بۇل تۋرالى «جولاۋشىلار تاسىمالى» اق ءباسپاسوز قىزمەتى مالىمدەدى.
اتالعان باعىتتاعى ساپار 17 ساعاتقا سوزىلادى. العاشقى ساپاردا 500 جولاۋشى عالامتورعا قوسىلۋ مۇمكىندىگىن قولداندى.
جولاۋشىلار جاڭا قىزمەت ارقىلى WhatsApp-تا بەينەقوڭىراۋ جاساپ, YouTube-تان بەينەروليكتەر كورىپ جانە باسقا دا تانىمال عالامتور-سەرۆيستەردى پايدالاندى. الايدا, توررەنتتەر مەن اعىندى جۇكتەۋ سايتتارىنا كىرۋگە شەكتەۋ قويىلعانىن ەسكەرگەن ءجون. جولاۋشىلاردىڭ ايتۋىنشا, ۇزاق ساپارلاردا عالامتوردىڭ قولجەتىمدىلىگى جول ءجۇرۋدى الدەقايدا قولايلى ءارى قىزىقتى ەتەدى.
پويىزداعى عالامتور زاماناۋي سپۋتنيكتىك تەحنولوگيالار ارقىلى ىسكە قوسىلعان. لوكوموتيۆكە ورناتىلعان سپۋتنيكتىك قۇرىلعى ءبىر پويىز قۇرامىندا تۇراقتى جانە جوعارى جىلدامدىقتى عالامتورعا قولجەتىمدىلىكتى قامتاماسىز ەتەدى.
- پويىزداردا عالامتوردى ەنگىزۋ – جولاۋشىلار تاسىمالىن دامىتۋ جولىنداعى ماڭىزدى قادام. ءبىز ساياحاتتاردى زاماناۋي تالاپتارعا ساي ۇيىمداستىرىپ, اقپارات پەن بايلانىسقا قولجەتىمدىلىكتى تولىق قامتاماسىز ەتۋگە باعىتتالعان جۇمىستاردى جۇزەگە اسىرۋدامىز. بۇل جوبا جولاۋشىلارعا بايلانىستا قالىپ, ءارى جۇمىس ىستەپ, ءارى دەمالۋعا مۇمكىندىك بەرەدى. الداعى ۋاقىتتا ءبىز وسى قىزمەتتى كەڭەيتىپ, الدىمەن «تالگو» پويىزدارىنىڭ بارلىق 15 باعىتىنا عالامتور ەنگىزۋدى جوسپارلاپ وتىرمىز, – دەپ اتاپ ءوتتى «جولاۋشىلار تاسىمالى» اق باسقارما توراعاسى ءانۋار احمەتجانوۆ.
جوبانى جۇزەگە اسىرۋ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, كولىك مينيسترلىگى, سونداي-اق, «Jusan Mobile» تەلەكوممۋنيكاتسيالىق كومپانياسى مەن قازاقستانداعى Eutelsat-OneWeb رەسمي ديستريبيۋتورىنىڭ بىرلەسكەن جۇمىسىنىڭ ناتيجەسىندە مۇمكىن بولدى.
- قتج پويىزىندا تومەن وربيتالىق Eutelsat-OneWeb سپۋتنيكتىك تەحنولوگياسىن قولدانۋ ارقىلى قاناتقاقتى جوبانىڭ ىسكە قوسىلۋى – كولىكتى تسيفرلاندىرۋ باعىتىنداعى ماڭىزدى قادام. ارىپتەستەرىمىزبەن اتقارىلعان جۇمىستىڭ ناتيجەسىندە كۇردەلى جاعدايلاردا دا جولاۋشىلارعا تۇراقتى جانە جوعارى جىلدامدىقتى (50–100 مب/س) عالامتور ۇسىنۋ مۇمكىن بولدى. بۇل جەتىستىك ەلىمىزدىڭ تسيفرلىق دامۋىنا جاڭا مۇمكىندىكتەر اشىپ, قازاقستاندىقتاردىڭ ساپارلارىن بۇرىنعىدان دا قولايلى ەتەدى, – دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
جوبا اياسىندا بيلەتتەردى تەكسەرۋگە ارنالعان ءموبيلدى تەرمينالدار, پويىز باسشىلارى ءۇشىن بەينەرەگيستراتورلار جانە بەينەباقىلاۋ جۇيەلەرى ورناتىلدى. بارلىق جازبالار اۆتوماتتى تۇردە بۇلتتى دەرەكتەر قويماسىندا ساقتالىپ, باقىلاۋ مەن قاۋىپسىزدىك دەڭگەيىن جوعارىلاتۋعا مۇمكىندىك بەرەدى.
سونىمەن قاتار عالامتوردىڭ ەنگىزىلۋى مەيرامحانا ۆاگونىنداعى تولەم جۇيەسىنە وزگەرىس اكەلدى. ەندى جولاۋشىلار تاپسىرىستارىن جول بارىسىندا POS-تەرمينالدار ارقىلى تولەي الادى.
