قازاقستان پرەزيدەنتى – قازاقستان حالقى اسسامبلەياسىنىڭ توراعاسى ن.ءا.نازارباەۆتىڭ قازاقستان حالقى اسسامبلەياسى جىلىنىڭ رەسمي باستالۋىنا ارنالعان قۇتتىقتاۋ ءسوزى
قىمباتتى وتانداستار, قۇرمەتتى قازاقستاندىقتار!
بۇگىن ەلىمىزدە مەنىڭ جارلىعىممەن جاريالانعان قازاقستان حالقى اسسامبلەياسىنىڭ جىلى رەسمي اشىلىپ, باستالادى. جىل ەڭ باستى ورتاق قۇندىلىقتارىمىز – تاۋەلسىزدىگىمىزدى, ەگەمەندىگىمىزدى, بىرلىگىمىزدى, قازاقستان حالقىنىڭ بەيبىتشىلىگى مەن كەلىسىمىن ساقتاۋعا ارنالادى. وسىدان 20 جىل بۇرىن, 1995 جىلدىڭ 1 ناۋرىزىندا ءبىزدىڭ قوعامداعى بەيبىتشىلىك پەن كەلىسىمدى ساقتاۋعا ارنالعان بىرەگەي ينستيتۋت – قازاقستان حالقى اسسامبلەياسىن قۇرۋ تۋرالى جارلىققا قول قويدىم. وسى ۋاقىت ارالىعىندا اسسامبلەيا شىنايى تۇردە جالپىحالىقتىق, ازاماتتىق, ساياسي مۇددەلەردەن جوعارى تۇرعان ۇيىم رەتىندە تانىلدى, كونستيتۋتسيالىق مارتەبەگە يە بولدى. بۇگىنگى تاڭدا قازاقستان حالقى اسسامبلەياسى ەلىمىزدەگى بارلىق ۇلت پەن ۇلىستى ءبىر شاڭىراق استىنا توپتاستىراتىن ماڭىزدى قۇرىلىمعا اينالدى. سوندىقتان اسسامبلەيا جىلى – 17 ميلليون قازاقستاندىقتاردىڭ ورتاق مەرەكەسى. ەلىمىزدىڭ ءاربىر ازاماتى اتامەكەنىمىزدەگى بەيبىتشىلىك پەن كەلىسىمدى ساقتاۋعا جاۋاپتى ەكەنىن ايقىن سەزىنۋى كەرەك. بۇل – قازاقستان بولاشاعىنىڭ نەگىزى. اسسامبلەيا جىلى «قازاقستان-2050» ستراتەگياسىنىڭ ماقساتتارىنا جەتۋدىڭ ناقتى ىستەرى مەن جاڭا جەتىستىكتەرى جىلى بولادى. ءبىز «نۇرلى جول – بولاشاققا باستار جول» دەپ اتالاتىن جاڭا ەكونوميكالىق ساياساتتىڭ نەگىزگى مىندەتتەرىن ىسكە اسىرۋعا كىرىستىك. اسسامبلەيا جىلى كونستيتۋتسيانىڭ 20 جىلدىعى, قازاق حاندىعىنىڭ 550 جىلدىعى جانە ۇلى جەڭىستىڭ 70 جىلدىعى سياقتى ماڭىزدى وقيعالارعا تولى. بۇل جىل – ورتاق تاريح پەن تاعدىر ماڭگىلىككە بىرىكتىرگەن حالقىمىزدىڭ بىرلىگىن پاش ەتەتىن جىل. قازاقستان – بۇل ءبىرتۇتاس جەر, ءبىرتۇتاس حالىق, ورتاق بولاشاق! سوندىقتان, اسسامبلەيا جىلىنىڭ باستى يدەياسى – «مەنىڭ ەلىم – ماڭگىلىك ەل!». مەن بارلىق قازاقستاندىقتاردى اسسامبلەيا جىلىنىڭ باستالۋىمەن قۇتتىقتايمىن! ەگەمەندىك, بىرلىك جانە كەلىسىم رۋحى بولاشاققا دەگەن سەنىمىمىزدى ارتتىرىپ, كۇش-قۋاتىمىزدى ەسەلەسىن! ءبىز – تاعدىرى ورتاق, بىرلىگى جاراسقان ءبىرتۇتاس ەلمىز! ءبىزدىڭ قازاقستاندىق جول – بەيبىتشىلىك, كەلىسىم جانە دامۋ جولى!
