ساۋدا-ەكونوميكالىق بايلانىستاردى دامىتۋ, كولىك-لوگيستيكا, مۇناي جانە مۇناي ونىمدەرىن تاسىمالداۋ, تسيفرلىق تەحنولوگيالار, اۋىل شارۋاشىلىعى, تۋريزم جانە باسقا دا سالالارداعى ءوزارا ءىس-قيمىلدى كەڭەيتۋگە باسا نازار اۋدارا وتىرىپ, ەكىجاقتى ىنتىماقتاستىق ماسەلەلەرى تالقىلاندى.
ولجاس بەكتەنوۆ مەملەكەت باسشىسى قاسىم-جومارت توقاەۆ گرۋزيامەن ەكىجاقتى ىنتىماقتاستىقتى نىعايتۋعا ەرەكشە ءمان بەرەتىنىن اتاپ ءوتتى. ءتۇرلى دەڭگەيدەگى بەلسەندى ديالوگ ەكىجاقتى تاۋار اينالىمىن ودان ءارى ارتاراپتاندىرۋعا جانە كەڭەيتۋگە ىقپال ەتەدى. بۇگىندە قازاقستان-گرۋزيا قارىم-قاتىناسى بارلىق باعىت بويىنشا قارقىندى دامىپ كەلەدى.
بىرلەسكەن ۇكىمەتارالىق كوميسسيا اياسىندا تاۋار اينالىمىن ارتتىرۋ جۇمىستارى جۇرگىزىلىپ جاتىر. 2023–2026 جىلدارعا ارنالعان ءوزارا تاۋار اينالىمى اۋقىمىن كەڭەيتۋ جونىندەگى جول كارتاسى ىسكە اسىرىلىپ وتىر. ەلىمىزدەن ەكسپورتتالاتىن ءونىم نومەنكلاتۋراسى شيكىزاتتىق ەمەس تاۋارلاردىڭ جاڭا تۇرلەرىمەن تولىقتىرىلۋدا. گرۋزيا نارىعىنا قۇنى 66 ملن-نان اسا وتاندىق تاۋاردىڭ 35 ءتۇرىن جىلجىتۋ بويىنشا شارالار قابىلدانۋدا. تىزىمگە مۇناي-حيميا, مەتاللۋرگيا, تاماق ونەركاسىبى, حيميا, ماشينا جاساۋ سالالارىنىڭ ونىمدەرى كىرەدى.
كەلىسسوز بارىسىندا ترانسكاسپي حالىقارالىق كولىك باعىتىنىڭ الەۋەتىن اشۋ ارقىلى ترانزيتتىك-كولىكتىك ءوزارا ءىس-قيمىلدى ارتتىرۋعا نازار اۋدارىلدى. قابىلدانعان شارالار ورتا ءدالىزدىڭ وتكىزۋ قابىلەتىن 2027 جىلعا قاراي جىلىنا 10 ملن تونناعا دەيىن ارتتىرۋعا مۇمكىندىك بەرەدى دەپ جوسپارلانعان. سونىمەن قاتار باسەكەگە قابىلەتتى تاريفتىك شارتتاردى بەلگىلەۋ, جەتكىزۋ مەرزىمدەرىن قىسقارتۋ جانە اتالعان باعىت بويىنشا جۇك تاسىمالداۋ كولەمىن ۇلعايتۋ جۇمىستارىن جالعاستىرۋدىڭ ماڭىزدىلىعى اتاپ ءوتىلدى. بۇل رەتتە ەلىمىزدىڭ كومپانيالارى گرۋزيادا قۋاتتىلىقتى ارتتىرۋعا دا قاتىسادى. بيىل گرۋزيانىڭ پوتي پورتىندا وتاندىق كولىك-لوگيستيكا ينۆەستيتسيالىق توپ سالىپ جاتقان جاڭا مۋلتيمودالدى تەرمينالدى ىسكە قوسۋ جوسپارلانىپ وتىر.
