فوتو: instagram.com/aargynbekova
دەپۋتاتتىڭ ايتۋىنشا, دەنساۋلىق ساقتاۋ جۇيەسى, ەڭ كۇردەلى ۇيىمداستىرىلعان قۇرىلىمنىڭ ءبىرى. ونىڭ قيىندىعى اۋرۋدىڭ كوپتىگى مەن قازىرگى زامانعى ەكولوگياعا جانە باسقا قاۋىپتەرگە بايلانىستى جاڭا اۋرۋلاردىڭ پايدا بولۋىنا, ءار پاتسيەنتتىڭ ەرەكشەلىگىنە, مەديتسينالىق كومەكتىڭ ۇدايى قاجەت بولۋىنا جانە ادام اعزاسىنىڭ ءالى دە جان-جاقتى زەرتتەلمەۋىنە بايلانىستى.
الەمدە نانوتەحنولوگيا, ساۋلەمەن دياگنوز قويۋ, گەندىك ينجەنەريا جانە يادرولىق مەديتسينا سياقتى يننوۆاتسيالىق ەمدەۋ ادىستەرى پايدا بولدى. الايدا, ولاردى قازاقستاندا ەنگىزۋ ۇزاققا سوزىلىپ بارادى.
اينۇر ارعىنبەكوۆا الەمدە ەنگىزىلگەن تەحنولوگيالاردى ەلىمىزدىڭ دەنساۋلىق ساقتاۋ جۇيەسىنە جەدەل ەنگىزۋ وتە قيىن ەكەنىن اتاپ ءوتتى. ويتكەنى, جەڭىلدەتىلگەن رۇقسات بەرۋ راسىمدەرىن قولدانۋ قيىن, جاڭا ادىستەردى قولدانۋعا بەرىلگەن ءوتىنىمدى شەشۋ مەرزىمى ناقتى رەتتەلمەگەن, ءتۇرلى مەملەكەتتىك ورگانداردا ساراپتامالىق قورىتىندىنى قايتالاپ وتىرادى.
«قالقانشا بەز اۋرۋىن ەمدەۋگە ارنالعان يود-131 راديوفارماتسەۆتيكالىق پرەپاراتىن تىركەۋ 8 جىلعا سوزىلعانى وسىنىڭ جارقىن مىسالى بولدى دەمەسكە لاج جوق. قالقانشا بەزدىڭ قاتەرلى ىسىگىن راديواكتيۆتى يودپەن ەمدەۋ ءادىسى 1943 جىلى العاش رەت قولدانىلعان بولاتىن. شەتەلدە بۇرىننان قولدانىلىپ كەلە جاتقان گالي, س-مەتيونين, ساماري-153 جانە ليۋتەتسيمەن پەت-دياگنوستيكا تەحنولوگياسىن تىركەۋدە دە وسىعان ۇقساس جاعداي بايقالىپ وتىر. بۇل ماسەلە بويىنشا قازاقستاندا ۇزاق ساراپتامالىق كەلىسۋ ءالى بىتكەن جوق. سوندىقتان وسى ادىستەرگە مۇقتاج پاتسيەنتتەردى ازىرشە شەتەلگە جىبەرۋگە تۋرا كەلۋدە», دەدى اينۇر ارعىنبەكوۆا.
دەپۋتاتتىڭ دەنساۋلىق ساقتاۋ تەحنولوگيالارىن باعالاۋ كەزەڭدەرىن رەگلامەنتتەۋ مەرزىمىن وڭتايلاندىرۋ جانە رۇقسات بەرۋ راسىمدەرىن وڭايلاتۋ, ءتۇرلى مەملەكەتتىك ورگانداردان جاڭا تەحنولوگيالارعا قايتالاما ساراپتامالاردى الىپ تاستاۋ, سونداي-اق يننوۆاتسيالاردى كەلىسۋگە قاتىساتىن مەكەمەلەر بويىنشا كونسۋلتاتيۆتىك-كەڭەسشى ورگانداردىڭ سانىن قايتا قاراۋدى ۇسىنىپ وتىر.