بيىل – قازاقستان حالقى اسسامبلەياسىنىڭ جىلى. سەبەبى, وتكەن جىلى مەملەكەت باسشىسى نۇرسۇلتان نازارباەۆتىڭ جارلىعىمەن 2015 جىل – قازاقستان حالقى اسسامبلەياسىنىڭ جىلى دەپ جاريالانعان ەدى. سوندىقتان, حالىقتىق سيپاتقا يە بۇل شارا جىل بويى ەلىمىزدىڭ جەر-جەرىندە ايرىقشا ماندە اتالىپ وتپەك.
كەشە قحا جىلىنىڭ اشىلۋىنا ارنالعان سالتاناتتى ءراسىم بەيبىتشىلىك جانە كەلىسىم سارايىندا ۇيىمداستىرىلدى. وعان مەملەكەتتىك حاتشى گۇلشارا ابدىقالىقوۆا, قحا توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, استانا قالاسىنىڭ اكىمى ادىلبەك جاقسىبەكوۆ, اقمولا وبلىسىنىڭ اكىمى سەرگەي كۋلاگين, پارلامەنت دەپۋتاتتارى, قازاقستان حالقى اسسامبلەياسىنىڭ مۇشەلەرى, تانىمال قوعام قايراتكەرلەرى, زيالى قاۋىم, ەتنومادەني بىرلەستىكتەر مەن ۇكىمەتتىك ەمەس ۇيىمداردىڭ وكىلدەرى, تانىمال سپورتشىلار مەن جاستار قاتىستى.
سالتاناتتى شارا باستالماس بۇرىن بەيبىتشىلىك جانە كەلىسىم سارايىنىڭ الدىندا «جاستار قوعامدىق كەلىسىمدى قولدايدى» تاقىرىبىندا فلەش-موب, ال فلەش-موب اياقتالعاننان كەيىن قازاقستان حالقى اسسامبلەياسى جىلىنىڭ تۋىن كوتەرۋ ءراسىمى ءوتتى. تۋدى الاڭعا وليمپيادا چەمپيوندارى ولگا شيشيگينا مەن ەرماحان ىبىرايىموۆ, ەكى دۇركىن الەم چەمپيونى جانە ەكى دۇركىن ازيا چەمپيونى يۋري مەلنيچەنكو, بىلعارى قولعاپ شەبەرى ءىلياس سۇلەيمەنوۆ, قازاق كۇرەسىنەن الەمنىڭ ءۇش دۇركىن چەمپيونى, 2013 جىلدىڭ «قازاقستان بارىسى» ايبەك نۇعىماروۆ الىپ شىعىپ, ونى اسسامبلەيا ارداگەرلەرى – ورالباي ابدىكارىموۆ پەن ولەگ دىموۆقا تابىس ەتتى. ال اسسامبلەيا ارداگەرلەرى قحا جىلىنىڭ تۋىن كوتەرۋ ءراسىمىن ورىنداعان سوڭ, قاتىسۋشىلار نازارىنا ەتنومادەني بىرلەستىكتەردىڭ قولونەر شەبەرلەرىنىڭ دۇنيەلەرى قويىلعان «حالىق مۇراسى» كورمە-جارمەڭكەسى ۇسىنىلدى. بۇدان كەيىن سالتتاناتتى ءراسىم بەيبىتشىلىك جانە كەلىسىم سارايىنىڭ وپەرا زالىندا جالعاستى. العاشقى بولىپ ءسوز العان مەملەكەتتىك حاتشى گۇلشارا ابدىقالىقوۆا بيىلعى جىل قازاقستان تاريحىندا ايرىقشا ءمانى مەن ماڭىزعا يە مەرەيتويلار جىلى بولىپ قالاتىنىن جانە بۇل جىل قازاق ەلىنىڭ بىرلىگى مەن ىنتىماعىن ايقىندايتىن بەلەستى كەزەڭ ەكەنىن اتاپ ءوتتى. وتكەن جىلى مەملەكەت باسشىسى نۇرسۇلتان نازارباەۆتىڭ جارلىعىمەن «2015 جىل – قازاقستان حالقى اسسامبلەياسىنىڭ جىلى» دەپ جاريالانعان ەدى. وسىعان وراي, ارنايى ۇلتتىق جوسپار قابىلداندى. قازىرگى كەزدە ەلىمىزدىڭ بارلىق وڭىرىندە, ەلوردامىز استانادا وسى جىلعا بايلانىستى, ۇلتتار اراسىنداعى دوستىقتى, بىرلىكتى, بولاشاققا