ماڭعىستاۋدا مۇگەدەك قىزدى زورلاعان پەدوفيلگە ۇكىم شىقتى

اقتاۋ. 18 ماۋسىم. ماڭعىستاۋ وبلىسىندا مۇگەدەك قىزدى زورلاعان پەدوفيلگە ۇكىم شىقتى. بۇل تۋرالى egemen.kz ءتىلشىسى حابارلادى. كامەلەت جاسىنا تولماعان ءجاسوسپىرىم قىز تۇراتىن ۇيگە سوتتالۋشى شاڭسورعىش جارنامالايمىن دەپ كىرگەنىن, سونداي-اق, ونىڭ مۇمكىندىگى شەكتەۋلى قىزدىڭ ۇيدە جالعىز ەكەنىن ءبىلىپ جانە مۇگەدەكتىگىن پايدالانىپ ونى باس سالىپ شەشىندىرىپ, جابىرلەگەندىگىن گازەت سايتىندا بۇرىن حابارلاعان ەدىك. وسى جىلدىڭ اقپان ايىندا قاراقيا اۋدانىنىڭ مۇنايشى اۋىلىندا بولعان وقيعاعا كۇدىكتى رەتىندە 22 جاستاعى وزبەكستان ازاماتى ۇستالعان بولاتىن. ءۇش ايدان استام ۋاقىت جۇرگىزىلگەن تەرگەۋ ناتيجەسىندە, كۇدىكتىنىڭ كىناسى دالەلدەندى. ماڭعىستاۋ وبلىسى بويىنشا اۋدانارالىق مامانداندىرىلعان سوتىنىڭ ۇكىمى بويىنشا, ەندى جاساعان قىلمىسى ءۇشىن ازامات 10 جىل ءومىرىن تەمىر توردىڭ ارعى بەتىندە, قاتاڭ رەجيمدەگى تۇرمەدە وتكىزەتىن بولادى. سوت كەزىندە بۇلتارتپاس دەرەكتەردىڭ بولۋىنا قاراماستان, سوتتالۋشى وزىنە تاعىلعان ايىپتى مويىنداماعان. الايدا, سوتتىڭ ۇكىمىنە جابىرلەنۋشى جانە زارداپ شەگۋشى جاق تا شاعىمدانباعان. سونداي-اق, پروكۋرور دا قارسىلىق بىلدىرمەگەن. گۇلايىم شىنتەمىرقىزى. دەرەك: egemen.kz. سۋرەت: nur.kz.