نەپالداعى ءزىلزالا سالدارىنان ەۆەرەستىڭ شوككەنى انىقتالدى

استانا. 3 مامىر. 25 ساۋىردە نەپالدا بولعان جويقىن جەر سىلكىنىسى الەمدەگى ەڭ بيىك شىڭ – ەۆەرەستكە دە ءوز زالالىن تيگىزدى. بۇل تۋرالى The Huffington Post باسىلىمىنا سىلتەمە جاساپ, lenta.ru حابارلادى. UNAVCO گەوفيزيكالىق زەرتتەۋ كونسورتسيۋمى تاراتقان دەرەكتەرگە سۇيەنسەك, تابيعات اپاتى سالدارىنان ەۆەرەستىڭ بيىكتىگى 1 ديۋيمگە (2,54 سم.) شوككەن. مامانداردىڭ مۇنداي قورىتىندىسى 29 ساۋىردە دجومولۋنگمانىڭ ۇستىنەن وتكەن «ستراج-1» ەۋروپالىق جەر سەرىگىنىڭ مالىمەتتەرىنە نەگىزدەلگەن. قورشاعان ورتانى قورعاۋ سالاسى بويىنشا بىرىككەن زەرتەۋ ينستيتۋتىنىڭ قىزمەتكەرى, پروفەسسور رودجەر بيلحامنىڭ باعامداۋىنشا, اتالعان شىڭ ءارى كەتسە 1-2 ميلليمەترگە شوككەن. ەسەسىنە, گيمالايدا ورنالاسقان انناپۋرا تاۋ سىلەمى ءزىلزالادان كەيىن 20 سانتيمەترگە بيىكتەگەن. گەرمانيانىڭ اەروعارىش ورتالىعى دا نەپالدىڭ جەر بەدەرى وزگەرىسكە ۇشىراعانىن ايتتى. ولاردىڭ دەرەگى بويىنشا, ەل استاناسى – كاتماندۋ ماڭايىندا 2,5 مىڭ شارشى شاقىرىمدى قۇرايتىن اۋماق بۇرىنعى دەڭگەيىنەن 3 فۋتقا (شامامەن 91 سانتيمەتر) بيىكتەگەن. عالىمدار ايماقتاعى رەلەفتىڭ مۇنشالىقتى وزگەرۋىن ءزىلزالا سالدارىنان جەر قاباتتارىنداعى قىسىمنىڭ السىرەۋىمەن تۇسىندىرۋدە. جەراستى دۇمپۋىنە دەيىن گەولوگيالىق پلاتفورما قاتتى قىسىمنان سىعىلىپ تۇرعان. ال جەر سىلكىنگەن كەزدە قىسىم السىرەپ, سالدارىنان جوعارعى قاباتتا وزگەرىستەر پايدا بولۋدا. ايتا كەتەيىك, نەپالداعى ءزىلزالا سوڭعى 80 جىلداعى جويقىن اپات رەتىندە تىركەلدى. ريحتەر شكالاسى بويىنشا 7,9 بالدىق دۇمپۋدەن 7 مىڭنان استام ادام قازا تاپتى. جەرگىلىكتى بيلىك اپات قۇرباندارىنىڭ سانى بۇدان دا كوپ بولۋى مۇمكىن ەكەنىن ايتۋدا. ەلامان قوڭىر. دەرەك: lenta.ru. سۋرەت: putidorogi-nn.ru.