دەگەن سەنىمدى پاش ەتەتىن ۇلكەن ءىس-شارالار باستالىپ كەتتى, دەدى مەملەكەتتىك حاتشى. وسىلاي دەي كەلە, گۇلشارا ناۋشاقىزى اسسامبلەيا جىلىنىڭ اشىلۋىنا بايلانىستى قازاقستان پرەزيدەنتى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ قۇتتىقتاۋ ءسوزىن وقىپ بەردى. مەملەكەتتىك حاتشىنىڭ سوزىنەن كەيىن «قحا – 20 ىزگى ءىس» اتتى ەستافەتانىڭ سيمۆولى – تايقازاندى استانا قالاسىنىڭ اكىمىنە تاپسىرۋ ءراسىمى ءوتتى. قاسيەتتى تايقازاننىڭ كوشىرمەسى 1 اقپان كۇنى تۇركىستانداعى قوجا-احمەت ياساۋي كەسەنەسىنەن جەتكىزىلگەن ەدى. ەلورداعا اكەلىنگەن بۇل سيمۆول الداعى ۋاقىتتا ەلىمىزدىڭ بارلىق وڭىرلەرىنە جىبەرىلىپ, قازاقستان حالقى اسسامبلەياسىنىڭ XXII سەسسياسىنىڭ اشىلۋى قارساڭىندا قايتادان استاناعا ورالاتىن بولادى. وسىناۋ راسىمنەن كەيىن ءسوز العان قحا توراعاسىنىڭ ورىنباسارى ەرالى توعجانوۆ پەن استانا قالاسىنىڭ اكىمى ادىلبەك جاقسىبەكوۆ اسسامبلەيا جىلىنىڭ قوعام ومىرىندە الاتىن ورنىنا توقتالىپ ءوتتى. ماسەلەن, ەرالى توعجانوۆ: «ەلباسى 2015 جىلدى قازاقستان حالقى اسسامبلەياسىنىڭ جىلى» دەپ بەكەر جاريالاعان جوق. سەبەبى, قحا – بىرلىكتىڭ, ەلدىكتىڭ, تۇراقتىلىقتىڭ بەلگىسى. سوندىقتان, ءاربىر قازاقستان ازاماتىنىڭ تىكەلەي اتسالىسۋىنىڭ ارقاسىندا عانا ءبىزدىڭ بىرلىگىمىز ودان ءارى نىعايا تۇسەدى. سىزدەردىڭ الدارىڭىزعا قاسيەتتى تايقازان كەلدى. ونى ءبىزدىڭ ءبىر توپ دەلەگاتسيا وكىلدەرى تۇركىستان قالاسىنان وسىدان 4 كۇن بۇرىن الىپ كەلگەن ەدى. تايقازان – قيىن-قىستاۋ كەزەڭدە ەلدىڭ باسىن بىرىكتىرۋگە سەپ بولعان قاسيەتتى مۇرا», دەي كەلە, قحا جىلىنىڭ اشىلۋىمەن بارشا قازاقستاندىقتى قۇتتىقتادى. ال استانا قالاسىنىڭ اكىمى ادىلبەك جاقسىبەكوۆ تە مەملەكەت باسشىسىنىڭ جارلىعى نەگىزىندە قۇرىلعان اسسامبلەيا بۇگىندە قوعام ءۇشىن ماڭىزدى جۇمىستاردى اتقارىپ كەلە جاتقانىن تىلگە تيەك ەتتى. حالقىمىزدا «ىنتىماقتى ەلدىڭ ىرىسى مول» دەگەن دانا ءسوز بار. بۇگىندە ءبىز كەلىسىم مەن بىرلىكتىڭ, تاتۋلىق پەن ىنتىماقتىڭ ارقاسىندا الەم مويىندايتىن ەلگە اينالدىق. دەمەك, بۇل ءبىز ءۇشىن ەرەكشە مەرەيتوي. ءبىز «قحا – 20 ىزگى ءىس» ەستافەتاسىن باستاپ وتىرمىز. بۇل ەستافەتانىڭ سيمۆولى – تايقازان. الداعى ۋاقىتتا ءبىز وسى ەستافەتانىڭ اياسىندا جانە اسسامبلەياعا قولداۋ كورسەتۋ ماقساتىندا 20 ماڭىزدى ءىس-شارانى اتقاراتىن بولامىز. بۇگىن ءبىز كەلىسىم مەن بىرلىكتىڭ مەكەنى – استانادان باستالعان ەستافەتانى اقمولا وبلىسىنا, ونىڭ اكىمى سەرگەي كۋلاگينگە تاپسىرامىز, دەدى ءا. جاقسىبەكوۆ.
