اۋرۋ انىقتالدى, شەتكە شىعارۋ شەكتەلدى

كيىكتەردىڭ جاپپاي قىرىلۋىنان قاۋىپتەنىپ قالعان جۇرتقا باعىمداعى مالدىڭ دا شەتىنەۋىنىڭ ۇشىراسۋى – الاڭداتارلىق وقيعا. مۇنداي جاعداي ۇلىتاۋ اۋدانىنداعى بوزتۇمسىق اۋىلىندا ورىن الدى. الايدا, الەۋمەتتىك جەلىلەردە حابارلانعانداي, مۇندا بىردەن 100-دەن استام مال باسى ەمەس, 21 ءىرى قارا ءتۇرى, اتاپ ايتقاندا, 19 بۇزاۋ, 2 قاشار تۇياق سەرىپكەن ەكەن. ازىرگە باسقالارى ءولىم-جىتىمنەن امان. كەشە اۋداندىق ۆەتەريناريا بولىمىنەن بىلگەنى­­­مىزدەي شەتىنەگەن مالداردان الىنىپ, تەكسەرىسكە جىبەرىلگەن ۇلگىنى اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ «ۆەتەريناريا بويىنشا ۇلتتىق رەفە­رەنتتىك ورتالىعى» زەرتتەگەن. ناتيجەسىندە ليستە­ريوز پەن پاستەرەللەز اۋرۋلارى ەكەنى انىق­تالىپتى. وسىعان بايلانىستى اتالعان كوميتەت­ت­ىڭ قاراعاندىداعى ەپيزوتياعا قارسى وتريادى ماماندارى بۇگىندە قاراكەڭگىر اۋىلدىق وكرۋگى اۋماعىنداعى مال قورالارىنا دەزينفەكتسيا جۇمىستارىن جاساپ, اۋرۋدىڭ تارالماۋى ءۇشىن الدىن الۋ شارالارىن جۇرگىزۋدە. وسىنداي ىستەرمەن قاتار, اۋداندىق اكىمدىكتىڭ قاۋلىسىمەن مالدى داعدىلى جايىلىم اۋماعىنان اسىرماي باعۋعا, ەت, ءسۇت ونىمدەرىن سىرت جەرلەرگە شىعارماۋعا شەكتەۋ قويىلدى. مۇنداي توسىن جاعداي بۇل اۋىلدا كوپتەن بەرى ۇشىراسپاپتى.سوعان تاپ بولۋ جەرگىلىكتى تۇرعىنداردىڭ قولدارىنداعى ت ۇلىك تۇرلەرىنىڭ ۆەتەرينارلىق كۇتىمىنە دەگەن جاۋاپكەرشىلىگىن كۇشەيتۋگە دەن قويدىرىپ وتىر. ايقىن نەسىپباي, «ەگەمەن قازاقستان». قاراعاندى وبلىسى, ۇلىتاۋ اۋدانى.