فوتو: qazaly.kz
ەلىمىزدە ينۆەستورلار ماسەلەسىن شۇعىل شەشۋ ءۇشىن ينۆەستيتسيا شتابى قۇرىلىپ, بيۋروكراتيالىق كەدەرگى مەن قۇقىقتىق قاراما-قايشىلىق جويىلىپ, كەيبىر جوبالاردى تەزىرەك جۇزەگە اسىرۋعا جول اشىلدى. دەگەنمەن كەي وڭىرلەردە تىكەلەي شەتەل ينۆەستيتسياسىن تارتۋ قارقىنى تومەندەگەن. ەلىمىزدىڭ ەكونوميكالىق جاعدايىن كوتەرۋ ءۇشىن, وتاندىق ينۆەستورلارعا, ودان كەيىن شەتەلدىك ينۆەستورلارعا قولايلى جاعداي جاساۋ وتە ماڭىزدى. ويتكەنى وتاندىق نارىقتىڭ دەڭگەيىن ءوزىمىز قولعا الىپ, كوتەرۋىمىز كەرەك.
بۇل رەتتە, ەلىمىزدىڭ اۋىل شارۋاشىلىعى سالاسى بويىنشا, ونىڭ ىشىندە اۋىل شارۋاشىلىعى ونىمدەرىن قايتا وڭدەۋ, ەگىنشىلىك, ەت جانە ءسۇت ونىمدەرىن ءوندىرۋ سالالارىنا ينۆەستورلار تارتۋ ۇتىمدى بولادى دەپ ەسەپتەيمىن. سونىمەن بىرگە, ۇكىمەت وتىرىسىندا مەملەكەت باسشىسى ەلىمىزدىڭ قارجىسىن جاپپاي ۇنەمدەۋگە كوشىپ, بيۋدجەت قارجىسىن تەك اسا وزەكتى ماسەلەلەردى شەشۋگە جۇمساۋى قاجەت ەكەنىن ەرەكشە اتاپ ءوتتى. ماسەلەن, بىلتىر قىزىلوردا وبلىسىندا ءوڭىر باسشىسىنىڭ تاپسىرماسىمەن وقۋشىلار ۋاقىتىن ءتيىمدى وتكىزۋگە باعىتتالعان سپورتتىق جانە شىعارماشىلىق ۇيىرمەلەر قىزمەتىنە زەردەلەۋ جۇمىسى جۇرگىزىلگەن. سونىمەن قاتار مەملەكەتتەن بولىنگەن قارجىنىڭ ءتيىمسىز جۇمسالۋىنا بايلانىستى كاسىپكەرلەرمەن كەلىسىمشارت بىرجاقتى بۇزىلىپ, بيۋدجەت قارجىسى ۇنەمدەلگەن.
وسىلايشا, وبلىس بيۋدجەتىنەن شىعارماشىلىق ۇيىرمەلەر بويىنشا 600 ملن تەڭگە, ال سپورتتىق سەكتسيالاردان 2 ملرد 603 ملن تەڭگە بيۋدجەتكە كەرى قايتارىلعان. وسى سياقتى جۇمىس جالعاسىن تابۋى كەرەك. مەملەكەت باسشىسى ايتقانداي, كورپەگە قاراي كوسىلىپ, ورىنسىز شىعىنداردى توقتاتۋ ورىندى شەشىم بولماق.
نۇرلان تۇرعانباەۆ,
قىزىلوردا قالالىق ءماسليحاتىنىڭ دەپۋتاتى
