ءىس-شارادا قورعانىس ءمينيسترىنىڭ ورىنباسارى دارحان احمەديەۆ ەاەو ەلدەرى ۇكىمەت باسشىلارىنىڭ الدىندا قورعانىس سالاسىندا جاساندى ينتەللەكتى قولدانۋ تۋرالى بايانداما جاسادى. فورۋمدا ۇسىنىلعان نەگىزگى جوبالاردىڭ ءبىرى اسكەري ەسەپتى اۆتوماتتاندىرۋعا ارنالعان «سروچنيك 2.0» جۇيەسى بولدى. بۇل اسكەرگە شاقىرىلعاندارمەن جۇمىستىڭ اشىقتىعىن ارتتىرۋعا, جۇمىلدىرۋ دايىندىعىن وڭتايلاندىرۋعا جانە ازاماتتاردىڭ قاجەتتى اقپاراتقا قول جەتكىزۋىن جەڭىلدەتۋگە مۇمكىندىك بەرەدى. جۇيە دەرەكتەردى اۆتوماتتى تۇردە تالدايدى, اسكەرگە شاقىرىلۋشىلاردىڭ ساناتتارىن انىقتايدى, SMS حابارلامالار جىبەرەدى جانە اسكەرگە شاقىرىلۋشىلاردىڭ قاي اسكەر تۇرلەرىنە جىبەرۋگە بولاتىنىن ايتادى.
– وتكەن جىلداردان ايىرماشىلىعى, «Digital Almaty 2025» جاساندى ينتەللەكتى قولداناتىن شەشىمدەرگە باعىتتالعان. وسىعان بايلانىستى ءبىزدىڭ باياندامامىز دا, ۇسىنىلعان ستەند تە قورعانىس سالاسىنداعى تسيفرلىق يننوۆاتسيالارعا ارنالعان. جاساندى ينتەللەكت شاقىرۋ ناۋقانى مەن ۇگىت-ناسيحات جۇمىستارى اياسىندا عانا ەمەس, سونىمەن قاتار اسكەري قىزمەتشىلەردىڭ كۇندەلىكتى ءومىرىن تسيفرلىق ترانسفورماتسيالاۋدا دا بەلسەندى قولدانىلادى. ول بىرقاتار تاپسىرمالاردى ورىنداۋدى جەڭىلدەتە وتىرىپ, كۇندەلىكتى پروتسەستەردى اۆتوماتتاندىرۋعا كومەكتەسەدى, – دەدى د.احمەديەۆ.
قورعانىس سالاسىنا وزىق تەحنولوگيالاردى ەنگىزۋگە باعىتتالعان Defence Tech باعىتىن دامىتۋعا ەرەكشە نازار اۋدارىلدى. ونىڭ اياسىندا حاكاتوندار, دوڭگەلەك ۇستەلدەر, ستراتەگيالىق سەسسيالار جانە اكسەلەراتسيالىق باعدارلامالار وتكىزىلەدى. 2023 جىلى Astana Hub-تا Defense Tech كەڭسەسى اشىلدى, ال جاقىن ارادا الماتىداعى وفيتسەرلەر ۇيىندە وكىلدىك اشۋ جوسپارلانعان. بۇل تەحنولوگيالىق كومپانيالاردى قورعانىس يننوۆاتسيالارىنا بەلسەندى تارتۋعا مۇمكىندىك بەرەدى.
بۇعان قوسا فورۋمدا قازاقستاننىڭ قارۋلى كۇشتەرىنە وزىق تەحنولوگيالاردى ازىرلەۋ مەن ەنگىزۋدى قولدايتىن Defense Tech قورعانىس قاۋىپسىزدىگى سالاسىنداعى يننوۆاتسيالاردى دامىتۋ ورتالىعىنىڭ, دامۋ ينستيتۋتىنىڭ ستەندى تانىستىرىلدى.
قورعانىس سالاسىنداعى تسيفرلىق شەشىمدەردىڭ دامۋى قورعانىس مينيسترلىگىنىڭ جاڭا تسيفرلىق داۋىردە ەلدىڭ قاۋىپسىزدىگى مەن قورعانىس قابىلەتىن جوعارى دەڭگەيدە قامتاماسىز ەتە وتىرىپ, وزىق تەحنولوگيالاردى ەنگىزۋگە دەگەن ۇمتىلىسىن كورسەتەدى.
