كەشە استانادا دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ وتىرىسى ءوتتى. وندا جەتەكشى ساياسي پارتيالاردىڭ توراعالارى, ۇكىمەتتىك ەمەس ۇيىمدار مەن ازاماتتىق قوعام وكىلدەرى پرەزيدەنت نۇرسۇلتان نازارباەۆ ايقىنداعان «100 ناقتى قادام» ۇلت جوسپارىن ىسكە اسىرۋعا اتسالىسۋ ماسەلەلەرىن تالقىلادى.
جيىندى اشقان «نۇر وتان» پارتياسى توراعاسىنىڭ ءبىرىنشى ورىنباسارى, كواليتسيا توراعاسى باۋىرجان بايبەك مەملەكەت باسشىسى ۇسىنعان رەفورمالاردىڭ ماڭىزدىلىعىنا توقتالا كەلىپ:
– قازىرگى رەفورمالار – ەگەمەن ەل بولعاننان بەرى جۇزەگە اسقان ىرگەلى ىستەردىڭ زاڭدى جالعاسى. مەملەكەت پەن قوعام دامۋىنىڭ كەلەسى جارقىن كەزەڭىنە ءوتۋ الدىندا قارقىنىمىزعا قارقىن قوساتىن, قازاقستاندى الەمنىڭ ەڭ دامىعان 30 ەلىنىڭ قاتارىنا ەنگىزەر ناقتى شارالار كەشەنى, – دەدى.
ونىڭ سوزىنە قاراعاندا, مۇنداي كەلەلى شارالاردى ازاماتتىق قوعامنىڭ اتسالىسۋىنسىز جۇزەگە اسىرۋ مۇمكىن ەمەس. ەلباسى «دەموكراتيالىق قوعامنىڭ اجىراماس بولشەگى» دەپ اتاعان ازاماتتىق قوعام ينستيتۋتتارىنا وسىناۋ اۋقىمدى رەفورمالاردى ىسكە اسىرۋدا اسا ۇلكەن جاۋاپكەرشىلىك ارتىلادى.
بۇدان بولەك, باۋىرجان بايبەك ەلىمىزدىڭ الدىنا – «بارشاعا ورتاق قازىرگى زامانعى مەملەكەت», «زاڭنىڭ ۇستەمدىگىن قامتاماسىز ەتۋ», «تۇراقتى ەكونوميكا», «بولاشاعى ءبىرتۇتاس ۇلت», «ترانسپارەنتتىك جانە ەسەپتى مەملەكەت» سياقتى بەس ينستيتۋتتىق رەفورمانى جۇرگىزۋ بويىنشا اۋقىمدى مىندەتتەر قويىلىپ وتىرعانىن, 2015 جىلعى 20 مامىردا «مەملەكەتتىك قۇرىلىستىڭ الداعى 100 ناقتى قادامى» اتتى ۇلت جوسپارى ۇسىنىلعانىن, بۇل قۇجات حالىقارالىق ساراپشىلار تاراپىنان جوعارى باعالانعانىن, ولار قازاقستاننىڭ الەمدەگى ەڭ بەدەلدى باعدارلامالارىنىڭ بىرىنەن باستاۋ العانىن اتاپ كورسەتكەنىن جەتكىزدى.
سونداي-اق, ول «نۇر وتان» پارتياسىنىڭ بەس ينستيتۋتتىق رەفورما شەڭبەرىندە ۇلت جوسپارىن جۇزەگە اسىرۋ بويىنشا ۇسىنىستاردىڭ اۋقىمدى پاكەتى دايىندالعانىن ءمالىم ەتتى. ونىڭ ايتۋىنشا, بۇل ۇسىنىستار وتكەن اپتادا «نۇر وتان» پارتياسىنىڭ قوعامدىق ساياسات ينستيتۋتى مەن مەديالىق تەحنولوگيالار ورتالىعى قۇرعان «Sarap Time» ساراپتاما كلۋبى الاڭىندا تالقىلانعان.
