باسىلىمداردى تاراتۋ ىسىنە باسەكەلەستىك كەرەك

مەن بۇل جەردە وقۋ ما­دە­نيەتى وتباسىنان باستالۋى كەرەكتىگىنە توقتالىپ جاتپاي, سالانىڭ ەڭ باستى ماسەلەسىن ايتايىن: اۋىلدىق جەرلەرگە جەتكىزۋ-تاراتۋ ءىسىنىڭ وڭتايلى شەشىمىن تاپپايىنشا, گازەتتەرگە تارالىمدى كوبەي­تۋ تۇرماق, بارىن ۇستاپ تۇرۋ قيىن­داي بەرمەك. ەگەر «قازپوشتا» بۇل ماسە­لەنى شەشە المايتىن بولسا, وندا وتاندىق مەرزىمدى ءباسپاسوز وكىلدەرى جينالىپ, ماسەلەنىڭ شەشى­مىن وزدەرى ىزدەگەنى ءجون. ءتىپتى سول باق-تاردىڭ قۇرىل­تايشىلىعىمەن تاراتۋ-جەتكىزۋ نارىعىنا جاڭا ويىنشى قوسۋ كەرەك بولار دەپ ويلايمىن. ارينە, ونىڭ قانشالىق ءتيىمدى بولاتىنىن ماماندار زەرتتەپ, زەردەلەپ كورەر.

وقىرمان تارتۋعا كەلسەك. ءبىز قازىر­گى وقىرمانعا نە كەرەك ەكەنىن سول وقىر­ماننىڭ وزىنەن سۇراۋدى ۇمىتىپ كەتە بەرەتىن سياقتىمىز. سوسىن جارنامالاۋ ءتاسىلىمىزدى دە وزگەرتپەي بولمايدى. سمارتفونمەن تۋ­عان ۇرپاق ىشىندە وزىنە قاجەت دۇنيە بولسا عانا ساتىپ الادى. بولدى. ەندەشە, ولارعا نە قاجەت ەكەنىن, وسى بۋىندى نە قىزىقتىراتىنىن ءبىلىپ, سونى گازەت-جۋرنالىمىزعا اكەلۋگە ءتيىسپىز. وسىلاي بولۋى ءۇشىن البەتتە ىزدەنىس كەرەك. بالكىم, بۇل ىزدەنىسكە سول كەيىنگى بۋىننىڭ ءوزىن دە كوبىرەك تارتۋ كەرەك شىعار. مۇمكىن سولار ءداستۇرلى باق-تىڭ باعىن اشاتىن امال تابار.

اقش-تىڭ, ەۋروپانىڭ باق-تارى زامان اعىمىنا بەيىمدەلىپ, ەلەكتروندى نۇسقالارىنا – پدف جانە تسيفرلى فورماتتارعا جازىلىمدى دامىتۋعا كۇش سالىپ جاتىر. مۇنىڭ ءتيىم­دى جاعى – قۇنى قاعاز باسى­لىمنان الدەقايدا ارزان, ياعني وقىرماننىڭ قالتا­سىنا اۋىر تيمەيدى. پوشتا جەتكىزىلىمى وتە ناشار بولىپ تۇرعان قازىرگى كەزدە بۇل – ءبىز ءۇشىن وتە ءتيىمدى ءارى وڭتايلى جول. قالاعان ادام كادىمگى گازەتتىڭ قۇنىنان ەكى-ءۇش ەسە ارزان باعاعا تۋرا سول باسىلىمنىڭ وزىندەي پدف نۇسقاسىن جۇكتەپ الادى نەمەسە زاماناۋي ديزاينداعى تسيفرلى فورماتىن الىپ وقي بەرەدى. بىراق ازىرگە ءبىزدىڭ حالىق مۇنداي فورماتپەن اسا تانىس ەمەس نەمەسە گازەت-جۋرنال وقۋدىڭ وسىنداي جولى بارىن بىلە بەرمەيدى. بىزگە وسىنى كوبىرەك تانىتىپ, ىلگەرىلەتۋ قاجەت. ينتەرنەتتەگى اقپاراتتىڭ ءبارى تەگىن دەگەن قاتە تۇسىنىكتى دە جويۋعا, اۆتورلىق قۇ­قىقتىڭ, ءاربىر ماقالانىڭ اقىسى بار ەكە­نىن جۇرتقا سىڭىرۋگە ۇمتىلعان ءجون. شەتەلدىڭ كەيبىر جۋرنالدارى تاقى­رىپ­تىق باعىتتارىنا, اۋديتورياسىنا قاراي باسىلىمدارىنا قوسىمشا ونىمدەر قوسىپ, مىسالى قۇرالدار, كورنەكىلىكتەر, ويىنشىقتار ۇسىنىپ, وقىرمان تارتۋعا تىرىسادى. بىزگە دە وسىنداي امالداردى كوبىرەك قولدانىپ, جاڭا مۇمكىندىك ىزدەستىرۋ قاجەت دەپ ويلايمىن.

