وشتا قاراقشىلىق جاسادى دەگەن كۇدىكپەن ەكى قازاقستاندىق ۇستالدى

استانا. 3 مامىر. قىرعىزستاننىڭ وش قالاسى اەروپورتىندا قاراقشىلىق شابۋىل جاساۋعا قاتىستارى بار دەگەن كۇدىكپەن ەكى قازاقستاندىق ۇستالدى. بۇل تۋرالى AkiPress حابارلادى. انىقتالعان مالىمەتتەر بويىنشا, 2014 جىلدىڭ جەلتوقسان ايىندا وش قالاسىنداعى اەروپورتتا قاراقشىلىق شابۋىل جاساۋ كەزىندە 6 ملن. 871 مىڭ 378 دوللار اقشا قولدى بولعان. مۇنى قىرعىزستان پارلامەنتى «اتا مەكەن» فراكتسياسىنىڭ وتىرىسىندا ىشكى ىستەر مينيسترلىگى باس تەرگەۋ باسقارماسىنىڭ باستىعى تالانت ۋمەتاليەۆ مالىمدەدى. ونىڭ ايتۋىنا قاراعاندا, جۇرگىزىلگەن زەرتتەۋ شارالارى بارىسىندا كۋا رەتىندە 150 ادامنان مالىمەت سۇرالعان. اقىرىندا ءساۋىر ايىنىڭ اياعىندا وسى قىلمىسقا قاتىسى بار دەگەن كۇدىكپەن ەكى قازاقستاندىق ازامات جانە تۋريستىك فيرمانىڭ جەتەكشىسى ۇستالعان. «راحمانقۇلوۆ, سىرعاباەۆ, زاكيروۆ ۇستالدى, بۇدان بولەك تاعى قازاقستاندىق ەكى ازاماتتىڭ وسىعان قاتىستارى بارلارى انىقتالدى, ولارعا ىزدەۋ جاريالاندى. قازىر ولاردىڭ قولعا تۇسكەندەرى جونىندە اقپار كەلىپ وتىر. ەندى حالىقارالىق كەلىسىم بويىنشا كەلىسسوز جۇرگىزىپ جاتىرمىز», - دەدى ت.ۋمەتاليەۆ. ايتا كەتەيىك, وقيعا 2014 جىلدىڭ 27 جەلتوقسانى كۇنى ورىن العان. قۇقىق قورعاۋ ورگاندارى قىزمەتكەرلەرىنىڭ ۋنيفورما مەن بەتپەردە كيىپ العان 6 ادام «تويوتا ەستيما» ماركالى اۆتوماشينامەن كەلىپ, «وش» اەروپورتىنىڭ ءبىر بولمەسىنە قارۋلى شابۋىل جاسايدى. ولاردىڭ قولدارىندا كالاشنيكوۆ اۆتوماتى بولادى. بەلگىسىز كىسىلەر سول جەردەن ىشىندە 5 ملن. 679 مىڭ دوللار اقشاسى بار 5 ۇلكەن سومكەلەردى الىپ كەتەدى. بۇدان بولەك, كەپىل رەتىندە «اسمان-تۋر» تۋريستىك فيرماسىنىڭ ديرەكتورى رۋسلان كۋلاتوۆتى وزدەرىمەن بىرگە اكەتەدى. قولعا تۇسكەن ازاماتتاردىڭ ءبارى باتكەن وبلىسىنىڭ تۇرعىندارى بولىپ شىقتى. قۇرىش نۇرىمبەت. دەرەك, سۋرەت: AkiPress.