وتىرىستا ءسوز العان وقۋ-اعارتۋ ءمينيسترى عاني بەيسەمباەۆ وتكەن جىلدى قورىتىندىلاپ, ءبىلىم جۇيەسىنىڭ ساپاسىن ودان ءارى ارتتىرۋدىڭ باسىم باعىتتارىنا توقتالدى. ء«بىلىم بەرۋ تاربيەمەن تىعىز بايلانىستى. مەملەكەت باسشىسىنىڭ تاپسىرماسى بويىنشا بارلىق ءبىلىم بەرۋ ۇيىمىندا وسكەلەڭ ۇرپاقتىڭ بويىنا قۇندىلىقتار جۇيەسىن قالىپتاستىرۋعا جانە نىعايتۋعا باعىتتالعان التى نەگىزگى جوبانى قامتيتىن ء«بىرتۇتاس تاربيە» باعدارلاماسى ەنگىزىلدى. بۇل جۇمىستىڭ تيىمدىلىگى كوپ جاعدايدا سىنىپ جەتەكشىلەرىنە بايلانىستى. سوندىقتان ونى مول تاجىريبەسى بار بىلىكتى ۇستازداردىڭ ورىنداۋى ماڭىزدى. تاربيە باعدارلاماسىنىڭ تۇجىرىمدامالىق نەگىزدەرىن ەسكەرە وتىرىپ, پەداگوگتەردىڭ سىنىپ جەتەكشىلىگىنە دەگەن كوزقاراسىن تۇبەگەيلى قايتا قاراۋ كەرەك. ەلىمىزدە ءبىلىم ساپاسىن باعالاۋدىڭ وزىندىك ۇلتتىق جۇيەسى قالىپتاستى. ءبىلىم الۋشىلاردىڭ ءبىلىم جەتىستىكتەرىنە مونيتورينگ جاساۋدىڭ وتاندىق باعالاۋ قۇرالى RCEC ساراپتاما جانە سەرتيفيكاتتاۋ عىلىمي زەرتتەۋ ورتالىعىندا حالىقارالىق دەڭگەيدە تانىلدى, وسىلايشا قازاقستان ورتالىق ازياداعى ءبىلىم بەرۋ ساپاسىن باعالاۋ جۇيەسى بويىنشا اككرەديتتەۋدەن وتكەن جالعىز ەلگە اينالدى», دەدى ول.
سپيكەردىڭ سوزىنە قاراعاندا, مينيسترلىك پەداگوگتىڭ ۇزدىكسىز كاسىبي دامۋ ۇدەرىسى رەتىندە بىلىكتىلىكتى ارتتىرۋ پاراديگماسىن قايتا قارادى. بارلىق ءراسىم «ۇستاز» ۇلتتىق پلاتفورماسىندا جۇزەگە اسىرىلادى, جۇيە اۆتوماتتاندىرىلعان. بيىل العاش رەت پلاتفورمادا 88 مىڭنان اسا مودەراتور مەن ساراپشىنى اتتەستاتتاۋدان وتكىزۋ جوسپارلانىپ وتىر.
«بىلتىر بىردەن ەكى پەداگوگ «قازاقستاننىڭ ەڭبەك ەرى» اتاعىنا يە بولدى. بۇل – پەداگوگتەرىمىزدىڭ ەڭبەگىنە پرەزيدەنت تاراپىنان بەرىلگەن جوعارى باعا مەن قۇرمەت, ارتىلعان زور سەنىم. دەسە دە الاڭداتارلىق احۋال دا جوق ەمەس, «پەداگوگ مارتەبەسى تۋرالى» زاڭىن بۇزۋ فاكتىلەرى انىقتالدى. ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق دەپارتامەنتتەر زاڭ بۇزۋشىلىقتاردىڭ 120 جاعدايىن تىركەدى. اتاپ ايتقاندا, سەمەي قالاسىندا مۇعالىمدەردى تيەسىلى ەمەس فۋنكتسيالارعا تارتۋ سوڭى قايعىلى جاعدايعا اكەلىپ سوقتىردى. وڭىرلەردىڭ باسشىلىعىن زاڭدى قاتاڭ ساقتاۋ ءۇشىن بارلىق قاجەتتى شارانى قابىلداۋعا شاقىرامىن», دەدى ع.بەيسەمباەۆ.
