جەتىستىك جەمىسى – بەيبىتشىلىك پەن كەلىسىمدە

جوعارعى سوتتىڭ ۇيىمداستىرۋىمەن 1 مامىر – قازاقستان حالقىنىڭ بىرلىگى كۇنىن مەرەكەلەۋگە ارنالعان سالتاناتتى جيىن بولىپ ءوتتى. وعان جوعارعى سوت توراعاسى قايرات ءمامي, قاداعالاۋشى سوت القالارىنىڭ توراعالارى مەن سوت جۇيەسىنىڭ ارداگەرلەرى, سۋديالار مەن جوعارعى سوت اپپاراتىنىڭ قىزمەتكەرلەرى قاتىستى. سالتاناتتى شاراعا قوناق رەتىندە قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, كونستيتۋتسيالىق كەڭەس توراعاسى يگور روگوۆ, قازاقستان حالقى اسسامبلەياسىنان پارلامەنت ماجىلىسىنە سايلانعان دەپۋتاتتار شاقىرىلدى. جيىننىڭ الدىندا جوعارعى سوت اپپاراتىنىڭ قىزمەتكەرلەرى قاتىسقان قازاقستان حالقى دوستىعىنىڭ فەس­تيۆالى ۇيىمداس­تىرىلدى. فەستيۆال شەڭبەرىندە اپپاراتتىڭ ءاربىر قۇرىلىمدىق ءبولىم­شەسى قازاقستاندا تۇراتىن بەلگىلى ءبىر ەتنوستىڭ مادەنيەتىن, سالت-ءداستۇرىن, مۋزىكاسى مەن ۇلتتىق تاعامدارىن كورسەتتى. سالتاناتتى جيىندى اشقان ق.ءمامي قازاقستاندىقتار ءۇشىن 1 مامىر مەرەكەسىنىڭ ماڭىزدىلىعىن جانە قازاقستان حالقى بىرلىگىن ساقتاۋ مەن نىعايتۋداعى مەملەكەت باسشىسىنىڭ ايرىقشا ءرولىن اتاپ ءوتتى. «تاۋەلسىز قازاقستاننىڭ بارلىق تابىستارى مەن جەتىستىكتەرىنە كوپ جاعدايدا ەلىمىزدەگى بەيبىتشىلىك پەن كەلىسىمنىڭ ارقاسىندا قول جەتكىزدىك. بۇگىندە رەسپۋبليكامىزداعى سوتتاردا 28 ەتنوس وكىلدەرى جەمىستى قىزمەت اتقارۋدا. سوتتار تاراپىنان جىل سايىن ءبىر ميلليوننان استام ءىستىڭ قا­رالۋى, حالىق سەنىمىنىڭ ارتا ءتۇسۋى قازاق­ستاندىق سوت تورەلىگىنىڭ ءتيىمدى كورسەت­كىشى بولىپ سانالادى», – دەدى جوعارعى سوت توراعاسى. جيىنعا قاتىسۋشىلاردى مەرەكەمەن قۇتتىقتاعان ەرالى توعجانوۆ جوعارعى سوت توراعاسى قايرات ءمامي مەن كونستيتۋتسيالىق كەڭەس ءتور­ا­عاسى يگور روگوۆقا «قازاقستان حال­قى اسسامبلەياسىنا 20 جىل» مەدا­لىن تابىستادى. ول سونداي-اق جوعار­عى سوتتىڭ بىرقاتار سۋديالارىن قا­زاقستان رەسپۋبليكاسىنىڭ پرەزي­دەنتى – قازاقستان حالقى اسسامبلەياسى توراعاسىنىڭ اتىنان مەرەكەلىك مەدالدارمەن, قۇرمەت گراموتالارىمەن جانە العىس حاتتارمەن ماراپاتتادى. بۇعان قوسا, رەسپۋبليكامىزدىڭ بارلىق وڭىرىندەگى 45 سۋديا مەن وتستاۆكاداعى سۋديا ءدال وسىنداي ما­را­­پاتتارعا يە بولدى. جوعارعى سوت توراعاسىنىڭ وكىمىمەن قازاقستان حالقىنىڭ بىرلىگى كۇنى جانە ۇلى وتان سوعىسىنداعى جەڭىستىڭ 70 جىلدىعى قارساڭىندا رەسپۋبليكاداعى 70-كە جۋىق سۋديا, ۇلى وتان سوعىسىنىڭ ارداگەرلەرى, تىل ەڭبەككەرلەرى مەن وتستاۆكاداعى سۋديالار ۆەدومستۆولىق مەدالدارمەن جانە ارنايى توسبەلگىلەرمەن ماراپاتتالدى. اتالعان ماراپاتتار وڭىرلەردە ءوز يەلەرىنە سالتاناتتى تۇردە تابىستالاتىن بولادى.  ءىس-شارا سوڭىندا فەستيۆالدىڭ قورىتىندىسى شىعارىلىپ, جەڭىمپازدارعا ديپلومدار مەن ەستەلىك سىيلىقتار تاپسىرىلدى, دەپ حابارلادى جوعارعى سوتتىڭ ءباسپاسوز قىزمەتى.