يبرايموۆ قۋانعالي 1913 جىلى سەمەي وبلىسى اياگوز اۋدانى اقشاتاۋ اۋىلىنىڭ قوڭىرتاۋ بولىمشەسىندە دۇنيەگە كەلىپتى. 1932 جىلى اشارشىلىق كەزىندە شەشەسىن, ەكى باۋىرىن ەرتىپ, كورشىلەس شار اۋدانىنىڭ قاراش اۋىلىنا تۇراقتايدى. وسى جەردەگى شار متس-كە تراكتورشى بولىپ جۇمىسقا ورنالاسادى.
1940 جىلى وزات تراكتورشى رەتىندە ماسكەۋگە سلەتكە جىبەرىلەدى. ءبىزدىڭ بالا كەزىمىزدە ايتىپ وتىراتىن: «ماسكەۋدى ءۇش رەت كوردىم», – دەپ. ءبىرىنشى رەت وزات تراكتورشى رەتىندە جىبەرىپتى. ەكىنشى رەت سوعىس باستالعاندا جولاي ءوتىپتى. ءۇشىنشى رەت سوعىس اياقتالعاندا ەلگە قايتىپ كەلە جاتىپ ايالداپتى.
1941 جىلدىڭ تامىزىندا نەمىس باسقىنشىلارىنىڭ كسرو-عا قارسى سوعىس جاريالاۋىنا بايلانىستى اكەمنىڭ وتباسىنان ەكى ادامدى: ءوزى جانە ۇلكەن اعاسى ورازباي مۇقاەۆتى اسكەرگە الادى. ورازباي اتامىزدى قيىر شىعىستاعى جاپون ميليتاريستەرى قاۋىپ ءتوندىرىپ تۇرعان ايماققا جىبەرەدى. اكەم قۋانعاليدى باتىس مايدانعا اتتاندىرادى. وسىلايشا اعايىندى ەكەۋى ەلىمىزدىڭ باتىسى مەن شىعىسىن قورعاۋعا اتسالىسادى.
اكەي 1941 جىلدىڭ شىلدەسىنەن 1941 جىلدىڭ قىركۇيەگى اراسىندا 3-ءشى اتقىشتار پولكىندە, ال 1941 جىلدىڭ قىركۇيەگىنەن 1943 جىلدىڭ مامىرىنا دەيىن 73-ءشى تانك بريگاداسىندا, 1943 جىلدىڭ مامىرىنان 1944 جىلدىڭ قاڭتارى ارالىعىندا اتقىشتار پولكىندەگى بولىمشە كومانديرىنىڭ كومەكشىسى, 1944 جىلدىڭ قاڭتارىنان 1944 جىلدىڭ قاراشاسىنا دەيىن 121-ءشى اتقىشتار پولكىندە روتا ستارشيناسى, 1944 جىلدىڭ قاراشاسىنان 1945 جىلدىڭ اقپانىنا دەيىن 153-ءشى اتقىشتار پولكىندەگى ۆزۆود كومانديرىنىڭ كومەكشىسى, 1945 جىلدىڭ اقپانىنان 1945 جىلدىڭ تامىزىنا دەيىن 698-ءشى اتقىشتار پولكىندە روتا ستارشيناسى بولعان. سوعىستا كورسەتكەن ەرلىكتەرى ءۇشىن «قىزىل جۇلدىز» وردەنىمەن جانە «ەرلىگى ءۇشىن», «بەرليندى العانى», «گەرمانيانى جەڭگەنى ءۇشىن» جانە باسقا دا مەدالدارمەن ناگرادتالعان. 1945 جىلدىڭ تامىزىندا وتانىمىزدى قورعاۋ بورىشىن ابىرويمەن اتقارىپ ەلىنە ورالادى.
سودان باستاپ سەمەي وبلىسىنىڭ شار اۋدانىنا قاراستى قاراش اۋىلىندا تراكتورشى, ەگىس القابىندا بريگادير بولىپ ەڭبەك جولىن جالعاستىردى. ادال ەڭبەگى ءۇشىن اۋداننىڭ, اۋىلداستارىنىڭ قۇرمەتىنە بولەنىپ, زەينەتكە شىققانشا وسى جەردە ەڭبەك ەتتى. زەينەتكە شىققاننان كەيىن تۋعان جەرى اياگوز وڭىرىنە كوشىپ كەلدى. بەس بالا تاربيەلەپ ءوسىرىپ, ولارعا جوعارى ءبىلىم اپەردى. سوعىس جانە ەڭبەك ارداگەرى. ول كىسى 1994 جىلى دۇنيەدەن ءوتتى. جەڭىس كۇنى قارساڭىندا قاتارداعى مايدانگەردى وسىلايشا ەسكە ءتۇسىرۋدى پارىزىمىز دەپ بىلەمىز.
قاماريا يبرايموۆا.
شىعىس قازاقستان وبلىسى,
اياگوز قالاسى.
