فوتو: inbusiness.kz
قوسىلعان قۇن سالىعى مولشەرىنىڭ كوبەيتۋ ماسەلەسى قوعام, ساراپشىلار ورتاسىندا قىزۋ تالقىعا ءتۇستى.
مەملەكەت باسشىسى بۇگىن بيزنەس وكىلدەرىمەن كەزدەسۋدە وسى تاقىرىپقا قاتىستى پىكىر ءبىلدىرىپ, ۇكىمەتكە قوسىمشا قۇن سالىعى ماسەلەسىن تاعى دا پىسىقتاۋدى تاپسىردى.
«كەز كەلگەن رەفورمانى جان-جاقتى ساراپتاپ, بايىپپەن جۇرگىزگەن ءجون. ەكونوميكا سالالارىنىڭ ەرەكشەلىكتەرىن ەسكەرە وتىرىپ, ءتۇرلى نۇسقالاردى ازىرلەۋ كەرەك. قوسىمشا قۇن سالىعىنا قاتىستى بۇعان دەيىن كوزقاراسىمدى بىلدىرمەگەن ەدىم. ويتكەنى قىزمەتتىك دارەجەمە سايكەس, مەنىڭ ءاربىر ءسوزىم, پىكىرىم قاتاڭ تاپسىرما سياقتى قابىلدانادى. سوعان قاراماستان بۇل ماسەلە بويىنشا ويىمدى جەتكىزگىم كەلەدى. قالاي دەسەك تە, قوسىمشا قۇن سالىعىنىڭ مولشەرلەمەسى سارالانىپ بەلگىلەنۋگە ءتيىس. ۇكىمەت تۇپكىلىكتى شەشىمدى بىلىكتى ساراپشىلاردىڭ, قايتالاپ ايتامىن, بىلىكتى ساراپشىلار مەن كاسىپكەرلەردىڭ, البەتتە دەپۋتاتتاردىڭ پىكىرىنە قۇلاق اسا وتىرىپ, ناقتى ەسەپتەۋلەر نەگىزىندە قابىلداعانى دۇرىس. ءبىر انىعى, ۇكىمەتتىڭ قازىرگى ۇسىنىپ وتىرعان مولشەرلەمەسى تىم جوعارى», دەدى پرەزيدەنت.
وسى ورايدا ەكونوميكا سالاسىنداعى ساراپشى, PR مامانى ايبار ولجاەۆ پرەزيدەنتتىڭ مەملەكەت جانە بيزنەس وكىلدەرى ءۇشىن بىردەي ءتيىمدى شەشىم قابىلداۋ باستاماسىن قولدايتىنىن جەتكىزدى.
«مەملەكەت باسشىسى كومپروميستىك شەشىمگە الىپ كەلە جاتىر دەپ ايتۋعا تولىق نەگىز بار. ءبىرىنشىسى,بيزنەس يەلەرىنىڭ تابىس اينالىمى بەلگىلى ءبىر شەكتەن اسسا, ققس تولەيدى, اينالىمى از قاراجاتتى قۇراسا سايكەسىنشە از مولشەردە ققس تولەيدى. بۇل پروگرەسسيۆتى شكالا بويىنشا جۇزەگە اسادى. بارلىق بيزنەس وكىلدەرىنە ورتاق ققس بەلگىلەۋ ورىنسىز. بيزنەس يەلەرىنىڭ مۇمكىندىكتەرىن زەردەلەپ, سالىقتىق جۇكتەمە ارتۋ كەرەك. بۇل وتە ءادىل شەشىم بولماق. ۇكىمەت ققس-نى كوتەرۋ ارقىلى بيۋدجەت تاپشىلىعىن جويۋدى كوزدەپ وتىر. ققس-نىڭ پروگرەسسيۆتى جارتىلاي كوتەرىلۋى بيۋدجەت ماسەلەسىن تۇبەگەيلى شەشپەۋى دە ىقتيمال», دەدى ەكونوميكالىق ساراپشى, PR مامانى ايبار ولجاەۆ
