ءارىسى اقش, بەرىسى كورشىلەس مەملەكەتتەردەن ارنايى ات باسىن بۇرعان مارتەبەلى مەيماندار تاراز تورىندە قولونەر شەبەرلەرىنە كورسەتىلىپ جاتقان قولداۋعا ريزاشىلىقتارىن بىلدىرگەنى جادىمىزدا. سودان دا بولسا كەرەك, جەرگىلىكتى قولونەر شەبەرلەرى حالىقارالىق بايقاۋلارعا قاتىسا باستادى.
ءتول تۋىندىلارى بىرنەشە مەملەكەتتەگى ارىپتەستەرى تاراپىنان مويىندالعان تارازدىق قولونەرشىلەر يندونەزيا ەلىندە باستالعان حالىقارالىق «INACRAFT-2025» كورمەسىنە قاتىسىپ, ۇلتتىق مۇرانى ناسيحاتتاپ قايتتى. بەلگىلى مامانداردىڭ ايتۋىنشا, الەمنىڭ بىرنەشە ەلىنەن مايتالمان قولونەر شەبەرلەرى قاتىساتىن كورمەنىڭ قاي كەزدە دە ءباسى بيىك. بۇل ءوز كەزەگىندە تارازدىق مامانداردىڭ تاجىريبە الماسۋىنا زور مۇمكىندىك تۋعىزادى.
«قولونەرشىلەردىڭ حالىقارالىق كورمەسى 25 جىل بويى تۇراقتى تۇردە ۇيىمداستىرىلىپ ءجۇر. يندونەزياداعى اۋقىمدى مادەني ءىس-شاراعا ورتا ازيا, وڭتۇستىك ازيا ەلدەرىنىڭ وكىلدەرى جانە دۇنيەجۇزىلىك قولونەرشىلەر تىزىمىنە ەنگەن قالالاردىڭ ماماندارى قاتىسقانىن ايتا كەتكەن ءجون.
قاتىسۋشى مەملەكەت وكىلدەرى نەگىزىنەن ۇلتتىق باعىتتاعى تۋىندىلارىن ۇسىنعانىن بايقادىق. سول تۇرعىدان العاندا ءبىزدىڭ شەبەرلەردىڭ شىعارمالارىنان دا سايكەستىك بايقالادى.
قالاي دەسەك تە ۇلتتىق تانىمىنان تامىرىن اجىراتپاعان ەل ەكەنىمىزدى تانىتتىق دەگەن ويدامىن. ەڭ باستىسى, كورمەگە كەلگەن مەيماندار ءبىزدىڭ قولونەرشىلەردىڭ تۋىندىلارىنا اسا قىزىعۋشىلىقپەن قاراپ, ولاردىڭ شەبەرلىگىنە ءتانتى بولدى. قىسقاسى, ءبىز يندونەزيادا قازاقتىڭ ءتول مادەنيەتىن ناسيحاتتادىق. مۇنىڭ ءبارى مەملەكەتتىك قولداۋدىڭ ارقاسىندا مۇمكىن بولعانىن ايتا كەتكەن ءلازىم. جالپى العاندا, قولونەر شەبەرلەرىنە قاي كەزدە دە قولداۋ كورسەتۋگە ءازىرمىز», دەيدى تاراز قالاسى اكىمىنىڭ ورىنباسارى گۇلدانا الىمجانقىزى.
دەلەگاتتاردىڭ اراسىندا جىلدار بويى عاجاپ تۋىندىلارىمەن تالاي مامانداردى ءتانتى ەتكەن انار بەكسۇلتانوۆا دا بار. ونىڭ ايتۋىنشا, ءتورت كۇنگە سوزىلعان ءىس-شارا جوعارى دەڭگەيدە ۇيىمداستىرىلعان. ال كورمەگە كەلگەن قاراپايىم حالىق تارازدىق قولونەرشىلەردىڭ ەڭبەگىن جوعارى باعالاعان.
ء«بىز دۇنيەجۇزىلىك قولونەرشىلەردىڭ تىزىلىمىنە ۇلتتىق كيىمدەر ارقىلى ەنگەنبىز. سوندىقتان وسى كورمەگە ۇلتتىق كيىمدەردى جانە تورگە ىلەتىن تۇسكيىز, سىرماق, شاپان, جاداعاي, كيىزدەن جاسالعان اياقكيىم, باسكيىم, ءتۇرلى سومكەنى اپاردىق. ساراپشىلار تاراپىنان ءبىز اپارعان كيىمدەر مەن بۇيىمدارعا زور قىزىعۋشىلىقتى بايقادىق.
جەرگىلىكتى حالىق تا مادەنيەتىمىز بەن تاريحىمىزعا قاتىستى ءتۇرلى سۇراق قويىپ, جاۋاپ الدى. قالاي دەسەك تە, يندونەزياداعى ءىس-شارا ءبىز ءۇشىن تابىستى بولدى دەپ ايتۋعا تولىق نەگىز بار. ارىپتەستەرىمىزبەن تاجىريبە الماستىق, ءارتۇرلى تاقىرىپتا وي ءبولىسىپ, ءبىر جاساپ قالدىق», دەيدى ا.بەكسۇلتانوۆا اعىنان جارىلىپ.
تاراز
