جۇرەككە ءاجىم تۇسپەيدى... شىنىمەن دە, وسى ءبىر-اق اۋىز ءسوز اڭگىمەنى وقىعان ءار وقىرماننىڭ جۇرەگىنە وشپەستەي جازىلارى انىق. ءوزىنىڭ دە وتكەنىن (بالكىم بۇگىنگى كۇيىن), ومىرىندەگى ساۋلەلى ساتتەر مەن جۇرەگىنىڭ تۇكپىرىندە ايالاعان (مۇمكىن جاسىرعان) اپپاق ارماندارىن الاقانىنا سالىپ, ءبىر ساتكە جان تەرەڭىنە ءۇڭىلىپ, تولعانارى حاق. سوندا ءوزى دە الىستاعى ەنجەسىن ساعىنىپ, عۇمىر بويى عاشىعىنا ىنتىققان ساعىن اقساقالدىڭ اپپاق الەمى مەن ىشكى تولعانىستارىنىڭ ىشىنە ءتۇسىپ كەتكەندەي سوزبەن ايتىپ جەتكىزگىسىز سۇمدىق ءبىر ساۋلەلى سەزىمدى باستان كەشەرى ءسوزسىز. سەبەبى جۇرەگى بار پەندەنىڭ قاي-قايسىسىنىڭ دا مىنا ومىردە ماحابباتقا ءبىر جولىقپاي كەتكەنى (وتكەنى) جوق شىعار. ال سەكسەنگە كەلىپ تە سەزىمىنە سەلكەۋ تۇسىرمەي, ادامدىق ارىنا ادال بولا الۋ – ۇلكەن ەرلىك. ونداي قاسيەت تەك جۇرەگى تازا, جانى كىرشىكسىز جانداردىڭ ماڭدايىنا بۇيىرعان باق بولسا كەرەك.
ەسىڭىزدە مە, ساعىن اقساقالدىڭ: «ۋاقىت, كوپ بولسا, سەنىڭ بەتىڭدى اجىمدەگەن شىعار, ال جۇرەككە ءاجىم تۇسپەيدى» دەگەن ءبىر-اق اۋىز سوزىنە قانشا ماعىنا, ءتىپتى ءومىردىڭ بۇكىل ءپالساپاسى سىيىپ جاتقان جوق پا؟ وسى ءسوزدى ايتقان كەيىپكەردى قالاي كەمەڭگەر, ايتقىزعان جازۋىنىڭ جۇرەگىن قالاي عارىش دەمەسسىڭ؟
جالپى, شەرحان مۇرتازانىڭ جازۋشى رەتىندە, اسىرەسە اڭگىمە جازۋداعى شەبەرلىگى وسىنداي كوڭىلدىڭ ىشكى يىرىمدەرىن اسقان سەزىمتالدىق ءھام سۇڭعىلالىقپەن سەزىنە وتىرىپ, سودان ءومىردىڭ ولمەيتىن قۇندىلىقتارىن اسپەتتەي العانىندا, بايىپپەن بايقاي بىلگەندىگىندە جاتسا كەرەك. ايتپەسە جۇرەك دەيتىن ءبىر كەسەك ەت بارىمىزدە دە بار عوي. ال سوعان ءاجىم تۇسىرمەي, كوڭىل كوزىن كىرلەتپەي ءومىر بويى ونى اسەمدىك پەن تازالىققا باعىشتاي العانىمىز قايسى؟
«اۋرۋ ادامداي مەڭ-زەڭ حالگە دۋشار بولدىم. بوزىم بوزبالا شاققا قايتا ورالعانداي, جۇرەگى تۇسكىر ءتاتتى ءبىر سەزىمنەن ۋىلجىپ قويا بەردى. ادام قارتايسا بالا بولادى, دەۋشى ەدى بۇرىنعىلار. سول راس, «بالا بولدىم با؟» دەيمىن وزىمە ءوزىم. بىراق ەسىل-دەرتىم ەنجەدە. قارتايعاندا قارا باستى ما, مۇنشا تولقىپ, توپالاڭ تيگەندەي الاسۇرعان نە دەيمىن».
اڭگىمەدەگى ساعىننىڭ وسى ءبىر ءسوزى-اق شىن سۇيگەن جاننىڭ كوڭىلى ماڭگىلىك كوكتەم, جانى جايقالعان جاز ەكەندىگىن ۇقتىرماي ما؟ دەمەك جۇرەككە دە ءاجىم تۇسىرمەۋ وسىنداي ادال سەزىم, اق ادال پەيىلمەن استاسىپ جاتسا كەرەك, بىزدىڭشە. ءيا, مىناۋ اپپاق عالامدا پەندەلىكتىڭ, تۇرمىستىڭ تۇساۋىنا بىلعانباي, عالامنىڭ عاجابىن كوكىرەك كوزىمەن كورە الۋدىڭ ءوزى دە تەڭدەسسىز تارتۋ شىعار. ايتپەسە سەكسەنگە كەلمەي-اق سەزىمىن سۋىتىپ, جۇرەگىن كىرلەتكەندەر قاتارىمىزدا قانشاما؟ بۇل الاعاي دا بۇلاعاي شاقتا جۇرەگىن ساقتاي العاندار – شىن باقىتتىلار!
