كەشە قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ تورايىمدىق ەتۋىمەن قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جونىندەگى مەملەكەتتىك كوميسسيانىڭ كەزەكتى وتىرىسى بولىپ ءوتتى.
وندا مادەنيەت جانە سپورت ءمينيسترى ا.مۇحامەدي ۇلى, اقمولا وبلىسى اكىمىنىڭ ورىنباسارى ن.نۇركەنوۆ, ينۆەستيتسيالار جانە دامۋ ۆيتسە-ءمينيسترى س.سارسەنوۆ, پرەزيدەنت جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى ن.كالاشنيكوۆا بايانداما جاسادى. ولار اسسامبلەيا جىلىندا اتقارىلىپ جاتقان شارالار تۋرالى ءبىرشاما اقپارات بەردى.
سپيكەرلەردىڭ باياندامالارىنان بەلگىلى بولعانىنداي, قازاقستان حالقى اسسامبلەياسىنىڭ جىلىندا اۋقىمدى شارالار اتقارىلىپ جاتىر. سونىڭ ىشىندە 470-تەن استام الەۋمەتتىك جوبا قولعا الىنعان, ولارعا بارلىق ەلدى مەكەندە تۇراتىن 8 ميلليوننان استام ادام قاتىسىپتى. اتاپ ايتار بولساق, 2015 جىلعى 6 اقپاندا استانادا, وبلىس جانە اۋدان ورتالىقتارىندا قحا جىلىنىڭ سالتاناتتى تۇردە اشىلۋى كەزىندە 9 رەسپۋبليكالىق كونكۋرستىڭ باستالۋى جاريالانىپ, قحا جىلىنىڭ جالاۋى كوتەرىلگەن. سودان بەرى رەسپۋبليكا بويىنشا 2 800 ەلدى مەكەندە 1 ملن. 375 مىڭنان استام ادام قاتىسقان 4 120 ءىس-شارا بولىپ وتكەن.
28 اقپاندا ەلباسىنىڭ قازاقستان حالقى اسسامبلەياسىن قۇرۋ تۋرالى جارلىققا قول قويعانىنا 20 جىل تولۋىنا ارنالعان «مەنىڭ قازاقستانىم» اتتى قازاقستان حالقىنىڭ فورۋمى وتكىزىلگەن. فورۋم اياسىندا «بەيبىتشىلىك پەن كەلىسىمنىڭ جول كارتاسى» مەگا-جوباسىنىڭ قورىتىندىسى شىعارىلعان. 5-11 ءساۋىر ارالىعىندا شىمكەنت قالاسىندا قازاقستاننىڭ ەتنوستىق تەاترلارىنىڭ ءىىى رەسپۋبليكالىق فەستيۆالى وتكىزىلىپ, وتاندىق جانە قازىرگى زامان اۆتورلارىنىڭ شىعارمالارىنان قويىلىمدار كورسەتىلگەن.
21 ناۋرىزدا استانا جانە الماتى قالالارىندا, وبلىستاردا ناۋرىز مەيرامىنا ارنالعان «ءبىر ەل – ءبىر تاعدىر» اتتى قحا فەستيۆالدەرى وتكىزىلگەن. قحا-نىڭ ءىرى الەۋمەتتىك اكتسيالارى مەن جوبالارى دا جۇزەگە اسىرىلۋدا.
اقپان-ءساۋىر ايلارىندا «قحا – 20 ىزگى ءىس» اتتى رەسپۋبليكالىق اكتسيا وتكىزىلدى. اكتسيانىڭ سيمۆولى – قاسيەتتى تۇركىستان قالاسىنان جەتكىزىلگەن, حالىقتىڭ بىرلىگى مەن بەرەكەسىن بەينەلەيتىن «تايقازان» بولدى. «تايقازان» وڭىردەن وڭىرگە «قايىرىمدىلىق ىستەرگە تولتىرىلىپ», قحا-نىڭ ءححىى سەسسياسى قارساڭىندا استاناعا قايتا ورالدى. «قحا – 20 ىزگى ءىس» اكتسياسى اياسىندا 35 مىڭ ادامعا كومەك كورسەتىلىپ, اكتسيا بارىسىندا الەۋمەتتىك-مادەني ماڭىزى بار وبەكتىلەر سالىنىپ, ىسكە قوسىلعان جانە 1000 اعاش وتىرعىزىلىپتى.
سونىمەن قاتار, «قحا – 20 ىزگى ءىس» اكتسياسى اياسىندا قحا, ەتنومادەني بىرلەستىكتەر ءمۇشەلەرى سۋ تاسقىنىنان زارداپ شەككەن قاراعاندى وبلىسىنىڭ تۇرعىندارىنا كومەك كورسەتتى. كومەك قولىن سوزۋعا اشىلعان پۋنكتتەرگە حالىق كوپ قايىرىلدى. «قاراعاندى وبلىسىنىڭ سۋ تاسقىنىنان زارداپ شەككەن تۇرعىندارىنا كومەك قورى» قوعامدىق قورىنىڭ ارنايى شوتىنا 12 ملن. 400 مىڭ تەڭگە اۋدارىلدى. 102 توننا گۋمانيتارلىق كومەك – ازىق-ت ۇلىك, ءدارى-دارمەكتەر, تۇرمىستىق حيميا زاتتارى, كيىم, جيھاز جونەلتىلدى, كومەك كورسەتۋ ءالى دە جالعاسۋدا.