وسى ورايدا ءوزىم قىزمەت ەتەتىن «National Geographic Qazaqstan» جۋر­نالىنىڭ جايىنا دا توقتالىپ وت­سەم دەيمىن. بىرىنشىدەن, «National Geograp­hic» الەمدىك دەڭگەيدەگى ءتۇرلى ىزدەنىس پەن زەرتتەۋدى باياندايتىن عىلىمي-تانىمدىق جۋرنال بولعاندىقتان, كۇندەلىكتى قوعامدىق ساياسي باسىلىمدارداي ەمەس. جاريالايتىن ماتە­ريالدارى قۇندىلىعىن جوعالتايدى, ءتىپتى ۋاقىت وتكەن سايىن باعاسى ارتا ءتۇسۋى مۇمكىن. «National Geographic»-ءتىڭ بارلىق ەلدەگى رەداكتسيا­لارى وسى ەرەكشەلىكتى ءتيىم­دى پايدالانۋعا تىرىسادى. جۋرنال جارىققا شىق­پاي جاتىپ-اق ماڭىزدى, سۇبە­لى ماقالالارىنىڭ اڭداتپا­لارىن – وقىرماندى قىزىق­تىراتىن فوتو نەمەسە قىسقا بەينەجازبالار جاساپ, الەۋ­مەتتىك جەلىلەر ارقىلى تاراتادى. بۇل باعىتتاعى جۇ­مىستار جۋرنال جارىققا شىققان سوڭ دا جالعاسادى. مۇنىڭ سىرتىندا جۋرنالدىڭ ارناۋلى نومىرلەرىن نەمەسە جىلدىق توپتاماسىن ساتىپ العى­سى كەلەتىن وقىرماندارعا «National Geographic» برەن­دىمەن بايلانىستى شاعىن سىيلىقتار نەمەسە جەڭىلدىك­تەر دە ۇسى­نىپ جاتامىز. ولكەتانۋ سيپا­تىندا­عى ەكسپەديتسيالارىمىزدى دا جۋرنالدى كوپشىلىككە تانىتۋ تۇرعىسىنان قولدانامىز.

وقىرمانمەن بايلانىس وتە ماڭىز­دى دەپ ەسەپتەيمىز. ءاربىر ادامعا – مەيلى ول تەلەفون نە ۋاتساپ ارقىلى حابارلاستى ما, جوق الدە ينستاگرام مەن فەيسبۋكتە جازدى ما – بارىنە جاۋاپ بەرۋگە تىرىسامىز. وقىرماندارىمىزدىڭ ءبىر بولىگى مەكتەپتەر بولعاندىقتان, مۇعالىمدەردىڭ سۇراۋىمەن ءپان اپتالىق­تا­رىنا قاتىسىپ, وقۋشىلارمەن كەزدەسۋلەر وتكىزىپ تۇرامىز.

ايبىن شاعالاق,

«National Geographic Qazaqstan» جۋرنالىنىڭ شەف-رەداكتورى