي-اق جوعارى شاباندوزدىق شەبەرلىگى ءۇشىن» بەرىلگەن بولاتىن.
تۇرىكمەنستان مەملەكەتتىك اقپارات اگەنتتىگىنىڭ حابارىنا قاراعاندا, «ەلدىڭ ءتۇرلى ۆەدومستۆولارى تاعايىنداعان جۇلدەلەر مەن تۇرىكمەنستان پرەزيدەنتىنىڭ باس جۇلدەسى ءۇشىن ۇيىمداستىرىلعان مەرەكەلىك بايگە ەڭ ۇزدىك احالتەكە اتتارىنىڭ جانە مىقتى شاباندوزداردىڭ قاتىسۋىمەن جەتى ءتۇرلى قاشىقتىق بويىنشا» وتكىزىلگەن. اقپاردا سونداي-اق جەتى بايگەنىڭ بارلىق جەڭىمپازدارىنىڭ ەسىمدەرى دە حابارلانادى. بىراق اگەنتتىك رەپورتاجىندا پرەزيدەنت نەمەرەسىنىڭ جەڭىسى تۋرالى ءبىر اۋىز ءسوز جوق.
سوعان قاراماستان, تەلەارنالار بايگەنىڭ سوڭىنداعى سالتاناتتى راسىمدە باس بايگەنىڭ كەريمكۋلي بەردىمۋحامەدوۆكە تاپسىرىلعانى تۋرالى جارىسا حابارلاپ, بۇعان تەلەرەپورتاجداردا ايرىقشا ءمان بەرىپ جاتتى. «شاماسى, پرەزيدەنت نەمەرەسى بايگەگە كونكۋرستان تىس قاتىسسا كەرەك», دەپ مالىمدەيدى «ازاتلىك» راديوسى ءوز حابارىندا.
وسى «وقيعاعا» تۇسىندىرمە بەرگەن «التەرناتيۆنىە نوۆوستي تۋركمەنيستانا» بىلاي دەپ جازدى: «التىن اسىر» تەلەارناسىنىڭ رەپورتاجىن كورگەندەردىڭ كوپشىلىگىنىڭ كوڭىلىندە جايسىز نارسە قالىپ قويدى. تەلەكورەرمەندەرگە بۇل تريبۋنادا تۇرعان كورەرمەندەردىڭ ادال دا ءادىل سايىس كورمەك بولعان نيەتتەرىن اياققا باسىپ, وزدەرىن الداپ كەتكەندەي اسەر قالدىردى».
بۇدان ءبىر جىل بۇرىن تاپ وسىنداي تۇرىكمەن سايگ ۇلىگى كۇنى قۇرمەتىنە وتكەن ات بايگەسىندە كومبەگە ءبىرىنشى بولىپ كەلە جاتقان پرەزيدەنت بەردىمۋحامەدوۆ ەردىڭ ۇستىنەن ۇشىپ ءتۇسىپ ەدى.
قۇرىش نۇرىمبەت.
دەرەك, سۋرەت: ازاتلىك راديوسى.
