استاناداعى ونەر ۋنيۆەرسيتەتىندە كوپ سالا بويىنشا مامان دايارلانادى. ءبىلىم ورداسىنىڭ وسى ەرەكشەلىگىن ەسكەرە وتىرىپ, فولكلورتانۋشى جاڭا مونوگرافياسىن پانارالىق بايلانىسقا ارناپ جازعان. زەرتتەۋدە بەينەلەۋ ونەرى, تەاتر جانە كينو تۋىندىلارىنداعى فولكلورلىق سيۋجەتتەر مەن تۇسىنىكتەردىڭ قولدانىسى تالدانعان.
زەرتتەۋ جۇمىسى ۋنيۆەرسيتەتتىڭ عىلىمي كەڭەسىندە تالقىلانىپ, تولىقتاي ماقۇلدانعان. جاڭا زەرتتەۋدى تانىستىرۋعا ارنالعان ءىس-شارانى ۋنيۆەرسيتەت رەكتورىنىڭ مىندەتىن اتقارۋشى, ونەرتانۋ كانديداتى, پروفەسسور ر.نۇرتازا اشىپ, اۆتوردىڭ عىلىمداعى جولىن اتاپ ءوتتى. تانىستىرىلىم بارىسىندا ونەرتانۋ كانديداتى, جاك قاۋىمداستىرىلعان پروفەسسورى, قازاق ۇلتتىق ونەر ۋنيۆەرسيتەتى, ونەرتانۋ كافەدراسىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى ن.مۇقىشەۆا, ونەرتانۋ كانديداتى, قازۇوۋ پروفەسسورى, قازاقستان سۋرەتشىلەر وداعىنىڭ مۇشەسى ا.اسىلبەكوۆا, كوركەمونەر فاكۋلتەتىنىڭ دەكانى, قازاقستان سۋرەتشىلەر وداعىنىڭ مۇشەسى, مادەنيەت سالاسىنىڭ ۇزدىگى ا.سماعۇلوۆ, ونەرتانۋ كافەدراسىنىڭ دوتسەنتى, PhD, تەاترتانۋشى ن.ەسكەندىروۆ جانە كىتاپحانا باسشىسى ع.بوكەي پىكىرلەرىن ورتاعا سالدى.
كينوتانۋشى ن.مۇقىشەۆا جاڭا ەڭبەكتىڭ قۇندىلىعى – پانارالىق بايلانىسقا قۇرىلعانىنا, قازاق فيلمدەرىمەن قاتار فولكلورعا قاتىسى بار شەتەلدىك تۋىندىلار دا عىلىمي تالداۋعا الىنعانىنا, سونىمەن بىرگە ونەر سالاسى بويىنشا ءبىلىم بەرەتىن وقۋ ورىندارىنا قاجەت ەكەنىنە باسا نازار اۋداردى.
ال سۋرەتشىلەر وداعىنىڭ مۇشەسى ا.اسىلبەكوۆا: – «اۆتور زەرتتەۋ جۇمىسىندا كەسكىندەمە, گرافيكا, ءمۇسىن, ساندىك-قولدانبالى ونەر سالالارىن ەسكەرىپ, قازاق بەينەلەۋ ونەرىنە ەڭبەك سىڭىرگەن اعا بۋىن وكىلدەرىنەن باستاپ قازىرگى زامانداعى سۋرەتشىلەردىڭ ەڭبەكتەرىندەگى فولكلورمەن بايلانىستى قامتىعان. سول سياقتى اۆتور ەجەلگى گرەكيا, ريم, باتىس, شىعىس فولكلورى مەن ميفولوگياسىنداعى وبرازدار مەن سيمۆولداردان مىسالدار كەلتىرە وتىرىپ, كوپتەگەن شەتەلدىك جانە وتاندىق فولكلورتانۋشى, ونەرتانۋشى عالىمداردىڭ ەڭبەكتەرىن زەرتتەپ, ولاردىڭ وي-پىكىرلەرىن دە العا تارتۋ ارقىلى سالىستىرا-سالعاستىرىپ, وقىرمانىن قىزىقتىراتىنى ءسوزسىز. وسى تۇرعىدان العاندا, زەرتتەۋ جۇمىسىنان كوپ قۇندى ماعلۇمات الۋعا بولادى», – دەدى.