بۇعان قوسا, ب.بايبەك ۇلت جوسپارىن جۇزەگە اسىرۋدا تۇپكىلىكتى كوزدەلىپ وتىرعان ماقساتىمىزدىڭ ءمانىسىن تۇسىندىرە كەتتى.
– ەلباسى ايتقانداي, ەلدە ءادىل سوت پەن قۇقىق قورعاۋ جۇيەسىن, حالىققا قىزمەت ەتەتىن مەملەكەتتىك اپپارات قۇرۋ, ەكونوميكاسى كەمەل, بولاشاعى ءبىرتۇتاس ۇلت بولۋعا باعىتتالعان رەفورمالاردى جۇزەگە اسىرۋ – قاراپايىم قازاقستاندىقتاردىڭ قامى. ماقسات – مەملەكەتكە دەگەن ازاماتتار اراسىندا اينىماس سەنىم قالىپتاستىرۋ, سول ارقىلى ماڭگىلىك ەل بولۋدىڭ داڭعىلىنا ءتۇسۋ, – دەدى.
سونىمەن قاتار, باسقوسۋدا بەلگىلى بولعانداي, «نۇر وتان» پارتياسى قۇرعان رەسپۋبليكالىق-قوعامدىق شتابقا كواليتسيا مۇشەلەرiنiڭ 90 پايىزى كiرگەن. بiر اي iشiندە ولار كوپتەگەن اۋداندار مەن اۋىلداردا, 20-دان استام iرi كاسىپورىنداردا بولىپ, 70 مىڭنان استام اداممەن كەزدەسكەن. بارلىق قوعامدىق بiرلەستiكتەر ەلiمiزدiڭ وركەندەۋi ءۇشiن ەلباسىنىڭ جانىنا توپتاسىپ, وزدەرiنiڭ ساياسي مادەنيەتتەرiنiڭ جوعارى دەڭگەيiن كورسەتە بىلگەن. پرەزيدەنتتىڭ رەفورمالارى ازاماتتاردىڭ مەملەكەتكە دەگەن سەنىمiنiڭ ارتتىرىلۋىنا, ازاماتتىق باستامالار مەن قوعامدىق باقىلاۋدى كەڭەيتۋگە باعىتتالعان.
جيىندا ايتىلىپ وتكەندەي, مەملەكەت باسشىسىنىڭ تاپسىرماسىنا سايكەس, اۋقىمدى اكiمشiلiك رەفورما جۇرگiزiلiپ, ساياسي قىزمەتكەرلەردiڭ سانى 8 ەسە قىسقارعان. ەكونوميكانى جۇيەلi تۇردە دامىتۋدىڭ ارقاسىندا وڭiرلەردiڭ ءمۇمكiندiكتەرi ايتارلىقتاي ۇلعايعان. وسىلايشا, سوڭعى 10 جىلدا جەرگiلiكتi بيۋدجەتتەر 5 ەسە, ورتالىقتىڭ ترانسفەرتتەرi 8 ەسە ارتقان.
باسقوسۋ بارىسىندا ۇلتتىق ەكونوميكا ءمينيسترى ەربولات دوساەۆ, ءماجىلىس دەپۋتاتى نۇرلان ءابدىروۆ جانە جەتەكشى ساياسي پارتيالاردىڭ توراعالارى, ۇكىمەتتىك ەمەس ۇيىمدار مەن ازاماتتىق قوعام وكىلدەرى, ساراپشىلار بەس ينستيتۋتتىق رەفورما, «100 ناقتى قادام» ۇلت جوسپارى ءجونىندە وي-پىكىرلەرىن ايتىپ, وزدەرىن تولعاندىرىپ جۇرگەن ۇسىنىستارىن جەتكىزدى.
وتىرىس سوڭىندا دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسى «100 ناقتى قادام» ۇلت جوسپارىن جۇزەگە اسىرۋعا قاتىستى ۇندەۋ قابىلدادى.
جولدىباي بازار,
«ەگەمەن قازاقستان».
