ءىس-شاراعا قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆ, پرەزيدەنتتىك ورتالىق ديرەكتورى باقىتجان تەمىربولات, مەملەكەتتىك ورگانداردىڭ وكىلدەرى, «ەڭبەك ەرى» اتاعى يەگەرلەرى, «اسسامبلەيا جاستارى» ۇيىمىنىڭ مۇشەلەرى جانە جاستار كوشباسشىلارى سەكىلدى رەسپۋبليكانىڭ ءار قيىرىنان بارلىعى 150-گە تارتا ادام قاتىستى.
– جاستاردى ادال ەڭبەك ەتۋگە جىگەرلەندىرەتىن مىسالداردى جانە ەتنوس وكىلدەرىنىڭ ەل مەن قوعامنىڭ دامۋىنا قوسىپ جاتقان ۇلەسىن مەيلىنشە كەڭىنەن ناسيحاتتاۋ قاجەت. ءبىز جاستاردىڭ جوبالارىنا قولداۋ كورسەتۋدە, جاڭا مۇمكىندىكتەرگە جول اشۋ ماقساتىندا كاسىپتىك ءبىلىم بەرۋ مەكەمەلەرىنىڭ ستۋدەنتتەرىمەن تىعىز قارىم-قاتىناس ورناتىپ كەلەمىز. جۇمىس ىستەيتىن جاستاردىڭ الەۋمەتتىك ءوسۋ يگىلىكتەرىن ۇتىمدى پايدالانىپ, قوعامدىق ومىرگە بەلسەندىلىگى ەسەبىنەن ءوز قارىم-قابىلەتىن شىڭداۋى ماڭىزدى. بۇل فورۋم جاس بۋىننىڭ ءوزارا تانىسۋىنا, تاجىريبە الماسۋىنا, سپيكەرلەردىڭ ەڭبەك جولى قاراپايىم كۇشتىڭ قۋاتىن سەزىندىرەدى دەگەن ويدامىن, – دەدى م.ءازىلحانوۆ.
جەڭىل اقشاعا ەلىرتەتىن جارنامالار قاپتاپ تۇرعان تۇستا مەملەكەت مۇددەسىنە, ەلدىڭ وركەندەۋىنە, قوعامنىڭ دامۋىنا ۇلەس قوساتىن ادال ەڭبەكتىڭ, جۇمىسشى مامانداردىڭ مەرەيىن اسىرۋ, ونى حالىقتىڭ ساناسىنا ءسىڭىرۋ ماڭىزدى بولىپ تۇرعانى راس. فورۋمعا قاتىسقان سەنات دەپۋتاتى ماكسيم روجين جۇمىسشى ماماندىقتاردىڭ جاستارعا تارتىمدى بولۋى ءۇشىن ارەكەت ەتۋ, وعان كوزقاراستى وزگەرتۋ قاجەت دەگەن پىكىردى ايتىپ قالدى.
– ءوندىرىس وشاقتارىنا بارعانىمىزدا كوپ جاعدايدا بىزگە «كادر جەتىسپەيدى, جاستاردى ءوزىمىز ۇيرەتىپ, ءوزىمىز جۇمىسقا تارتامىز» دەپ جاتادى. دەمەك ەل ەكونوميكاسى ءۇشىن ماڭىزدى سالالاردا جۇمىس ىستەگىسى كەلەتىن ازاماتتاردى الدىن الا دايىنداۋعا ءالى دە كۇش سالۋىمىز قاجەت. بايقايتىنىمىز, اۋىلدىق جەرلەردە مۇعالىم, دارىگەرلەرگە عانا جۇمىس بار. بىراق باسقا قاجەت ماماندىق يەلەرىن اۋىلدان تابۋ قيىن, – دەدى م.روجين.
جيىن بارىسىندا وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ بيىل ءبىرىنشى قىركۇيەكتەن باستاپ ءبىر ماماندى كوللەدجدە دايىنداۋ ءۇشىن بولىنەتىن بيۋدجەتتىڭ قۇنى ەكى ەسە ارتاتىنىن جەتكىزدى. سونداي-اق ول بارلىق مەملەكەت مەنشىگىندەگى كوللەدج كەزەڭ-كەزەڭىمەن جاڭا تەحنولوگيالىق, ماتەريالدىق بازامەن جابدىقتالاتىنىن ايتتى.
– جۇمىسشى كادرلار كوبىنەسە كولىك, ساۋدا, ونەركاسىپ جانە اۋىل شارۋاشىلىعى سالالارىندا سۇرانىسقا يە. كادرلاردى دايارلاۋ ساپاسىن قامتاماسىز ەتۋ ءۇشىن جۇمىسشى كاسىپتەرى بويىنشا 1,6 مىڭ كاسىپتىك ستاندارت جاڭارتىلدى. ولاردىڭ نەگىزىندە ءبىلىم بەرۋ باعدارلامالارىنىڭ 87%-ى قايتا ءتۇزىلدى, – دەدى ءا.مۇحانبەتوۆ.
بۇگىندە ەكونوميكالىق بەلسەندى جاستاردىڭ ۇلەسى جۇمىس كۇشىنىڭ جالپى سانىنىڭ 39%-ىن نەمەسە 3,8 ملن ادامدى قۇرايدى. ونىڭ ىشىندە 3,5 ملن-ى – جۇمىسپەن قامتىلعان جاستار.
– قازىر ءبىلىم الۋشىلارعا تاجىريبە جيناقتاۋعا, بەلگىلى ءبىر مەكەمەلەرمەن كەلىسىم اياسىندا پراكتيكادان وتۋگە جاعداي جاسالعان. ماسەلەن, ستۋدەنتتەر اقتوبە فەرروقورىتپا زاۋىتىنا باراتىن بولسا, جالاقى بونۋستارى بەرىلەدى. ونىڭ ۇستىنە ءوزىڭنىڭ قارىم-قابىلەتىڭدى كورسەتسەڭ, جۇمىسقا ورنالاسۋعا مۇمكىندىك بار. مىنە, وسى سەكىلدى ەڭبەك ەتەمىن دەگەن جاندارعا «ەكى قولعا ءبىر كۇرەك» تابىلادى, – دەدى ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتى ۆلاديسلاۆ تولوچكوۆ.
فورۋم اياسىندا «ەڭبەك ەرى – ۇرپاقتار ساباقتاستىعى» جانە «ەڭبەك ادامى – تابىستى تۇلعانىڭ ۇلگىسى» اتتى ارنايى ەكى پانەلدىك سەسسيا ۇيىمداستىرىلدى. جالپى ءىس-شاراعا قازاقستان حالقى اسسامبلەياسى, پرەزيدەنتتىك ورتالىق پەن «اسسامبلەيا جاستارى» رقب ۇيىتقى بولدى.