استانا قالاسىنىڭ اكىمىنەن ەستافەتانى قابىلداپ العان اقمولا وبلىسىنىڭ اكىمى سەرگەي كۋلاگين: «بۇل – ءبىز ءۇشىن ەرەكشە كۇن. قازاقستان – پوستكەڭەستىك كەڭىستىكتەگى ەتنوستاردىڭ بىرلىگى مەن تاتۋلىعىن پاش ەتكەن بىردەن-ءبىر ەل. ال قازىرگى تاڭدا اينالامىزدا ەلدەردىڭ كوبىسىندە جاعداي كۇردەلى بولىپ تۇر. سوندىقتان, مۇنداي قوعامدىق ينستيتۋتتىڭ ءرولى قاشاندا ماڭىزدى. ەلباسى كونستيتۋتسيالىق مارتەبەگە يە وسىنداي ينستيتۋتتى ەتنوسارالىق تاتۋلىقتى قامتاماسىز ەتۋ ماقساتىندا قۇردى. بۇل – ءبارىمىز ماقتان ەتۋگە ءتيىس قۇرىلىم. سوندىقتان, قحا جىلىنىڭ 20 جىلدىعى ءبىز ءۇشىن ەرەكشە مەرەيتوي. ءبىزدىڭ مەملەكەتىمىز ءوزى ايقىنداعان جولدان اداسپاي, ەلدىڭ تاتۋلىعى مەن بىرلىگى جولىندا ودان ءارى دامي بەرەدى دەپ سەنەمىز», دەدى. بەيبىتشىلىك جانە كەلىسىم سارايىنىڭ وپەرا زالىندا وتكەن مەرەيتويلىق شارا كەزىندە, سونداي-اق, قازاقستان حالقى اسسامبلەياسى جىلى اياسىندا ۇيىمداستىرىلاتىن 9 ءتۇرلى رەسپۋبليكالىق بايقاۋلاردىڭ باستالعانى جاريالاندى. ولار: «تاريحتان – تاعىلىم, وتكەنگە – تاعزىم», «مىڭ بالا», «ارمانداعان ماماندىق», «جۇرەكتەن جۇرەككە», «مەيىرىمدىلىكتەن بىرلىككە», «ۇلت رۋحى», «شاڭىراق» سەكىلدى تاقىرىپتار اياسىندا وتپەك. بۇل كونكۋرستاردىڭ قورىتىندىسى وسى جىلدىڭ جەلتوقسان ايىندا ۇيىمداستىرىلاتىن قازاقستان حالقى اسسامبلەياسىنىڭ فورۋمىندا شىعارىلاتىن بولادى.
ءلايلا ەدىلقىزى, جولدىباي بازار, «ەگەمەن قازاقستان».
