باتىس قازاقستاندا كول جاعاسىنان الىستاپ كەتكەن 4 ادام قۇتقارىلدى

ورال. 18 ماۋسىم. باتىس قازاقستان وبلىسى توتەنشە جاعدايلار دەپارتامەنتى جەدەل قۇتقارۋ جاساعىنىڭ قىزمەتكەرلەرى شالقار كولىندە ءتورت دەمالۋشىنى قۇتقاردى. بۇل تۋرالى باتىس قازاقستان وبلىسى توتەنشە جاعدايلار دەپارتامەنتىنىڭ مەملەكەتتىك ءتىل جانە اقپارات توبى تاراتقان مالىمدەمەگە سىلتەمە جاساعان egemen.kz ءتىلشىسى حابارلادى. ورال قالاسىنىڭ 25-35 جاس ارالىعىنداعى ەكى ەر جانە ەكى ايەل ادام كولگە دەم الۋعا كەلگەن. ولار ۇرمەلى ارنايى بۇيىمدا كۇنگە قىزدىرىنىپ جاتىپ, جاعادان قالاي الىستاپ كەتكەنىن بايقاماي قالعان. باتىس قازاقستان وبلىسى توتەنشە جاعدايلار دەپارتامەنتى جەدەل قۇتقارۋ جاساعىنىڭ №2 شالقار بەكەتىنىڭ قۇتقارۋشىلارى ەربول حانگەرەەۆ پەن نۇرحان جولاحوۆ بەكىتىلگەن اۋماقتى پاترۋلدەۋدى اياقتاي كەلگەندە, جاعادان 800 م قاشىقتىقتا شىجىعان كۇن استىندا اشىق كولدەگى ءتورت ادامدى بايقاپ, ولاردى دەرەۋ جاعالاۋعا جەتكىزدى. قۇتقارۋشىلاردىڭ ايتۋىنشا, مۇنداي جاعداي دەمالۋشىلاردىڭ تۇرمىستا ۇيىقتاۋعا قولداناتىن ۇرمەلى ماتراتستى كولدە قولدانۋ كەزىندە ءجيى تىركەلەدى. سەبەبى, مۇنداي بۇيىمدار جەڭىل بولىپ كەلەدى ەكەن. شالقار كولى تەك قازاقستاننىڭ عانا ەمەس, سونداي-اق, وڭتۇستىك-شىعىس ەۋرازيانىڭ ءىرى كولدەرىنىڭ ءبىرى. اۋماعى 14-19 شارشى شاقىرىمدى الىپ جاتقان كولى اقجايىق وڭىرىندەگى كورىكتى مەكەندەردىڭ ءبىرى. تەك ورالدىقتاردىڭ عانا ەمەس, سونداي-اق, قازاقستاننىڭ كورشى وبلىستارى مەن رەسەيدەن سۋ قۇرامى تەڭىز سۋىنا ۇقساس تۇزدى كولدە دەنساۋلىقتارىن قالپىنا كەلتىرۋگە كوپتەپ ادامدار كەلەدى. دەمالۋشىلاردىڭ كوپتىگىنە بايلانىستى كول جاعالاۋىندا اپاتقا ۇشىراعان ادامداردى قۇتقارۋعا قاجەتتى جابدىقتارمەن جاساقتالعان بەكەت قىزمەت ەتەدى. بۇگىنگە دەيىن قۇتقارۋشىلار تالاي رەت ادامداردى اجالدان اراشالاپ قالدى. تەمىر قۇسايىن. دەرەك: egemen.kz. سۋرەت: nur.kz.