رەسپۋبليكالىق «قحا – 20 ىزگى ءىس» اكتسياسى 2015 جىلدىڭ سوڭىنا دەيىن جالعاسادى.
23 ناۋرىزدان باستاپ 22 ساۋىرگە دەيىن 30 كۇن ىشىندە ەلىمىزدىڭ 29 ەلدى مەكەنىن ارالاپ شىققان «مەنىڭ قازاقستانىم» پويىزى» اتتى رەسپۋبليكالىق اكتسيا ءوتكىزىلدى. اۋقىمدى الەۋمەتتىك اكتسيانىڭ ماقساتى – مەملەكەت باسشىسىنىڭ جولداۋلارىنىڭ نەگىزگى تاراۋلارىن حالىققا ءتۇسىندىرۋ, «ماڭگىلىك ەل» جالپىۇلتتىق يدەياسىن ناسيحاتتاۋ, تۇرعىندارعا مەديتسينالىق, الەۋمەتتىك, قۇقىقتىق قىزمەت كورسەتۋ, كاسىپكەرلىكتى قولداۋ, اۋىل شارۋاشىلىعىن دامىتۋ تۋرالى كەڭەستەر بەرۋ, مادەني جانە قوعامدىق, ت.ب. ءىس-شارالار وتكىزۋ.
مينيسترلىكتەر مەن ۆەدومستۆولاردىڭ ماماندارى 4,5 مىڭنان اسا الەۋمەتتىك, مەديتسينالىق, قۇقىقتىق جانە باسقا كەڭەستەر بەردى. قوعامدىق كەلىسىم كەڭەستەرىنىڭ قوعامدىق قابىلداۋلارىندا پارلامەنت دەپۋتاتتارى 320-دان اسا ادامدى قابىلدادى. كوپتەگەن ماسەلەلەر جەرگىلىكتى جەرلەردە شەشىمىن تاپتى. 9 مىڭنان ارتىق ادامعا رەسپۋبليكانىڭ جەتەكشى ماماندارىمەن مەديتسينالىق كومەكتەر كورسەتىلدى. جەكە مارشرۋتپەن الىس بەكەتتەر مەن ايالدامالاردىڭ 20 مىڭ تۇرعىنىنا «دەنساۋلىق پويىزدارى» – «سالاماتتى قازاقستان», «دەنساۋلىق» جانە «ءجاردەم» پويىزدارى مەديتسينالىق كومەك كورسەتتى.
ەلباسى نۇرسۇلتان ءابىش ۇلى نازارباەۆتىڭ قوعامدىق كەلىسىم مەن بىرلىك ۇلگىسىنىڭ تانىستىرىلىمىنا الىس ەلدى مەكەندەردىڭ 6 مىڭ تۇرعىنى, «مەنىڭ ەلىم – ماڭگىلىك ەل!» كورمەسىنە 5 مىڭ 300 ادام قاتىستى. 20 مىڭنان ارتىق جاس قاتىسقان پاتريوتتىق اكتسيالار, فلەش-موبتار, كتك ويىندارى وتكىزىلدى.پويىزدىڭ ءجۇرۋ جولىندا قحا-نىڭ «تەڭدەسسىز سىيلىق» قايىرىمدىلىق اكتسياسى اياسىندا كىتاپحانالارعا مەملەكەتتىك ەتنوساياسات بويىنشا عىلىمي ەڭبەكتەر تارتۋ ەتىلدى.
اسسامبلەيا جىلىنىڭ قورىتىندىسى 2015 جىلعى جەلتوقسان ايىندا قازاقستان حالقىنىڭ فورۋمىندا شىعارىلادى. مەملەكەتتىك حاتشىنىڭ الدىنداعى كەڭەستە وسى ماسەلەلەر ايتىلدى.
سونداي-اق, ءماجىلىس بارىسىندا قازاقستان حالقى اسسامبلەياسى جىلىنىڭ ارالىق قورىتىندىلارى شىعارىلىپ, ءىس-شارالاردىڭ ۇلتتىق جوسپارىن ودان ءارى ىسكە اسىرۋ جانە اسسامبلەيا قىزمەتىن اقپاراتتىق جاعىنان قولداۋ ماسەلەلەرى تالقىلاندى.
وتىرىستىڭ قورىتىندىسى بويىنشا مەملەكەتتىك حاتشى قازاقستان حالقى اسسامبلەياسى جىلىنىڭ ءىس-شارالارىن «بارشاعا ورتاق قازىرگى زامانعى مەملەكەت» ۇلت جوسپارى – 100 ناقتى قادامداعى «بىرتەكتىلىك جانە بىرلىك» ءتورتىنشى ينستيتۋتتىق رەفورمانىڭ باسىمدىعى اياسىندا ودان ءارى ىسكە اسىرۋ جونىندە بىرقاتار تاپسىرمالار بەردى.
وتىرىس جۇمىسىنا پارلامەنت دەپۋتاتتارى, مەملەكەتتىك ورگانداردىڭ وكىلدەرى, رەسپۋبليكالىق ەتنومادەني بىرلەستىكتەردىڭ جەتەكشىلەرى, قحا عىلىمي-ساراپشىلىق كەڭەسىنىڭ مۇشەلەرى, بۇقارالىق اقپارات قۇرالدارىنىڭ وكىلدەرى قاتىستى.
جاقسىباي سامرات,
«ەگەمەن قازاقستان».