ءمينيستردىڭ ايتۋىنشا, ەلىمىزدە 7 مىڭنان اسا مەملەكەتتىك مەكتەپ جۇمىس ىستەيدى. 2023 جىلدان باستاپ جاڭا فورماتتاعى باسقارۋشىلاردى دايارلاۋ ءۇشىن ء«بىلىم بەرۋدەگى وزگەرىستەردىڭ 1000 كوشباسشىسى» جوباسى ىسكە اسىرىلىپ جاتىر. قازىردىڭ وزىندە رەسپۋبليكالىق كادر رەزەرۆىنە 583 كانديدات الىنعان. بالالاردىڭ قاۋىپسىزدىگىن قامتاماسىز ەتۋ مينيسترلىكتىڭ باستى مىندەتى بولىپ قالا بەرەدى. 2024 جىلى زاڭعا كامەلەتكە تولماعاندارعا قاتىستى زورلىق-زومبىلىق ءۇشىن جاۋاپكەرشىلىكتى كۇشەيتەتىن جانە وتباسىن قولداۋعا باعىتتالعان تۇزەتۋلەر ەنگىزىلدى. سونداي-اق بالالاردىڭ قۇقىقتارىن قورعاۋ كوميتەتىنىڭ وكىلەتتىكتەرى كەڭەيتىلدى. بيىلعى قاڭتار ايىندا بۇۇ-دا قازاقستاننىڭ وسى سالاداعى رەفورمالارى جوعارى باعاعا يە بولدى.
ء«بىز ينكليۋزيۆتى جانە ارنايى ءبىلىم بەرۋدى دامىتۋدى جالعاستىرامىز. بيىل پسيحولوگيالىق-پەداگوگيكالىق قولداۋعا 100% قولجەتىمدىلىكتى قامتاماسىز ەتۋدى جوسپارلاپ وتىرمىز. «بوبەك» ۇلتتىق عىلىمي پراكتيكالىق ورتالىعى مەن ۇلتتىق ينكليۋزيۆتى ءبىلىم بەرۋ ورتالىعىن ترانسفورماتسيالاۋ باستالدى. قازان ايىندا قازاقستان العاش رەت ينكليۋزيا بويىنشا دۇنيەجۇزىلىك كونگرەستى قابىلدايدى. ءبىلىم بەرۋ ساپاسىنداعى الشاقتىقتى ازايتۋ ءۇشىن قالالىق جانە اۋىلدىق مەكتەپتەر اراسىندا «اۋىل مەكتەبى – ساپا الاڭى» جوباسى ىسكە اسىرىلادى. بۇل ماتەريالدىق-تەحنيكالىق بازانى جاڭعىرتۋعا, جوعارى جىلدامدىقتى ينتەرنەتتى قامتاماسىز ەتۋگە جانە وقىتۋ ساپاسىن ارتتىرۋعا باعىتتالعان. 2024 جىل ءبىلىم بەرۋ ينفراقۇرىلىمى ءۇشىن ماڭىزدى كەزەڭ بولدى. تاۋەلسىزدىك تاريحىندا العاش رەت مەكتەپتەردىڭ رەكوردتىق سانى سالىندى. 2023 جىلى 165 مەكتەپ قولدانىسقا بەرىلدى. وتكەن جىلى 257 مەكتەپ بوي كوتەردى, ونىڭ 105-ءى «جايلى مەكتەپ» ۇلتتىق جوباسى اياسىندا سالىندى. ولاردى ءتيىمدى باسقارۋ ءۇشىن مينيسترلىك بىرىڭعاي جۇيە ازىرلەدى», دەدى مينيستر.
ع.بەيسەمباەۆتىڭ بايانداۋىنشا, ۇدەرىستەردى تسيفرلاندىرۋ جانە اۆتوماتتاندىرۋ قازىرگى ءبىلىم بەرۋ ورتاسىنىڭ ماڭىزدى بولىگى سانالادى. مينيسترلىك «Smart وقۋ اعارتۋ» جوباسىن ىسكە قوستى. بۇل تسيفرلىق ءبىلىم بەرۋدىڭ بىرىڭعاي ەكوجۇيەسىن قۇرىپ, وقىتۋدىڭ ساپاسىن ارتتىرادى, وقىتۋ ۇدەرىستەرىنىڭ بارلىق قاتىسۋشىسىنا ءبىلىم بەرۋ رەسۋرستارى مەن قىزمەتتەرىنە جەڭىل قول جەتكىزۋگە مۇمكىندىك بەرەدى. «Starlink» تەرمينالدارىن ەنگىزۋ ەسەبىنەن ساپالى ينتەرنەت تارتىلعان مەكتەپتەردىڭ ۇلەسى 2022 جىلعى 19%-دان 2024 جىلى 95%-عا دەيىن, ياعني 3 ەسەگە ۇلعايدى.
سونداي-اق القا وتىرىسىندا عالىمدار, پەداگوگتەر, اتا-انالار, ساراپتامالىق جانە بيزنەس-قوعامداستىق وكىلدەرى ءسوز سويلەدى. ولاردىڭ قاتارىندا پەداگوگيكا عىلىمدارىنىڭ دوكتورى, پروفەسسور جاۋىمباي قارامباەۆ, ۇلتتىق قۇرىلتاي توراعاسىنىڭ ورىنباسارى بيبىگۇل جەكسەنباي, يۋنيسەف-ءتىڭ قازاقستانداعى وكىلى دوكتور راشەد مۇستافا سارۆار جانە ت.ب. بار.
ايدانا كەمەلبەك
