2023 جىلمەن سالىستىرعاندا وتكەن جىلى اۋە قىزمەتىن پايدالانعان جولاۋشىلار اعىنى 23%-عا وسكەن. سونىڭ ىشىندە 480 مىڭنان استام جولاۋشى ىشكى رەيستەردىڭ قىزمەتىن پايدالانعان.
بىلتىر ورال اۋەجايىنان جولاۋشىلار 10 باعىت بويىنشا ۇشا الدى. ونىڭ تورتەۋى – حالىقارالىق, قالعانى ەل ىشىندەگى باعىتتار. حالىقتىڭ ەرەكشە سۇرانىسىنا يە بولعانى – استانا, الماتى قالالارى. ءتىپتى كورشىلەس اتىراۋ قالاسىنا ۇشاتىن رەيسكە دە بيلەت تابىلا بەرمەيدى. حالىقارالىق باعىتتار اراسىندا تۇركيانىڭ انتاليا قالاسى كوش باستاپ تۇر.
2022 جىلى كوكتەمدە ورال قالاسىنداعى حالىقارالىق اۋەجاي عيماراتى جاڭعىرتۋدان ءوتىپ, حالىقارالىق ستاندارتتارعا سايكەس قايتا سالىنعان بولاتىن. سودان بەرى اۋەجايدا جولاۋشىلارعا قىزمەت كورسەتۋ ساپاسى ارتتى. وتكەن جىلى ارنايى تەحنيكا پاركى ءورت ءسوندىرۋ ماشيناسىمەن, فرونتالدى تيەگىشپەن, قار تازارتۋعا ارنالعان ەكى Boschung اۋەايلاق ماشيناسىمەن, قۇراما جول ماشيناسىمەن تولىقتىرىلدى. جىل سوڭىندا جابىق كونسترۋكتسيالى ەكى جاڭا تراپ, سۇيىق رەاگەنتتى شاشاتىن تىركەمەلى ۇلەستىرگىش, مەحانيكالاندىرۋ قۇرالدارى ساتىپ الىندى.
– بارلىق قاۋىپسىزدىك تالابىنا ساي كەلەتىن جاڭا باقىلاۋ-وتكىزۋ بەكەتىنىڭ قۇرىلىسى اياقتالدى. ونى قاڭتاردىڭ سوڭى, اقپاننىڭ باسىندا پايدالانۋعا بەرەمىز. وتكەن جىلى ۇشۋ-قونۋ جولاعىنىڭ دەفورماتسيالىق جىكتەرى, پەررون جوندەلدى, اۋەجاي شتابىنىڭ عيماراتىنا سىرتقى كۇردەلى جوندەۋ جۇرگىزىلدى, گاراج بوكستارى, جانارماي قۇيۋ كەشەنى دە جوندەۋدەن ءوتتى, – دەدى ا.ساقپوسىنوۆا.
باتىس قازاقستان وبلىسى
