سۋرەت: atr.kz
جۇمىستىڭ نەگىزگى باعىتتارىنىڭ قاتارىندا ەكونوميكانى ءارتاراپتاندىرۋ, ينفراقۇرىلىمدىق دامۋدىڭ جاڭا دەڭگەيىنە كوشۋ, تسيفرلىق تەحنولوگيالاردى جۇيەلى ەنگىزۋ, اگروونەركاسىپتىك كەشەننىڭ الەۋەتىن نىعايتۋ, سالىق-بيۋدجەتتىك ساياساتتى رەفورمالاۋ, ماڭىزدى جوبالارعا قارجىلىق قولداۋ كورسەتۋ, الەۋمەتتىك سالانى ودان ءارى دامىتۋ اتالدى.
ەلدە ەنەرگيا تاپشىلىعى كۇشەيگەن تۇستا كەلەشەكتى ايقىندايتىن بىرقاتار ماڭىزدى قادام جاساۋعا تۋرا كەلەدى. ماسەلەن, زاماناۋي تاسىلدەردى ەنگىزۋ, تابيعي رەسۋرستاردى ۇتىمدى پايدالانۋ, اتوم ەنەرگەتيكاسىنا زەيىن قويۋ ەل ەكونوميكاسىندا تۇراقتىلىقتى قامتاماسىز ەتەدى. سوندىقتان ۇكىمەت جاڭا تاريفتىك ساياساتتى جۇزەگە اسىرۋدى جالعاستىرۋى كەرەك.
كونتراباندالىق جانار-جاعارمايدى شىعارۋ فاكتىلەرى بىرنەشە رەت ايتىلدى. بۇل ەلىمىزدىڭ ەكونوميكاسى ءۇشىن وتە اۋىر تاۋەكەلدەر تۋعىزىپ وتىر. ماسەلەنى ءماجىلىس دەپۋتاتتارى دا بىرنەشە رەت كوتەردى.
پرەزيدەنتتىڭ وتىرىستاعى «ەنەرگەتيكالىق» تەزيستەرى مەن تاپسىرمالارى ناقتى جانە پەرسپەكتيۆالى بولدى. 2027 جىلى ۇكىمەت باتىس ايماقتىڭ ەلەكتر جەلىلەرىن ەلىمىزدىڭ بىرىڭعاي ەلەكتر ەنەرگەتيكالىق جۇيەسىمەن بىرىكتىرۋدى اياقتاۋى كەرەك. وڭتۇستىك ايماقتىڭ ەلەكتر جەلىلەرىن نىعايتۋ جوباسىن ىسكە اسىرۋدى جەدەلدەتۋ قاجەت.
2026 جىلى «بەينەۋ – بوزوي – شىمكەنت» گاز قۇبىرىنىڭ ەكىنشى تارماعى قۇرىلىسىنىڭ ءبىرىنشى كەزەڭىن اياقتاۋ كەرەك. مەملەكەت باسشىسى جاڭاوزەن مەن قاشاعانداعى گاز وڭدەۋ زاۋىتتارىنىڭ, سونداي-اق تۇركىستان وبلىسىنداعى بۋ-گاز نەگىزىندەگى ەلەكتر ستانساسىنىڭ قۇرىلىسىن بەلگىلەنگەن مەرزىمدە اياقتاۋ مىندەتىن قويدى. جاسىراتىنى جوق, بۇگىندە قارجى تاپشىلىعىنان كوپتەگەن جوبا ىسكە قوسىلا الماي جاتىر. ەندى پرەزيدەنت ەلەۋلى جوبالارعا قارجىلاي قولداۋ كورسەتۋ تاقىرىبىن ەرەكشە اتاپ وتكەن سوڭ, ولار ۋاقتىلى اياقتالادى دەگەن ءۇمىت بار. بىرقاتار ناقتى شارا قولعا الىنۋعا ءتيىس ءار سالادا ازاماتتاردىڭ ءال-اۋقاتىن ارتتىرۋ باستى ماقسات سانالادى.
دۇيسەنباي تۇرعانوۆ,
ءماجىلىس دەپۋتاتى
