اتىراۋدا كوپىردەن وزەنگە سەكىرگەن جىگىتتى پوليتسەيلەر قۇتقاردى

استانا. 1 مامىر. اتىراۋ قالاسىنىڭ پوليتسەيلەرى كوپىردەن جايىق وزەنىنە سەكىرگەن جىگىتتى قۇتقارىپ قالدى. بۇل تۋرالى «موي گورود» حابارلادى. اتىراۋ وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆانىڭ ايتۋىنشا, وزىنە قول جۇمساماق بولعان جىگىتتى ەكى پوليتسەي قۇتقارىپ قالعان. ءتارتىپ ساقشىلارى كوپىردىڭ ماڭىنان ءوتىپ بارا جاتىپ, 25-30 جاس ارالىعىنداعى ازاماتتىڭ وزەنگە سەكىرگەنىن بايقاعان. ولار بىردەن جىگىتتى قۇتقارۋعا ۇمتىلعان. ناتيجەسىندە پودپولكوۆنيك بولات ديۋسەنوۆ سۋعا سەكىرىپ, ونى جاعاعا الىپ شىقتى. ال قاسىنداعى پودپولكوۆنيك مۇرات دەمەگەنوۆ جەدەل جاردەم مەن پوليتسەيلەردى شاقىرعان. ايتا كەتەيىك, تەرگەۋ بارىسىندا جىگىت 1983 جىلى تۋعان, اتىراۋ قالاسىنىڭ تۇرعىنى ەكەنى انىقتالدى. سونداي-اق, ول جۇيكە اۋرۋلار دەسپانسەرىنىڭ ەسەبىندە تۇرعانى دا بەلگىلى بولدى. دارىگەرلەردىڭ كومەگىنەن كەيىن ءتارتىپ ساقشىلارى جىگىتتى تۋىستارىنا تاپسىردى. تالعات رايىمبەك. دەرەك, سۋرەت: «موي گورود».