سولتۇستىك قازاقستاندا ەقىۇ جوعارعى كوميسسارى جۇمىس ساپارمەن بولدى

پەتروپاۆل. 18 ماۋسىم. سولتۇستىك قازاقستان وبلىسىنا از ۇلتتار ىستەرى جونىندەگى ەقىۇ جوعارعى كوميسسارى استريد تۋرس كەلدى. بۇل تۋرالى اكىمدىكتىڭ ءباسپاسوز قىزمەتى حابارلادى. دەلەگاتسيانى قارسى العان وبلىس اكىمى ەرىك سۇلتانوۆپەن اڭگىمە بارىسىندا تۋرس حانىمنىڭ وڭىرگە ساپارىنىڭ ماقساتى قازاقستان حالقى اسسامبلەياسىنىڭ 20 جىلدىعىنا ارنالعان كونفەرەنتسياعا قاتىسۋى ەكەنى بەلگىلى بولدى.  ەرىك حامزا ۇلى مارتەبەلى قوناقتى وبلىستىڭ ەكونوميكالىق-الەۋمەتتىك, ساياسي-مادەني جاڭالىقتارىمەن تانىستىردى.  پرەزيدەنت ن.نازارباەۆتىڭ تىكەلەي باستاماسىمەن قۇرىلعان ساياسي قۇرىلىمنىڭ قازاقستاندىقتاردى ورتاق ارناعا بىرىكتىرۋشىلىك, جۇمىلدىرۋشىلىق ءرولىن, العا 5 ينستيتۋتتىق رەفورمانى جۇزەگە اسىرۋ ماقساتىن قويىپ وتىرعانىن اتاپ كورسەتتى. دەلەگاتسيا مۇشەلەرىنىڭ نازارىن وڭىردە بارلىق ەتنوستاردىڭ مادەنيەتىن, سالت-ءداستۇرىن, ءتىلىن ۇيرەنۋگە جان-جاقتى مۇمكىندىكتەر جاسالعانىنا اۋداردى. مىسالى, دوستىق ۇيىندە پولياك, نەمىس, يۆريت تىلدەرىنىڭ كۋرستارى قۇرىلعان. پەتروپاۆل قالاسىنداعى № 17 ۇلتتىق جاڭعىرۋ مەكتەبىندە 9 ءبولىم بار, ولاردا بالالار ازەربايجان, ارميان, كارىس, قازاق, نەمىس, ۋكراين, پولياك, تاتار, شەشەن تىلدەرى مەن مادەنيەتىن وقىپ-ۇيرەنەدى. ءوز كەزەگىندە جوعارعى كوميسسار قازاقستانعا وسىمەن ەكىنشى رەت ارنايى كەلىپ وتىرعانىن, اسسامبلەيا تاجىريبەسى قىزىقتىراتىنىن, ەقىۇ مەن قازاقستان اراسىندا ورتاق تۇسىنىستىك ورناعانىن, ءوزارا قارىم-قاتىناس ءتيىمدى دامىپ كەلە جاتقانىن جەتكىزدى. «ءبىز قازاقستاننىڭ حالىقتار بىرلىگىنە ەرەكشە كوڭىل ءبولىپ وتىرعانىن جوعارى باعالايمىز. بۇل جۇمىستاردىڭ قالاي اتقارىلىپ جاتقانىن ەتنومادەني بىرلەستىكتەر ارقىلى جاقسى بىلەمىز», دەدى ول. رەسمي شارا اياقتالعاننان كەيىن كەزدەسۋلەر ۇيىمداستىرىلدى. ءومىر ەسقالي. دەرەك, سۋرەت: سولتۇستىك قازاقستان وبلىستىق اكىمدىگىنىڭ ءباسپاسوز قىزمەتى.