وقيعاعا ورايلاس وي
اسسامبلەيا ەلدىك مۇددەگە قىزمەت ەتۋدە
كامال بۇرحانوۆ, پارلامەنت ءماجىلىسىنىڭ دەپۋتاتى. قازاقستان حالقى اسسامبلەياسى – ەلباسى نۇرسۇلتان نازارباەۆتىڭ تۋىندىسى. سوناۋ 1995 جىلى قۇرىلعان بۇل ۇيىمنىڭ موينىندا ۇلكەن جاۋاپكەرشىلىك بار. ول ءوز قىزمەتىن باستاعالى بەرى ەل يگىلىگى جولىندا كوپتەگەن شارالاردى جۇزەگە اسىردى. بارىنەن دە, قازاقستانداعى وزگە ۇلت وكىلدەرىنىڭ باستى كىسىلەرىنە ەلدىك مۇددەگە قىزمەت ەتۋگە مۇمكىندىك بەردى, سونداي-اق, ولاردى ءبىر ماقساتقا جۇمىلدىرا ءبىلدى. ىنتىماق-بىرلىگى جاراسقان ەلىمىزدىڭ وركەندەۋىنە اسسامبلەيانىڭ قوسىپ وتىرعان ۇلەسى زور. سونىڭ ايعاعى رەتىندە مەملەكەتىمىزدە ۇلتارالىق كەلىسىم مەن تىنىشتىقتىڭ ساقتالىپ وتىرعانىن ايتار ەدىم. اسسامبلەيانىڭ باسشىسى, ەلباسىمىز نۇرسۇلتان نازارباەۆتىڭ ارقاسىندا, سونداي-اق, وسى ينستيتۋتتىڭ ساۋاتتى ءىس-ارەكەتتەرىنىڭ ىقپالىمەن قوعامىمىزدا قالىپتاسقان تاتۋلىقتى قازاقستاننىڭ ەڭ باستى قۇندىلىقتارىنىڭ ءبىرى دەپ سانايمىن. ونى ءبىز كوزىمىزدىڭ قاراشىعىنداي ساقتاي ءبىلۋىمىز كەرەك. قازىرگى الەمدە ءتۇرلى قاقتىعىستار مەن كەلەڭسىز وقيعالار ورىن الۋدا. ولاردىڭ اتىن اتاپ, ءتۇسىن تۇستەمەي-اق قويايىن. مىنە, سونداي جاعدايلار بىزدەن اۋلاق تۇر. بۇعان توقمەيىلسىمەي, بىرلىگىمىزدى ودان ءارى نىعايتا بەرگەنىمىز ءجون. ىنتىماعى جوق ەلدە بەرەكە بولمايتىنىن ايتىپ جاتۋدىڭ ءوزى ارتىق. سوندىقتان, مەملەكەتىمىزدىڭ ىشكى بىرلىگى ءۇشىن اتقارىلىپ جاتقان ءاربىر شارا ءبىز ءۇشىن ماڭىزدى.
قازاقستان – بىرلىگى جاراسقان ەل
مۋحامماد فارۋك باراكي, اۋعانستان يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى. مەنىڭ بۇل ەلگە دەگەن كوزقاراسىم وتە جاقسى. مەملەكەتتىڭ ىشكى تاتۋلىعى تالايعا ۇلگى. قازاقستاندا جاراسىمدى ىستەر وتە كوپ. مۇنىڭ بارلىعى پرەزيدەنت نۇرسۇلتان نازارباەۆتىڭ باستاماسىمەن, ۇيىمداستىرۋىمەن جۇزەگە اسىرىلىپ جاتقانىن بىلەمىن. جالپى, ىنتىماعىن بارىنەن جوعارى قويعان مەملەكەت ەشقاشان ۇتىلمايدى. جەڭىس تە, جەمىس تە سول ەلدەن كەتپەيدى. قازاقستاندىقتار مۇنى جاقسى تۇسىنەدى دەپ ويلايمىن. ەل پرەزيدەنتى وسىدان 20 جىل بۇرىن قۇرعان قازاقستان حالقى اسسامبلەياسى بۇگىندە ۇلكەن قوشەمەتكە يە بولىپ وتىر. بۇدان ءبىز جاقسىلىقتىڭ نىشانىن كورەمىز. قازاقستان حالقى اسسامبلەياسى جىلىنىڭ اشىلۋ سالتاناتى جوعارى دەڭگەيدە ءوتتى. ماعان قاتتى ۇنادى. ەل اعالارىنىڭ بىرلىككە شاقىرعان سوزدەرى قۇلاعىما جىلى ءتيدى. اسىرەسە, شارا بارىسىندا حالىقتىڭ اتالعان قۇرىلىمعا دەگەن ىقىلاسىنا ءتانتى بولدىم. بۇل اسسامبلەيانىڭ قازاقستان ءۇشىن بەرەرى ءالى الدا. مەن سونى ۇقتىم. ويتكەنى, تاتۋلىقتى تۋ ەتكەن ۇيىم قاشاندا ومىرشەڭ كەلەدى.
