ماسكەۋدەگى جەڭىس شەرۋى ەرەكشە تويلانباق

الماتى. 3 مامىر. رەسەي فەدەراتسياسى پرەزيدەنتى اكىمشىلىگىنىڭ جەتەكشىسى سەرگەي يۆانوۆ: «الەم جۇرتشىلىعى – قىزىل الاڭدا ۇلى جەڭىستىڭ 70 جىلدىعىنا وراي وتەتىن اسكەري شەرۋدىڭ بۇرىن-سوڭدى بولماعانىنا كۋا بولادى», – دەپ ءمالىم ەتتى. بۇل تۋرالى Russia Today حابارلادى. سالتاناتتى شەرۋ ماسكەۋ ۋاقىتىمەن تاڭعى ساعات 9:00-دە باستالادى. شەرۋگە 15 مىڭ ادام قاتىسادى. سالتانات – تاريحي بۇرىنعى جانە قازىرگى دەگەن ەكى بولىمنەن تۇرادى. قىزىل الاڭنان بۇدان 70 جىل بۇرىنعى كەڭەستىك اسكەري كيىم ۇلگىسىندەگى جاۋىنگەرلەر سول كەزدەگى جاۋىنگەرلىك تۋلاردى كوتەرىپ, ءجۇرىپ وتەدى. سوعىس كەزىندەگى اسكەري تەحنيكانىڭ ۇلگىسى كورسەتىلەدى. سونداي-اق, سەرگەي يۆانوۆ: «جەردە – قازىرگى زامانعى رەسەي قارۋلى كۇشتەرىنىڭ قۋاتىن كورسەتۋ ماقساتىندا الاڭعا رس-27 «يارس» زىمىراندىق كەشەندەرى, دالدىگى زور ارتيللەريالىق قوندىرعىلار بوي كورسەتسە, كوكتە – سۋ-30, سۋ-35 سەكىلدى ۋلترا-زاماناۋي ۇشاقتار جۇرتتىڭ نازارىنا تۇسەتىن بولادى»,– دەدى. جالپى شەرۋ وتكىزۋ ءۇشىن بۇل ناۋقانعا رەسەي 28, 5 ميلليارد رۋبل ءبولدى. ونىڭ 12,5 ميللياردى سوعىس جانە تىل ارداگەرلەرىنە مەرەكەلىك ءبىر رەتتىك سىياقى رەتىندە تولەنەدى. 8-10 مامىر ارالىعىندا ماسكەۋدە وتەتىن بۇل جەڭىس شەرۋى مەرەكەسىنە دۇنيە ءجۇزىنىڭ 30 ەلىنەن مارتەبەلى مەيماندار, بۇۇ مەن يۋنەسكو جانە باسقا دا حالىقارالىق ۇيىمداردىڭ وكىلدەرى قاتىسادى. تالعات ءسۇيىنباي. دەرەك, سۋرەت: Russia Today.