كونتسەرتتىك باعدارلامادا قازاق ۇلتتىق جانە الەم حالىقتارىنىڭ بيلەرى, زاماناۋي حورەوگرافيالىق شىعارمالار, سونداي-اق ەلىمىزدىڭ جەتەكشى حورەوگرافتارىمەن بىرلەسە ازىرلەنگەن ەكسكليۋزيۆتى جانە جاڭا قويىلىمدار ۇسىنىلدى. اتاپ ايتقاندا, «توقىمقاعار», «جەلدىرمە», «بىلقىلداق», «اق جاۋىن», «التىناي», «تيبەت ءبيى», ۇيعىر جانە باسقا دا بيلەر ورىندالدى.
مادەني ءىس-شاراعا قازاقستاننىڭ حالىق ءارتىسى سەكەن تۇرىسبەكوۆ, قازاقستاننىڭ ەڭبەك سىڭىرگەن قايراتكەرى ارداق بالاجانوۆا, «دارىن» مەملەكەتتىك جاستار سىيلىعىنىڭ لاۋرەاتتارى اسقار مۇقيات پەن الىبەك الماديەۆ, مادەنيەت سالاسىنىڭ ۇزدىگى باۋىرجان بەكمۇحانبەت, «Temirlan&Yernat» دۋەتى, قوبىزشى ولجاس قۇرمانبەك, حالىقارالىق بايقاۋلاردىڭ لاۋرەاتى مەرۋەرت تۇرسىنبەك, تالانتتى مۋزىكانت نۇرمۇحاممەد Cاتەن جانە «Gulder» ءانسامبلى قاتىستى.
كونتسەرتتىك باعدارلامانىڭ رەجيسسەرى – دۋمان اكىم, يدەيا اۆتورى – «گۇلدەر» ءانسامبلىنىڭ باس بالەتمەيستەرى انۆارا سادىقوۆا, قويۋشى حورەوگرافتار – المات شامشيەۆ, ەرنۇر قارىقبول, اننا تسوي.
كەش اۆتورى ىڭكار ايدارحانقىزى بۇگىندە «گۇلدەر» ءانسامبلى بالەت ترۋپپاسىنىڭ كوشباسشىسى رەتىندە ءوزىن جاقسى قىرىنان تانىتىپ كەلەدى. ءانسامبلدىڭ جاڭا رەپەرتۋارىن جىلدام مەڭگەرىپ, جەكە رەپەرتۋارىنداعى «جەتىسۋىم», «مەن قازاقتىڭ قىزىمىن», «التىناي», «تولعاۋ» بيلەرى كاسىبي ونەر قايراتكەرلەرى مەن كورەرمەننىڭ جۇرەگىندە ايقىن ءىز قالدىردى. ال كومپوزيتور سەكەن تۇرىسبەكوۆتىڭ «كوڭىل تولقىنى» كۇيى نەگىزىندە قويىلعان حورەوگرافيالىق كومپوزيتسيا شەتەل كورەرمەنىنىڭ ەرەكشە قولداۋىنا يە بولدى.
ىڭكار ايدارحانقىزى قازاق ايەلدەرىنە ءتان ۇلتتىق ءبيدى تەرەڭ ءارى ءدال ورىنداپ, ونى تۇسىندىرۋدە جوعارى شەبەرلىگىن كورسەتەدى. بۇل – ونىڭ ورىنداۋشىلىق ونەرىندەگى باستى ەرەكشەلىكتەرىنىڭ ءبىرى. سونىمەن قاتار رەپەتيتور, حورەوگراف جانە بالەتمەيستەردىڭ كومەكشىسى رەتىندە دە ءوز قابىلەتىن تانىتىپ ءجۇر. بۇل تاجىريبە, اسىرەسە, استانا قالاسىنداعى جاس كورەرمەندەر مۋزىكالىق تەاترىندا قويىلعان «قىز جىبەك» قويىلىمىندا ايقىن بايقالدى.
«ەگەمەن-اقپارات»