«بىلتىر تحكب ارقىلى تاسىمالداۋ كولەمى 62%-عا ءوسىپ, 4,5 ملن توننانى قۇرادى. باعىتتىڭ الەۋەتىن ارتتىرۋ, سونداي-اق ينفراقۇرىلىمدى, پورت جانە تەرمينالدىق قۋاتتى جاقسارتۋ, جىلجىمالى قۇرامدى ۇلعايتۋ, اكىمشىلىك كەدەرگىلەردى جويۋ جانە تاسىمالداۋشىلار ءۇشىن قولايلى جاعداي جاساۋ جۇمىستارى جۇرگىزىلىپ جاتىر. قازاقستان ۇكىمەتى بارلىق باعىت بويىنشا قازاقستان-گرۋزيا ارىپتەستىگىنىڭ سەرپىندى دامۋىن قامتاماسىز ەتۋ ءۇشىن جان-جاقتى جۇمىستى جالعاستىرۋعا نيەتتى», دەپ اتاپ ءوتتى و.بەكتەنوۆ.
ءوز كەزەگىندە يراكلي كوباحيدزە دە گرۋزيانىڭ قازاقستانمەن ەكىجاقتى بايلانىستاردى دامىتۋعا جانە نىعايتۋعا مۇددەلى ەكەنىن اتاپ ءوتتى.
«بۇل – مەنىڭ قازاقستانعا ەكونوميكالىق جانە مادەني ءوزارا ءىس-قيمىلدى نىعايتۋعا باعىتتالعان العاشقى ءارى ماڭىزدى رەسمي ساپارىم. بۇگىندە مەملەكەتتەر اراسىندا ىنتىماقتاستىقتىڭ ءتۇرلى باعىتىندا ۇلكەن جەتىستىكتەر بار. ءبىز قازاقستانمەن جان-جاقتى ارىپتەستىكتى ودان ءارى دامىتۋعا مۇددەلىمىز», دەپ اتاپ ءوتتى ي.كوباحيدزە.
سونىمەن قاتار پرەمەر-مينيسترلەر ەكى ەلدىڭ مۇناي جانە مۇناي ونىمدەرىن الەمدىك نارىققا تاسىمالداۋ سالاسىنداعى ءوزارا ءىس-قيمىلىن تالقىلادى. وتكەن جىلى ەلىمىزدەن باكۋ – تبيليسي – دجەيحان قۇبىرى ارقىلى 1,4 ملن توننا مۇناي جونەلتىلدى. شيكىزات جونەلتۋ كولەمىن كەزەڭ-كەزەڭىمەن جىلىنا 2,2 ملن تونناعا دەيىن جەتكىزۋ مىندەتى تۇر.
اۋىل شارۋاشىلىعى سالاسىنداعى ىنتىماقتاستىقتىڭ بولاشاعى زور. 2024 جىلدىڭ قورىتىندىسى بويىنشا اوك ءونىمى تاۋار اينالىمىنىڭ كولەمى 12,3%-عا ءوسىپ, 71,2 ملن دوللاردى قۇرادى. قازاقستان بيزنەسىنىڭ گرۋزيا نارىعىنا ۇن مەن استىق, وسىمدىك مايى, ماكارون ونىمدەرى, قوي جانە سيىر ەتى, ءسۇت ونىمدەرى, كونديتەرلىك جانە باسقا دا ونىمدەر جەتكىزۋ كولەمىن ارتتىرۋعا الەۋەتى بار.
كادر دايارلاۋ جانە اگروونەركاسىپ كەشەنىن عىلىمي قامتاماسىز ەتۋ سالاسىنداعى ءوزارا ءىس-قيمىلدى دامىتۋدا, ونىڭ ىشىندە بىرلەسكەن عىلىمي زەرتتەۋلەر جۇرگىزۋ بويىنشا ورتاق مۇددەلەر اتاپ ءوتىلدى. ىسكەرلىك كووپەراتسياسىنىڭ ءساتتى مىسالى رەتىندە وتاندىق «QVM Technology» جشس, «Ordabasy Group» جانە «ەرۆيرا» كومپانيالارى گرۋزيندىك «Olive Georgia» كومپانياسىمەن بىرلەسىپ, ەلىمىزدىڭ اۋماعىندا ءزايتۇن اعاشى كوشەتتەرىن تاجىريبەلىك وتىرعىزۋ بويىنشا جۇزەگە اسىرعان جوبانى اتاۋعا بولادى.
سونداي-اق تسيفرلاندىرۋ جانە تۋريزم سالاسىنداعى ىنتىماقتاستىق جانە تاجىريبە الماسۋ ماسەلەلەرى كوتەرىلدى.
