اتىراۋ. 18 ماۋسىم. اتىراۋدىڭ تۋماسى, رەسەيدە تۇراتىن اتاقتى رەجيسسەر, سونىمەن بىرگە, پروديۋسسەر تيمۋر بەكمامبەتوۆ تۋعان جەرىنە كەلىپ, اكەسى نۇرۋاحيتكە ورناتىلعان مەموريالدىق تاقتانىڭ اشىلۋ سالتاناتىنا قاتىستى. بۇل تۋرالى egemen.kz ءتىلشىسى حابارلادى.
«تۇنگى شولعىنشى» فيلمىمەن كەڭىنەن تانىمال بولعان تيمۋر بەكمامبەتوۆ تۋعان جەرىنە بۇدان ون جىل بۇرىن كەلگەن ەكەن. سودان كەيىن اتىراۋعا كەلۋ ساپارى اكەسى نۇرۋاحيتكە ورناتىلعان مەموريالدىق تاقتانىڭ اشىلۋ سالتاناتىمەن تۇسپا-تۇس كەلدى. ونىڭ اكەسى ەنەرگەتيكا سالاسىندا ابىرويلى ەڭبەك ەتكەن. بالالىق شاعىن جايىق جاعاسىندا وتكىزگەن, وسىندا مەكتەپ بىتىرگەن تيمۋر بەكمامبەتوۆتىڭ ايتۋىنشا, ول قازىر شەتەلدىك MGM كينوستۋدياسىنىڭ «بەن-گۋر» اتالاتىن ءىرى جوباسىنداعى جۇمىسىن جالعاستىرۋدا.
«بۇل 2000 جىلدىق تاريحى بار وتە كونە حيكايا. ونىڭ ستسەناريى ليۋ ۋوللەستىڭ كەڭىنەن تانىمال بولعان «بەن-گۋر» كلاسسيكالىق رومانىنىڭ جەلىسىمەن جازىلعان. حيكايا سيۋجەتىندە اعايىندى جىگىتتەر تۋرالى باياندالادى. نەگىزگى ءتۇيىن – كەك پەن كەشىرىم جايلى. حيكايادا مورگان فريمەن, دجەك حيۋستون سەكىلدى اكتەرلەر وينايدى», – دەدى اتاقتى رەجيسسەر «اقجايىق» گازەتىنە بەرگەن سۇحباتىندا.
سونىمەن قاتار, بۇعان دەيىن تيمۋر بەكمامبەتوۆ نەگىزىن قالاعان حالىقارالىق «Astana» ەكشن-فيلمدەر كينوفەستيۆالىندە قازاقستان تاريحىنا نەگىزدەلگەن بىرلەسكەن جوبالار جونىندە دە اڭگىمەلەپ بەردى. ونىڭ ايتۋىنشا, ستسەناريلەر فەستيۆالى وتكەن. بىراق, وندا قازاقستان تاريحىنا قاتىستى ەمەس, عارىش تۋرالى ۇزدىك ستسەناري تاڭدالىپتى. ءسويتىپ, امەريكاندىق برايان ميللەردىڭ ستسەناريى نەگىزىندە «Apollo 18» ءفيلمىن تۇسىرۋگە 5 ملن. دوللار جۇمسالعان. كەيىن فيلمنەن 25,2 ملن. اقش دوللارى كولەمىنە تابىس تۇسكەن.
تيمۋر بەكمامبەتوۆ بۇدان بىلاي تۋعان جەرىنە ءجيى كەلۋگە بەكىنىپ وتىر. ول مۇنى جاسىنىڭ ۇلعايعانىمەن, سونداي-اق, تۋعان جەردىڭ تارتىپ تۇراتىندىعىمەن تۇسىندىرەدى.
جولداسبەك شوپەعۇل.
دەرەك: egemen.kz.
سۋرەت: azh.kz.
