«رومەو مەن جۋلەتتا» سپەكتاكلى – وزەكتىلىگىن جويماعان ماڭگىلىك كلاسسيكا. تالاي مارتە ساحنالانعان بۇل شىعارمانىڭ ءاربىر جاڭا قويىلىمى وزىندىك كۇش-قۋاتىمەن, شىعارماشىلىق تىڭ وي-تولعانىسىمەن ەرەكشەلەنەدى. ءار قويىلعان سايىن توسىن فورما, ەرەكشە ساراپتاۋدا ساحناعا جول تارتاتىن ۆەرونانىڭ قوس عاشىعى تۋرالى ماڭگىلىك تاقىرىپ «استانا بالەت» تەاترى ساحناسىندا بۇل جولى دا جاڭاشىل لەپتە ءۇن قاتتى. ءتۇرلى بۋىن كورەرمەننىڭ قىزىعۋشىلىعىن ءبىر ءسات تە كەمىتپەگەن ايتۋلى كلاسسيكادان اركىم ءوز زامانداستارىنىڭ كەلبەتىن تانىعانى ءسوزسىز.
بالەتمەيستەر ءۇش اكتىلى بالەتتى ەكى اكتىگە قىسقارتىپ, سونىڭ ناتيجەسىندە قويىلىم ديناميكاسىن ارتتىرعان. جالپى, بالەتتى ءجىتى باقىلاپ جۇرگەن كورەرمەن ۆلاديمير ياكوۆلەۆتىڭ حورەوگرافيا ءتىلىنىڭ وزىندىك قولتاڭباسىن بىردەن تانىرى ءسوزسىز. سۋرەتكەر ەڭبەگىندە رومانتيكالىق ساحنالارعا عانا ەمەس, تراگەديا استارىنا دا باسا ءمان بەرىلىپ, جاۋلاسقان ەكى وتباسىنىڭ اراسىنداعى قاقتىعىس جان-جاقتى ءارى شىنايى كورسەتىلەدى. سونداي-اق سپەكتاكلدەگى جەكپە-جەك پەن دۋەل ساحنالارى دا بۇگە-شىگەسىنە دەيىن ويلاستىرىلىپ, سونىڭ ارقاسىندا شىعارمانىڭ ديناميكاسى ارتىپ, كورەرمەن تاقىمىن قىسىپ وتىرارلىقتاي ەرەكشە ەموتسيانى باستان كەشكەنى انىق. اتاپ ايتساق, رومەو مەن جۋلەتتانىڭ اراسىنداعى ءمولدىر سەزىم, مەركۋتسيونىڭ ازىلكەشتىگى, كۇتۋشىنىڭ قاراپايىمدىلىعى, لورەنتسونىڭ دانالىعى, ءتيبالدتىڭ قاتىگەزدىگى, يتاليالىق كوشەلەرگە ءتان ناقىشتار مەن مەرەكەلىك كوڭىل, اجال ساحناسىنداعى دراماتيزم – وسىنىڭ ءبارى سپەكتاكلدە ءساتتى كورىنىس تاپقان. ال پانتوميما ەلەمەنتتەرى ۆەرونانىڭ جاۋلاسىپ جۇرگەن ەكى وتباسى وكىلدەرىنىڭ شايقاساتىن ساحنالارىندا مولىنان قولدانىلعان.
بالەتتەگى مۋزىكالىق بەزەندىرىلۋ – ول دا ءوز الدىنا بولەك اڭگىمە. باس ديريجەر ارمان ورازعاليەۆ جەتەكشىلىك ەتەتىن وركەستر ورىنداۋىنداعى عاجايىپ مۋزىكا سول ساتتە-اق تەاتردىڭ تۇراقتى كورەرمەندەرىنىڭ سۇيىكتى اۋەنىنە اينالىپ ۇلگەردى. س.پروكوفەۆتىڭ اۋەنىن وركەستر ءتۇرلى ەموتسيا مەن نازىك سەزىم ىرعاعىنا كومكەرىپ, تاماشا تۋىندىنى كورەرمەن جۇرەگىنە جەتكىزە الدى. سەبەبى سەزىمتال مۋزىكانت قوس كەيىپكەردىڭ اراسىنداعى ماحاببات پەن شيەلەنىستى مۋزىكا تىلىندە مەيلىنشە شىنايى ءارى اسەرلى اشا بىلگەن. ال شاعىن ءارى ءجيى الماسىپ وتىراتىن ستسەنوگرافيا, اسەم كوستيۋمدەر حالىق ءومىرى ءھام ۆەرونالىق اقسۇيەكتەردىڭ تىنىس-تىرشىلىگى مەن لورەنتسو شىركەۋىنىڭ كوركەم بەزەندىرىلۋى, سونىمەن قاتار كاپۋلەتتي اۋلەتىنىڭ وتباسىلىق مازارى كورەرمەن قاۋىمدى ءبىر ساتكە قايتا ورلەۋ داۋىرىنە جەتەلەپ اكەتكەندەي عالامات سەزىمگە بولەدى. سونىڭ ارقاسىندا بالەت تە وزىندىك كوركەمدىك بيىككە كوتەرىلگەندەي اسەر سىيلادى.
قويىلىمدا نەگىزى باستى پارتيالاردى تەاتردىڭ تالانتتى اكتەرلەرى ورىندادى. اتاپ ايتساق, رومەونى سۇندەت سۇلتانوۆ پەن ۋەسلي كارۆالو, جۋلەتتانى نازەركە ايمۇحامەتوۆا مەن ناتاليا فەرناندەس مەنەس, تيبالدتى فارحاد بۋريەۆ پەن باۋىرجان بورانباەۆ, مەركۋتسيونى ەرقانات ەرماعامبەت, بەنۆوليونى نۇرزات بەرىكقازى ۇلى, ءپاريستى ۋەسلي كارۆالو مەن سۇندەت سۇلتانوۆ, لورد كاپۋلەتتيدى يلدار شاكيرزيانوۆ, لەدي كاپۋلەتتيدى اسەل جانعاسقاەۆا مەن ريزا قاناتقىزى, كۇتۋشىنى شىرىن زايچيكوۆا كەمەلىنە كەلتىرە كەيىپتەدى. بەكزات ونەردەن رۋحاني ءلاززات الىپ, ساحناداعى سۇلۋلىققا جان سۋارعان تالعامپاز كورەرمەن تەاتردان ريزا بولىپ تارقاستى.
