بۇل جونىندە مانشۇك مامەتوۆا مەموريالدىق مۋزەيىنىڭ مەڭگەرۋشىسى, ولكەتانۋشى احمەديار باتىرحانوۆ حابارلادى. ونىڭ ايتۋىنشا, جانىبەكتىك ارداگەر تۋعان جەرىنىڭ تاريحىنا قۇمارتىپ, ءبىراز جىلدان بەرى كونە بۇيىمدار, تاريحي جادىگەرلەر جيناۋمەن اينالىسادى ەكەن. ءبىر ءتاۋىرى, تيمۋر كارىم ۇلى تاپقان بۇيىمدارىن مۋزەيلەرگە تەگىن تاپسىرادى. بۇدان بۇرىن دا جانىبەك اۋداندىق مۋزەيىنە, جەرگىلىكتى مەكتەپ مۇراجايلارىنا دا سىيلىق جاساعان.
– تيمۋر اعامىز جانىبەك اۋدانىنىڭ قامىستى اۋلىنا قاراستى حانتۇسكەن, العاباس, جايىلما دەگەن جەرلەردەن ءتۇرلى تاريحي جادىگەر كوپ تابىلاتىنىن ايتادى. بۇل قازىرگى رەسەيدىڭ ۆولگوگراد وبلىسى پاللاسوۆكا اۋدانىمەن شەكارالاس اۋماق قوي. بۇل جەر جاڭگىر حاننىڭ جازعى جايلاۋىنا باراتىن جولدىڭ بويى كورىنەدى. «حانتۇسكەن» دەگەن اتاۋ سودان قويىلعان. تيمۋر كارىم ۇلى ءوز كوللەكتسياسىنان 160 بۇيىمدى مانشۇك مۋزەيىنە تەگىن تارتۋ ەتتى, – دەيدى احمەديار قۋان ۇلى.
بۇل جادىگەرلەر اراسىندا ەرتەدەگى ساداق جەبەسىنىڭ ۇشتارى, التىن وردا زامانىنداعى جانە 1753–1976 جىلدار ارالىعىنداعى تيىندار, ات ابزەلدەرىنىڭ بولشەكتەرى, ايەل اشەكەيلەرى بار. ەكىنشى دۇنيەجۇزىلىك سوعىس تاقىرىبىن زەرتتەپ جۇرگەن احمەديار باتىرحانوۆ جادىگەرلەر اراسىنان ۆەرماحت ارمياسىنىڭ ەمبلەماسى سالىنعان قاسىقتىڭ سابى شىققانىنا قاتتى تاڭعالعان. بولاشاقتا بۇل بۇيىمدار مۋزەي قورىنا قوسىلىپ, كورەرمەن نازارىنا ۇسىنىلادى.
باتىس قازاقستان وبلىسى
