سۋرەتتەردى تۇسىرگەن – نۇربولات امانجول
وبلىس ورتالىعىنان 110 شاقىرىم قاشىقتا جاتقان تۇرار رىسقۇلوۆ اۋدانىندا جاڭا كاسىپورىن جۇمىسىن باستادى. ءبىرشاما ۋاقىت بۇرىن قۇرىلىسى باستالعان مينەرالدى اۋىزسۋ شىعاراتىن زاۋىت بىرنەشە كۇن بۇرىن پايدالانۋعا بەرىلدى. ساعاتىنا 3 مىڭ ليتر مينەرالدى سۋ شىعاراتىن ءوندىرىس وشاعىنىڭ باسشىلارى ءبىرىنشى كەزەكتە ىشكى نارىقتى قامتۋعا بەكىنىپ وتىر. اۋدان اكىمى ەرنار ەسىركەپوۆتىڭ ايتۋىنشا, جوبانى تولىققاندى جۇزەگە اسىرۋ ءۇشىن «پارۋس-ت» جشس 200 ملن تەڭگە كولەمىندە ينۆەستيتسيا سالعان.
«مەملەكەت باسشىسىنىڭ وڭىرلەرگە ينۆەستيتسيا تارتۋ تۋرالى تاپسىرماسى نازارىمىزدان تىس قالعان ەمەس. ءوڭىر باسشىسى ەربول قاراشوكەەۆتىڭ تىكەلەي تاپسىرماسى نەگىزىندە اۋدانىمىزدا ىلكىمدى جوبالار قولعا الىندى. الداعى ۋاقىتتا ءوندىرىس وشاقتارى سانىن ارتتىرۋ بويىنشا ناقتى جۇمىس اتقارامىز. راحىم سابدەنوۆ اۋلىندا جاڭادان اشىلعان كاسىپورىننىڭ قۇرىلىسى 2023 جىلى باستالعان. جوبا ەكى كەزەڭ بويىنشا جۇزەگە استى. باستاپقىدا قاجەتتى قۇرال-جابدىقتار ساتىپ الىنسا, 2024 جىلى قىتايلىق بىلىكتى ماماندار زاۋىتتى ىسكە قوسۋمەن اينالىستى. جەرگىلىكتى اتقارۋشى بيلىك وكىلدەرى وتاندىق ءونىمدى قولدايدى. ءبىز ءوز تاراپىمىزدان قولدان كەلگەنشە كومەكتەسۋگە ءازىرمىز. ءوندىرىس وشاقتارى كوبىرەك اشىلعان سايىن جاڭا جۇمىس ورىندارىن قۇرۋ مۇمكىندىگى ارتادى», دەيدى اۋدان اكىمى.
راحىم سابدەنوۆ اۋىلى اۋماعىندا ورنالاسقان جاڭا زاۋىتتىڭ قۇرىلىس جۇمىسىنا 30 ادام تارتىلعان بولسا, ءوندىرىس وشاعى ىسكە قوسىلعاننان كەيىن مۇندا 15 ازامات تۇراقتى جۇمىسپەن قامتىلىپ وتىر. ال الىستاعى اۋىلدا سالىنعان زاۋىت ءونىمى «Baital» اتاۋىمەن نارىققا شىقپاق. ينۆەستورلاردىڭ ايتۋىنشا, ءونىمنىڭ باعاسى قولجەتىمدى.
«زاۋىت شىعارىپ وتىرعان مينەرالدى اۋىزسۋدى جەرگىلىكتى ازاماتتار پايدالانادى دەگەن سەنىم زور. ونىمدە ادام اعزاسىنا پايدالى ەلەمەنتتەر بارشىلىق. باعاسى نارىق قۇنىمەن سالىستىرساق, تۇتىنۋشىلار ءۇشىن وتە ءتيىمدى بولىپ تۇر. مينەرالدى اۋىزسۋ كاسىپورنى سالىنباس بۇرىن ءتۇرلى لابوراتوريالىق زەرتتەۋ جۇمىسى جۇرگىزىلدى. بارلىق زەرتتەۋ جۇمىسىنىڭ ناتيجەسى ءبىز وندىرەتىن سۋدىڭ ساپاسى وتە جوعارى ەكەنىن ايقىندادى. ول قۇجاتتىڭ بارلىعى قولىمىزدا بار. ءبىر سوزبەن ايتقاندا, بارلىق سانيتارلىق نورماعا ساي ەكەنى دالەلدەندى. قۇتىداعى اۋىزسۋدىڭ كولەمى 0,33, 0,5, 1 جانە 1,5 ليتر بولىپ نارىققا جول تارتادى», دەيدى كاسىپورىن باسشىسى مايرا راحيموۆا.
كاسىپورىن باسشىسىنىڭ ايتۋىنشا, زاۋىت جۇمىسىن وركەندەتۋ بويىنشا ناقتى جوسپار بار. ول الداعى ۋاقىتتا بەدەلدى كاسىپكەرلەرمەن كەلىسسوز جۇرگىزۋ ارقىلى «Baital» مينەرالدى اۋىزسۋىن نارىققا مولىنان شىعارۋدى جوسپارلاپ وتىر. ازىرگە جەرگىلىكتى كاسىپكەرلەر قولدان كەلگەنشە قولداۋ كورسەتۋگە ءازىر ەكەندىكتەرىن بايقاتقان. ءتيىستى قولداۋدى تاپسا, «Baital» مينەرالدى سۋى قۇلاننىڭ برەندىنە اينالۋى دا مۇمكىن.
ەرنار ەسىركەپوۆتىڭ ايتۋىنشا, ايماقتا جالپى قۇنى 16,1 ملرد تەڭگە بولاتىن 20 ينۆەستيتسيالىق جوبانى جۇزەگە اسىرۋ كوزدەلگەن. بىرقاتار الەۋەتتى ينۆەستورمەن بىرلەسىپ جۇمىس ىستەۋ جونىندە كەلىسسوز جۇرگىزىلگەن. بۇل جوبالار تولىعىمەن جۇزەگە اسقان كەزدە 500 جاڭا جۇمىس ورنىن قۇرۋعا مۇمكىندىك تۋماق.
جامبىل وبلىسى,
تۇرار رىسقۇلوۆ اۋدانى,
راحىم سابدەنوۆ اۋىلى
