گرۋزيندەر ورىس بايكەرلەرىن «گەورگي لەنتاسىن» شەشۋگە ماجبۇرلەدى

الماتى. 3 مامىر. تبيليسي پوليتسياسى ەلدەگى «ەركىن اۋماق» اتتى مەملەكەتتىك ەمەس ۇيىمنىڭ قوزعالىس بەلسەندىلەرىن قاماۋعا الدى. ەرىكتىلەر رەسپۋبليكا اۋماعىنا كەلىپ كىرگەن رەسەيلىك بايكەرلەرگە موتوتسيكلگە بايلاعان گەورگيەۆتىك لەنتانى ءوز قولدارىمەن شەشۋگە ماجبۇرلەگەن. ودان سوڭ لەنتانى اياقتىڭ استىنا سالىپ, تاپتاعان. بۇل تۋرالى «گرۋزيا ونلاين» حابارلادى. قالالىق پوليتسيا قوزعالىس بەلسەندىلەرىمەن 20 مينۋتتىق ءتۇسىندىرۋ اڭگىمەسىن وتكىزگەن سوڭ, بوساتقان. ورىس بايكەرلەرىنە كۇش كورسەتكەندەر ىشىندە گرۋزيالىق جاس جىگىت يراكلي كانتاريانىڭ ەسىمى دۇركىرەپ تۇر. سەبەبى ول – رەيحستاگقا تۋ تىككەن كەڭەستىك جاۋىنگەرلەردىڭ ءبىرى – اتاقتى مەليتون كانتاريانىڭ نەمەرەسى. بىرقاتار باسىلىمدار رەسەيگە قارسى بۇل ناۋقاننىڭ ارەكەتىن «ۇلتتىق بىرلەسۋ پارتياسىنىڭ» ءىس-قيمىلدارىمەن بايلانىستىپ وتىر. ول پارتيانىڭ جەتەكشىسى گرۋزيانىڭ ەكس-پرەزيدەنتى ميحايل سااكاشۆيلي بولىپ تابىلادى. تالعات ءسۇيىنباي. دەرەك, سۋرەت: «گرۋزيا ونلاين».