پوليتسيا دەپارتامەنتى وبلىس اۋماعىندا «ناشاقورلىققا جانە ەسىرتكى بيزنەسىنە قارسى كۇرەستىڭ 2023–2025 جىلدارعا ارنالعان كەشەندى جوسپارىن» ىسكە اسىرۋ اياسىندا باسقا قۇزىرەتتى ورگاندارمەن بىرلەسىپ, ەسىرتكىنىڭ زاڭسىز اينالىمىنا قارسى كۇرەستە ايتارلىقتاي ناتيجەگە قول جەتكىزىلگەنىن مالىمدەدى. جەدەل-پروفيلاكتيكالىق ءىس-شارالار ارقىلى وبلىس پوليتسەيلەرى بىلتىر 665 ەسىرتكى قىلمىسىنىڭ جولىن كەسىپ, زاڭسىز اينالىمنان 400 كيلوعا جۋىق ەسىرتكى زاتتارىن تاركىلەدى.
ماسەلەن, جەدەل ۋاكىلدەر ورداباسى اۋدانىندا مەديتسينالىق مەكەمەنىڭ كۇزەتشىسىن ۇستادى. ونىڭ كولىگىنەن 2400-دەن اسا «ترامادول» تابلەتكاسى تاركىلەنىپ, سوتقا دەيىنگى تەرگەۋ جۇمىستارى جۇرگىزىلىپ جاتىر. سونداي-اق زاڭسىز اينالىمنان 4 كيلودان اسا سينتەتيكالىق ەسىرتكى تاركىلەنگەن. ياعني پوليتسيا «سينتەتيكانىڭ» 8 700 دوزاسىنىڭ تارالۋىنا جول بەرمەدى.
پوليتسەيلەر ينتەرنەت جەلىسىنە مونيتورينگ جۇرگىزۋ بارىسىندا «كيبەرقاداعالاۋ» جۇيەسىنىڭ كومەگىمەن 153 ەسىرتكى سايتىن انىقتاپ, بۇعاتتادى. قىلمىسكەرلەر كوبىنەسە تىيىم سالىنعان زاتتاردى تاراتۋ ءۇشىن Telegram-دا نەمەسە ءتۇرلى سايتتاردا چات-بوتتار ارقىلى جۇمىس ۇسىنادى ەكەن. وسىلايشا, جاستار «جەڭىل اقشاعا» ۇمىتتەنىپ, ەسىرتكى تاراتۋشىلاردىڭ تۇزاعىنا تۇسەدى, سوڭىندا جاۋاپقا تارتىلىپ جاتىر. وسى رەتتە پوليتسيا ەسىرتكىنى جاسىرىن قويىپ كەتتى دەگەن كۇدىكپەن 30-دان اسا جاستى ۇستادى. بۇل ورايدا ءتارتىپ ساقشىلارى ناشاقورلىقتىڭ الدىن الۋ جانە ەسىرتكى قىلمىستارىنا قارسى ءىس-شارالاردى ۇزدىكسىز ۇيىمداستىرىپ كەلەدى. مىسالى, وبلىس پوليتسەيلەرى بەلگىلى سپورتشىلار, انشىلەر, قوعام قايراتكەرلەرى جانە حالىق قالاۋلىلارىن قاتىستىرىپ, سالاماتتى ءومىر سالتىنا جانە ەسىرتكىدەن باس تارتۋعا شاقىرىپ, ءتۇرلى فورۋمدار مەن چەللەندجدەر جاساۋدا. وعان 50 مىڭنان اسا ستۋدەنت پەن جەرگىلىكتى تۇرعىن قاتىسقان. بۇل باعىتتاعى جۇمىس الداعى ۋاقىتتا دا جالعاسادى.
ايتا كەتەلىك, جۋىردا پوليتسيا دەپارتامەنتىنىڭ باستىعى مۇرات قابدەنوۆتىڭ توراعالىعىمەن وتكەن جيىندا جىل باسىنان بەرى تىركەلگەن قىلمىس سانى 501-دەن 423-كە دەيىن ازايعانى ءمالىم ەتىلدى. قوعامدىق ورىنداردا جاسالعان قىلمىستار – 15,5%, بۇرىن سوتتالعاندار جاساعان قىلمىستار – 30,1%, ال ماس كۇيىندە جاسالعان قىلمىس 30%-عا تومەندەدى. سونىمەن قاتار تەرگەۋدىڭ زاماناۋي ادىستەرىن ەنگىزۋدىڭ ناتيجەسىندە قىلمىستىق ىستەردىڭ اشىلۋى جاقساردى. بۇگىنگى تاڭدا سوتتارعا 225 قىلمىستىق ءىس جىبەرىلدى, ال جەڭىلدەتىلگەن ءىس جۇرگىزۋ تارتىبىمەن 11 ءىس جولدانعان.
تۇركىستان وبلىسى