ىنتىماقتى ەلدىڭ ىرىسى ورتايمايدى
حاسان شاريپوۆ, استانا قالالىق قازاقستان حالقى اسسامبلەياسى وزبەك ەتنومادەني بىرلەستىگى توراعاسىنىڭ ورىنباسارى. مەملەكەت باسشىسى نۇرسۇلتان نازارباەۆتىڭ باستاماسىمەن قۇرىلعان قازاقستان حالقى اسسامبلەياسىنىڭ ناتيجەلى جۇمىستارىنا كۋا بولىپ كەلەمىز. وسى قۇرىلىمنىڭ قوعامىمىزدا تاتۋلىق پەن بىرلىكتىڭ بەرىك ورناۋىنا سۇبەلى ۇلەس قوسىپ وتىرعانىن ەشكىم جوققا شىعارا المايدى. بۇل – پرەزيدەنتتىڭ جۇرگىزىپ كەلە جاتقان سارابدال ساياساتىنىڭ جارقىن كورىنىسى. مۇنىڭ بارلىعى تۇپتەپ كەلگەندە, ەل بىرلىگىن نىعايتىپ, ەرتەڭگى كۇنگە سەنىممەن قادام باسۋ ماقساتىنداعى اۋقىمدى ىستەر. بيىل قازاقستان حالقى اسسامبلەياسىنىڭ قۇرىلعانىنا 20 جىل تولادى. وسىنىڭ كۇرمەتىنە وراي تۇتاستاي ءبىر جىل قازاقستان حالقى اسسامبلەياسىنا ارنالىپ وتىر. تۇسىنگەن جانعا بۇل تەك اتالعان ينستيتۋتقا عانا ەمەس, بۇكىل ەلىمىزگە, ونىڭ ىنتىماعى مەن بىرلىگى جاراسقان حالقىنا دەگەن شىنايى قۇرمەت. مۇنى ءاربىر قازاقستاندىق ازامات تەرەڭ ۇعىنۋى كەرەك. ەلورداداعى وزبەك ەتنومادەني بىرلەستىگى ەلىمىزدەگى ۇلتارالىق كەلىسىمنىڭ نىعايا تۇسۋىنە بار مۇمكىندىگىنشە قولداۋ بىلدىرە بەرەدى. بۇل – ءبىز ءۇشىن ابىرويلى مىندەت. قازاقستان حالقى اسسامبلەياسىنىڭ جىلى قۇتتى بولسىن, اعايىن!
ەڭ باستىسى – ۇلتارالىق كەلىسىم
اتساليم يديگوۆ, چەشەن ۇلتىنىڭ وكىلى, الماتى وبلىستىق «وگني الاتاۋ» قوعامدىق-ساياسي گازەتىنىڭ باس رەداكتورى. ەلباسى نۇرسۇلتان نازارباەۆتىڭ ءوزى باس بولىپ قۇرعان قازاقستان حالقى اسسامبلەياسىنىڭ اتاق-داڭقى قازىرگى تاڭدا ەلىمىزدىڭ اۋماعىنان اسىپ, الەمگە تانىلدى. بۇل – ءبىز ءۇشىن ۇلكەن ماقتانىش. اتالعان قوعامدىق ينستيتۋتتىڭ باعىت-باعدارىنا, العا قويىپ وتىرعان ماقساتىنا تالايلار قىزىعىپ قارايدى. الەم ەلدەرى اراسىندا زامان تالابىنا وراي ءوز قىزمەتىن ۇقىپتى اتقارىپ كەلە جاتقان ءبىزدىڭ اسسامبلەيادان ۇلگى العىسى كەلەتىندەر جەتكىلىكتى. بۇدان ءبىز پرەزيدەنتىمىزدىڭ ۇستانعان ساياساتىنىڭ دۇرىستىعىن انىق اڭعارامىز. ورتاق شاڭىراعىمىز – قازاقستاندا ءومىر ءسۇرۋ قولايلى. بۇعان كوپتەگەن مىسالدار كەلتىرۋگە بولادى. اسىرەسە, ەلىمىزدە جاساپ جاتقان ءتۇرلى ەتنوستاردىڭ ءتىلىن, ءدىلىن, مادەنيەتىن, سالت-ءداستۇرىن قۇرمەتتەپ قانا قويماي, ولاردى دامىتۋعا باعىتتالعان جۇمىستار كوڭىل تولقىتادى. ەل مەن جەردىڭ يەسى – قازاقتىڭ اتا-بابالارى كەزدەسكەن قيىندىقتاردىڭ بارلىعىن جەڭە وتىرىپ, كەيىنگىگە كوپتەگەن يگىلىكتەردى مۇراعا قالدىردى. ەندى ءبىز كەشەگىلەر اماناتقا قالدىرعان وسى قۇندىلىقتاردى كەلەر ۇرپاقتىڭ قولىنا شاشپاي-توكپەي تاپسىرۋىمىز كەرەك. وسىناۋ قاسيەتتى پارىزدى ورىنداۋىمىز ءۇشىن بىزدە ەڭ باستىسى اۋىزبىرشىلىكتىڭ بولعانى ءجون. ونسىز ەشقانداي ناتيجەگە جەتە المايمىز.
ەلباسىنا العىسىمىز مول
تامارا شيرمەر, استانا قالاسىنداعى «وبەرەگ» ۋكراين ەتنومادەني بىرلەستىگىنىڭ جەتەكشىسى. قازاقستان حالقى اسسامبلەياسىنىڭ جۇمىسىن قالاي ايتساڭ دا جاراسادى. ونىڭ اياسىندا «وبەرەگ» ۋكراين ەتنومادەني بىرلەستىگى دە كوپتەگەن يگى ىستەردىڭ ۇيىتقىسى بولىپ ءجۇر. ءبىز ءتۇرلى مادەني-رۋحاني, قايىرىمدىلىق شارالارىن وتكىزۋدە ەشكىمنەن كەندە قالعان ەمەسپىز. مۇنىڭ ءبارى قازاقستاننىڭ دامۋىنا, العا جىلجۋىنا از دا بولسا ءوز ۇلەسىمىزدى قوسساق دەگەن ىستىق ىقىلاستان تۋىندايتىنىن ايتقىم كەلەدى. ءبىز بىرلىگى مىعىم, حالقىنىڭ تۇرمىسى جاقسى, بەيبىتشىلىكتى تۋ ەتكەن وتانىمىز – قازاقستاندا ءومىر ءسۇرىپ جاتقانىمىزدى ماقتان ەتەمىز. پرەزيدەنت نۇرسۇلتان نازارباەۆقا, قازاق حالقىنا العىسىمىز شەكسىز. وسىنداي مەملەكەتتىڭ ازاماتى بولۋ – ءبىز ءۇشىن تاعدىردىڭ سىيى. قازاقستان حالقى اسسامبلەياسىنىڭ الەۋەتى ارتا بەرسىن. ىنتىماق ءۇشىن, بىرلىك ءۇشىن جاسالعان ءاربىر قادامىمىز جەمىستى بولعاي! قىسقاسى, بىرلىك, تاتۋلىق – قاسيەتتى ۇعىمدار. ونى قاستەرلەي ءبىلۋىمىز كەرەك. قازاق «بىرلىك, بىرلىك ءتۇبى – تىرلىك» دەپ تەگىننەن-تەگىن ايتپاعان. مۇنى ۇققان – ىرىلىك.
