فوتو: Parlam.kz
«ينۆەستورلاردىڭ ماسەلەسىن شۇعىل شەشۋ ءۇشىن ينۆەستيتسيا شتابى قۇرىلدى. سونىڭ ارقاسىندا بيۋروكراتيالىق كەدەرگىلەر مەن قۇقىقتىق قاراما-قايشىلىقتار جويىلىپ, كەيبىر جوبالاردى تەزىرەك جۇزەگە اسىرۋعا جول اشىلدى. الايدا باستى ماقسات – «جەكەلەگەن» پروبلەمالاردى عانا شەشپەي, ەلدەگى تۇتاس ينۆەستيتسيالىق احۋالدى جاقسارتۋ», دەدى پرەزيدەنت.
ءبىزدىڭ ۇكىمەتكە جەتپەي جاتقان ءبىر ءىس بولسا – وسى. ءار جەر, ءار وڭىردە ناتيجەلى جۇمىس بار. بىراق ماسەلەگە تۇتاس قاراۋ, ورتاق شەشىمدەر قابىلداۋ, مينيسترلىكتەر جۇمىسىن بىرلەسە وتىرىپ ۇيلەستىرۋ جاعى جەتىسپەيدى. مۇنى مەملەكەت باسشىسى قاداپ تۇرىپ ايتتى.
«ينۆەستيتسيالىق جوبالاردى ازىرلەۋ بارىسىندا ۆەدومستۆوارالىق ۇيلەستىرۋگە ءالى دە كوپ ۋاقىت كەتەدى. ۇكىمەت باسى ارتىق بيۋروكراتيادان ارىلىپ, جەدەل جۇمىس ىستەۋى كەرەك», دەدى.
سىرتتاي قاراساڭىز, ۇكىمەت جاپپاي جۇمىلىپ جۇمىس ىستەپ جاتقان سياقتى. اپتا سايىن ۇكىمەت وتىرىسى وتەدى. پرەمەر-مينيستر تاپسىرما بەرەدى. شاپقىلاپ جۇرگەن ءبىر ادام. ال ناتيجە قانداي؟ بەرىلگەن تاپسىرما ورىندالدى ما؟ ورىندالماسا نەگە ورىندالمادى؟ سۇراۋ جوق سەكىلدى. تاپسىرمالار بار. تياناقتى ورىنداۋ جاعى از. سۇراۋ, باقىلاۋعا الۋ, ءوز مىندەتتەرىن دۇرىس اتقارماعانداردى جاۋاپقا تارتۋ جاعى بايقالمايدى. وسى قالىپپەن كەتە بەرسەك, ءبارى جاي اشەيىن ءسوز تۇرىندە قالادى. سوندىقتان «بەلبەۋدى بۋعا بەل كەرەك». جەدەل شەشىم قابىلداۋعا ەر كەرەك. جاۋاپكەرشىلىكتى ءوز موينىنا الا ءبىلۋ دەگەن تالاپ ورنىقسا دەيمىز.
وسى ۋاقىتقا دەيىن ەكونوميكانى دامىتۋ ءۇشىن «كلاستەر كەرەك» دەدىك. ودان كەيىن «يننوۆاتسيا كەرەك» دەدىك. سوسىن «يندۋسترياليزاتسيا كەرەك» دەدىك. قانشا ميلليارد قارجى كەتتى سونىڭ بارىنە. جاۋاپ بەرگەن بىرەۋ بار ما؟
پرەزيدەنت تاعى دا قايتالاپ ايتىپ جاتىر: «مەملەكەتتىك قىزمەتشىلەردىڭ قۇلىقسىزدىعى جانە جاۋاپكەرشىلىك الۋدان تايسالۋى كەلىسۋ راسىمدەرى مەن شەشىم قابىلداۋدىڭ تىم ۇزاققا سوزىلۋىنا سەبەپ بولىپ وتىر. مۇنى اشىق ايتقان ابزال».
ق ۇلىقسىزدىقتان قالاي قۇتىلامىز؟ جاۋاپسىزدىقتى قالاي رەتتەيمىز؟ دەربەس شەشىم قابىلداۋعا قاشان كوشەمىز؟ ۇكىمەتتىڭ ەندىگى جۇمىس ساپاسى ەڭ الدىمەن وسى ساۋالدارعا جاۋاپ بەرۋىنە تىكەلەي بايلانىستى.
نۇرتورە ءجۇسىپ,
سەنات دەپۋتاتى
