گرۋزيادا قورعانىس مينيسترلىگىن ايەل ادام باسقاراتىن بولدى

استانا. 3 مامىر. گرۋزيا تاريحىندا العاش رەت قورعانىس ءمينيسترى قىزمەتىنە ايەل ادام تاعايىندالادى. بۇل تۋرالى تاسس حابارلادى. گرۋزيا پرەمەر-ءمينيسترى يراكلي گاريباشۆيلي ءۇش مينيسترلىكتىڭ باسشىسى اۋىساتىنىن ايتتى. ول قورعانىس مينيسترلىگىنە تينا حيداشەليدى ۇسىنسا, جاستار ءىسى جانە سپورت ءمينيسترى قىزمەتىنە تاريەل حيچيكاشۆيلي تاعايىندالماق. ال قورشاعان ورتانى قورعاۋ جانە تابيعي رەسۋرستار مينيسترلىگىن گيگلا اگۋلاشۆيلي باسقاراتىن بولدى. «تينا حيداشەلي ەۋروينتەگراتسيا بويىنشا پارلامەنت كوميتەتىنىڭ ءتورايىمى. ونىڭ ساياساتتا, سونىڭ ىشىندە اسكەريلەردىڭ قۇقىعىن قورعاۋ سالاسىندا تاجىريبەسى مول», – دەيدى گاريباشۆيلي. 41 جاستاعى حيداشەليدىڭ ماماندىعى زاڭگەر. 2012 جىلدىڭ قازان ايىنان باستاپ پارلامەنت دەپۋتاتى, وسى جىلدىڭ ناۋرىز ايىنان ەۋروينتەگراتسيا بويىنشا پارلامەنت كوميتەتىنىڭ ءتورايىمى قىزمەتتەرىن اتقارىپ كەلەدى. الايدا, گرۋزيا پرەزيدەنتى گەورگي مارگۆەلاشۆيلي مينيسترلەردى تاعايىنداۋدى 1 اپتا كەيىنگە شەگەردى. ول قورعانىس ءمينيسترىنىڭ سوڭعى كەزدە ءجيى اۋىسقانىن سىنعا الدى. سونداي-اق, پارلامەنت پەن پرەمەر-مينيسترگە سوڭعى ءبىر اپتادا ۇكىمەت مۇشەلەرىن تولىق جاساقتاۋ تۋرالى تاپسىرمالار جۇكتەدى. تينا حيداشەلي الەم بويىنشا قورعانىس ءمينيسترى قىزمەتىنە تاعايىندالاتىن 6-شى نازىكجاندى ەكەنىن ايتا كەتەيىك. بۇگىنگە دەيىن مۇنداي جايت 5 رەت تىركەلگەن. ەلامان قوڭىر. دەرەك: تاسس. سۋرەت: polit.ru.