اقتوبە. 18 ماۋسىم. اقتوبە وڭىرىندە كەڭەس وداعىنىڭ باتىرى ءاليا مولداعۇلوۆانىڭ 90 جىلدىق مەرەيتويى اياسىندا كوپتەگەن مادەني شارالار ۇيىمداستىرىلۋدا. سونىڭ ءبىرى – عازيزا جۇبانوۆا اتىنداعى وبلىستىق فيلارمونيادا وتكىزىلگەن «جەرىم مەنىڭ» پاتريوتتىق اندەر بايقاۋى. بۇل تۋرالى egemen.kz ءتىلشىسى حابارلادى.
بايقاۋدى قازىلار القاسىنىڭ توراعاسى, كومپوزيتور, قازاقستاننىڭ ەڭبەك سىڭىرگەن ونەر قايراتكەرى كەڭەس دۇيسەكەەۆ قىسقاشا ءسوز سويلەپ اشىپ, ونەر دوداسىنا قاتىسۋشىلاردى قۇتتىقتادى. وبلىستا بيىل ەكىنشى رەت جانە العاش رەت حالىقارالىق دەڭگەيدە ۇيىمداستىرىلىپ وتىرعان كورنەكتى كومپوزيتور, اقتوبە ءوڭىرىنىڭ تۋماسى بەيبىت ورال ۇلىنىڭ اندەرىن ورىنداۋشىلاردىڭ بايقاۋىنا ساتتىلىك تىلەدى. بەيبىت ورال ۇلى تۋرالى جىلى لەبىز بىلدىرە كەلىپ, جاس ورىنداۋشىلارعا ونەردە ءوز بيىكتەرىن باعىندىرۋعا دەگەن ىزگى نيەتىن ءبىلدىردى.
بايقاۋعا ەلىمىزدىڭ بارلىق ايماعىنان جانە رەسەي, ازەربايجان, قىرعىزستاننان 17 جاس ورىنداۋشى قاتىستى. بايقاۋدىڭ شارتى بويىنشا ولار بەيبىت ورال ۇلىنىڭ ءبىر ءانىن جانە ءوز قالاۋى بويىنشا تاعى ءبىر ءان ورىندادى. قاتىسۋشىلاردىڭ ونەرىن قازىلار القاسىنىڭ توراعاسى, كومپوزيتور كەڭەس دۇيسەكەەۆ, مۇشەلەرى – كومپوزيتور بەيبىت ورال ۇلى, كومپوزيتور, ازەربايجاننىڭ ەڭبەك سىڭىرگەن ونەر قايراتكەرى ساردار فارادجەۆ, «دارىن» مەملەكەتتىك جاستار سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى التىناي جوراباەۆا, كومپوزيتور, پروديۋسەر رەنات عايسين, «دارىن» مەملەكەتتىك جاستار, «تارلان» مەملەكەتتىك سىيلىقتارىنىڭ لاۋرەاتى اسىلبەك ەڭسەپوۆ, سونداي-اق, ءانشى گاۋھار قاسپاقوۆا باعالادى.
بايقاۋ شىمىلدىعىن اقتوبەلىك ءسابيت بەگمان بەيبىت ورال ۇلىنىڭ «ماحابباتىم ومىردەگى مەنىڭ» انىمەن اشتى. ونەر سايىسىنا ۇكىلى ۇمىتپەن كەلگەن جاس انشىلەر كەزەگىمەن ساحنا تورىنە كوتەرىلدى. ناتيجەسىندە بايقاۋدىڭ گران-پري جۇلدەسىن قاراعاندى وبلىسىنان كەلگەن ءانشى ارايلىم جوكەنوۆا جەڭىپ الدى. ءبىرىنشى ورىندى باتىس قازاقستان وبلىسىنىڭ ءانشىسى ايىمبەك سارتىقوۆ يەلەندى. اقتوبەلىك نۇرجان ورازوۆ پەن ازەربايجان رەسپۋبليكاسىنىڭ جاس تالانتى فاحري كازيم-نيدجات ەكىنشى ورىنعا تابان تىرەدى. وڭتۇستىك قازاقستان وبلىسىنىڭ «سەمسەر» توبى مەن جاس ءانشى گۇلحان جۋاشباەۆعا, اقتوبەلىك لاۋرا تاۋساروۆاعا ءۇشىنشى ورىن بۇيىردى.
جاس انشىلەردىڭ شەبەرلىگىن شىڭداعان بايقاۋ قازاقستان كومپوزيتورلار وداعىنىڭ مۇشەسى بەيبىت ورال ۇلىنىڭ 60 جىلدىق مەرەيتويىنا ارنالعان «اۋىلىم – اق بەسىگىم» اتتى شىعارماشىلىق كەشكە ۇلاستى. مەرەكەلىك شاراعا اقىن-دراماتۋرگ يران عايىپ, اقىن, اۋدارماشى ءشومىشباي ساريەۆ, قازاقستاننىڭ ەڭبەك سىڭىرگەن قايراتكەرى, كومپوزيتور كەڭەس دۇيسەكەەۆ, قازاقستان رەسپۋبليكاسى مادەنيەت سالاسىنىڭ ۇزدىگى, اقىن اسىلبەك ابدراحمانوۆ جانە باسقالارى قاتىستى. كەش بارىسىندا مەرەيتوي يەسى اتىنا جىلى لەبىزدەر ايتىلىپ, جەرگىلىكتى بيلىك كومپوزيتور بەيبىت ورال ۇلىنا سىي-سياپات جاسادى. كونتسەرتتىك باعدارلامادا قازاقستان ەسترادا جۇلدىزدارىنىڭ ورىنداۋىندا مەرەيتوي يەسىنىڭ تانىمال اندەرى مەن شىعارمالارى ورىندالدى.
ساتىبالدى ءساۋىرباي.
دەرەك, سۋرەت: egemen.kz.