ءبىز – تۋرا جولدامىز
يۆان ساۋەر, «رودينا» جشس اگروفيرماسىنىڭ باس ديرەكتورى. ەلىمىزدىڭ بۇگىنگى تىنىس-تىرشىلىگىنە قاراپ وتىرىپ, پرەزيدەنت نۇرسۇلتان نازارباەۆتىڭ كورسەتۋىمەن تۋرا جولدا كەلە جاتقانىمىزدى بىلەمىز. مۇنى ءبارى دە مويىندايدى. بۇل ءبىزدىڭ ماقتانىش سەزىمىمىزدى تۋدىرادى. وتانىمىزدا قولعا الىنعان, جۇزەگە اسقان ءىرى جوبالار مول. سولاردىڭ اراسىندا مەن ءۇشىن قازاقستان حالقى اسسامبلەياسىنىڭ ورنى بولەك. وسى قۇرىلىمنىڭ ەل ومىرىندەگى ورنى حالىق تاراپىنان وڭ باعاسىن الۋدا. بۇعان قوسا ايتارىم, 2015 جىل اسسامبلەيا جىلى دەپ جاريالاندى. مەنىڭشە, بۇل جىل ەل تاريحىندا التىن ارىپپەن جازىلىپ قالادى. بۇعان قوسارىم, اسسامبلەيا ءبىزدىڭ قوعامىمىزدا جوعارى ماڭىزعا يە. ويتكەنى, ول ەل بىرلىگىن نىعايتۋ ماقساتىندا قۇرىلعان. اتالعان ينستيتۋتتىڭ قانداي جۇمىس اتقارىپ وتىرعانىن حالىق بىلەدى. سوندىقتان دا ول قوعامىمىزدا جوعارى باعالانۋدا. قازاقستانداعى تاتۋلىق پەن بىرلىككە قىزىعا قارايتىندار كوپ. بۇل, ارينە, ءبىزدىڭ ۇلكەن جەتىستىگىمىز. الەمدە بولىپ جاتقان ءتۇرلى وقيعالارعا قاراپ, ەلىمىزدەگى مامىراجاي تىرشىلىككە رازى بولاسىڭ. وسى ورايدا پرەزيدەنت نۇرسۇلتان نازارباەۆقا العىستان باسقا ايتارىمىز جوق.
بىرلىگىمىز – بولاشاعىمىزدىڭ كەپىلى
ەلەنا ماششينسكايا, اقمولا وبلىستىق ءماسليحاتىنىڭ دەپۋتاتى, چۋۆاش ەتنومادەني بىرلەستىگىنىڭ ءتورايىمى. قازاقستان حالقى اسسامبلەياسىنىڭ 20 جىلدىڭ ىشىندە اتقارعان شارۋاسىن بىرەر سوزگە سىيدىرىپ ايتۋ مۇمكىن ەمەس. ۇيىمنىڭ بارلىق كۇشى, ەلباسى نۇرسۇلتان نازارباەۆتىڭ ايتۋى بويىنشا, ەل ىنتىماعىن ساقتاۋعا جۇمىلدىرىلدى. ناتيجەسىن قازىر كورىپ وتىرمىز. ءبىزدىڭ قازاقستان – ءوز جولىن دۇرىس تاڭداعان ەل. وسى باعىتتان اينىماساق, ءالى تالاي بەلەستەردەن وتەمىز. مەملەكەتىمىزدە ورنىققان ۇلتارالىق كەلىسىمدى ودان ءارى نىعايتا تۇسۋگە ىقپال ەتەتىن تەتىكتەر كوپ. ولاردىڭ بارلىعى دا جوعارى مانگە يە. سولاردىڭ اراسىندا اسسامبلەيانىڭ ءجونى باسقا. بۇل ينستيتۋتتىڭ نەگىزىن قالاعان ەلباسى ەكەنى داۋسىز. مەن پرەزيدەنتتىڭ بۇل ساۋاتتى باستاماسىن جوعارى باعالايمىن. ءوز ەلىنىڭ كەلەشەگى ءۇشىن جانى اۋىراتىن ادام عانا وسىنداي ىزگى نيەتتى, اۋقىمدى ىستەردى جولعا قويادى. ەلىمىز جاساي بەرسىن! قولىمىزداعى بارىمىزدى باعالاپ, ىنتىماعىمىزدىڭ قادىرىن ءبىلىپ جۇرەيىك. بىرلىگىمىز – جارقىن بولاشاعىمىزدىڭ كەپىلى. اسسامبلەيا جىلىمەن بارشا قازاقستاندىقتاردى قۇتتىقتايمىن. بارشا قازاقستاندىقتى اسسامبلەيا جىلىن تابىستى وتكىزۋ ءۇشىن ۇلەس قوسۋعا شاقىرامىن.
سۋرەتتەردى تۇسىرگەن ەرلان وماروۆ, «ەگەمەن قازاقستان».