سۋرەتشى ا.سماعۇلوۆ: – «قازاق فولكلورى ەلىمىزدىڭ قاي وڭىرىندە بولسىن, وزىندىك نۇسقاسى قالىپتاسقان نەشە عاسىرلىق تاريحى بار باعىتتارى اۋقىمدى ونەر سالالارىنان قۇرالعان. سول باعىتتاردىڭ ءبىرى – بەينەلەۋ ونەرى. ەجەلگى تاس داۋىرىنەن سارالاپ قارايتىن بولساق, تاس بەتتەرىنە بەدەرلەنىپ سالىنعان گرافيكالىق سۋرەتتەردىڭ جوعارى دەڭگەيدە ورىندالعانىن كورە الامىز, كيىز ءۇي, ونىڭ جابدىقتارى, قارۋ-جاراق, زەرگەرلىك ونەر, اعاشتى وڭدەۋ, ات-ابزەل سايماندارى, قۇلپىتاستار, تاعى دا كوپتەگەن جادىگەرلەر وعان كۋا. ريزا تاسقىنعاليقىزىنىڭ وسىنداي ۇلكەن ەڭبەگى سالت-ءداستۇرىمىزدى ۇلىقتاپ, فولكلورىمىزدى كاسىبي دەڭگەيدە كورسەتۋىمىزدىڭ ءبىر جولىن كورسەتكەندەي سەزىمدە بولدىم. وسى باستاما حالىق ونەرى مەن بەينەلەۋ ونەرىندەگى ۇشتاستىقتى قايماعىن بۇزباي, بولاشاعىمىزعا جەتكىزىپ, ۇلتتىق دەڭگەيدە قالىپتاسادى دەپ ويلايمىن. بۇل مونوگرافيا ونەر وقۋ ورىندارىنىڭ ستۋدەنتتەرى مەن ماگيسترانتتارىنا, جالپى وقىرمانعا بەرەتىن مالىمەتتەرى مول ەڭبەك ەكەنىنە قۋانىشتىمىن, – دەدى.
تەاترتانۋشى ن.ەسكەندىروۆ ارىپتەستەرىنىڭ پىكىرلەرىن قولداي وتىرىپ: «ونەردىڭ بارلىق سالاسىنىڭ ءتۇپ تامىرى فولكلوردا, سوڭعى كەزدە كەيبىر رەجيسسەرلەر ەركىندىك ەكەن دەپ, حالىقتىق مۇرانى ورەسكەل بۇزۋشىلىق ورىن الىپ جاتقانىن زەرتتەۋشى ورىندى كورسەتە بىلگەن», دەپ, ەڭبەكتە ونەر تاريحىنا قاتىستى كوپ ماعلۇمات بارىن, تالداۋلاردىڭ جان-جاقتىلىعى جانە فولكلورلىق نەگىزدى وقىتۋدا قاجەتتى ەڭبەك ەكەنىن ايتتى.
پىكىر بىلدىرۋشىلەر «فولكلور مەن كاسىبي ونەردىڭ ساباقتاستىعى» اتتى مونوگرافيانى ءبىلىم بەرۋ ۇدەرىسىنە ەنگىزۋ قاجەتتىگىن ءبىراۋىزدان قولدادى.
بۇل ءىس-شاراعا تەك وقىتۋشىلار عانا ەمەس, ستۋدەنتتەر, ماگيسترانتتار, دوكتورانتتار دا قاتىسىپ, اۆتوردىڭ ولارعا جاڭا ەڭبەگىن سىيعا تارتۋى توسىن سىي بولدى.
كىتاپحانا قىزمەتكەرلەرى زەرتتەۋشىنىڭ عىلىمداعى ەڭبەكتەرىنەن كورمە ۇيىمداستىردى.
اقمارال بايقۋاتوۆا,
ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتى عىلىم ءبولىمىنىڭ اعا عىلىمي قىزمەتكەرى
